الشُيوخ جابوا هداياهم
1 وَ وَكِتْ مُوسَى كَمَّلْ مِنْ بَنِي خَيْمَةْ الْعِبَادَةْ، مَسَحَاهَا وَ خَصَّصَاهَا هِي وَ كُلَّ مُعِدَّاتْهَا. وَ الْمَدْبَحْ وَ كُلَّ مُعِدَّاتَهْ كُلَ مَسَحَهْ وَ خَصَّصَهْ. 2 وَ خَلَاصْ، شُيُوخْ بَنِي إِسْرَائِيلْ قَدَّمَوْا هَدَايَا. وَ هُمَّنْ بَسْ الشُّيُوخْ هَنَا الْعَايِلَاتْ وَ الْقَبَايِلْ الْقَمَّوْا بِالْحَسَابَةْ. 3 وَ هُمَّنْ لَمَّوْا هَدَايَاهُمْ سَوَا وَ قَدَّمَوْهُمْ لِلّٰهْ. وَ جَابَوْا سِتَّةْ كَارَّوْ مُغَطَّيِينْ وَ 12 تَوْر يَعْنِي كُلِّ شُيُوخْ إِتْنَيْن جَابَوْا كَارَّوْ وَاحِدْ وَ أَيِّ وَاحِدْ جَابْ تَوْر. وَ هُمَّنْ جَابَوْهُمْ قِدَّامْ خَيْمَةْ الْعِبَادَةْ.
4 وَ اللّٰهْ حَجَّى لِمُوسَى وَ قَالْ: 5 «أَقْبَلْ الْهَدَايَا الْجَابَوْهُمْ لَيْك وَ أَسْتَعْمَلْهُمْ لِنَقِلِينْ خَيْمَةْ الْإِجْتِمَاعْ. أَنْطِيهُمْ لِعِيَالْ لَاوِي. أَيِّ وَاحِدْ أَنْطِيهْ حَسَبْ الشَّيّءْ الْوَاجِبْ لَيَّهْ فِي خِدِمْتَهْ.»
6 مُوسَى شَالْ مِنْهُمْ الْكَارَّوْيَاتْ وَ التِّيرَانْ وَ أَنْطَاهُمْ لِعِيَالْ لَاوِي. 7 هُو أَنْطَى إِتْنَيْن كَارَّوْ وَ أَرْبَعَةْ تِيرَانْ لِذُرِّيَّةْ قِرْشُونْ حَسَبْ الشَّيّءْ الْوَاجِبْ لَيْهُمْ فِي خِدْمِتْهُمْ. 8 وَ الْأَرْبَعَةْ كَارَّوْ وَ التَّمَانَةْ تِيرَانْ الْفَضَّلَوْا، أَنْطَاهُمْ لِذُرِّيَّةْ مَرَارِي حَسَبْ الشَّيّءْ الْوَاجِبْ لَيْهُمْ فِي خِدْمِتْهُمْ تِحِتْ مُرَاقَبَةْ إِتَمَارْ وِلَيْد هَارُونْ رَاجِلْ الدِّينْ. 9 وَ لَاكِنْ مَا أَنْطَى شَيّءْ لِذُرِّيَّةْ قَهَاتْ أَشَانْ هُمَّنْ خِدْمِتْهُمْ يَنْقُلُوا الْمُعِدَّاتْ الْمُقَدَّسِينْ فِي كَتَافَيْهُمْ.
هدايا ليفْتحوا المدْبح
10 وَ يَوْم مَسَحَوْا الْمَدْبَحْ لِيَفْتَحَوْه، الشُّيُوخْ قَدَّمَوْا هَدَايَا. وَ هُمَّنْ جَابَوْا هَدَايَاهُمْ قِدَّامْ الْمَدْبَحْ. 11 وَ اللّٰهْ قَالْ لِمُوسَى: «خَلِّي أَيِّ شَيْخ يَجِي فِي يَوْم وَاحِدْ يِقَدِّمْ هَدِيّتَهْ لِفَتِحِينْ الْمَدْبَحْ. وَ مِثِلْ دَا، الْوَاحِدْ يَجِي بَعَدْ الْآخَرْ.»
12 وَ فِي الْيَوْم الْأَوَّلْ، نَحْشُونْ وِلَيْد عَمِنَدَابْ شَيْخ قَبِيلَةْ يَهُوذَا جَاءْ قَدَّمْ هَدِيّتَهْ. 13 وَ فِي الْهَدِيَّةْ دِي، فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 14 وَ فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 15 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 16 وَ تَيْس ضَحِيَّةْ لِكَفَّارَةْ الذَّنِبْ. 17 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا نَحْشُونْ وِلَيْد عَمِنَدَابْ.
18 وَ فِي الْيَوْم التَّانِي، نَتَنِيلْ وِلَيْد صُوعَرْ شَيْخ قَبِيلَةْ يَسَّاكَرْ جَاءْ قَدَّمْ هَدِيّتَهْ. 19 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 20 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 21 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 22 وَ تَيْس ضَحِيَّةْ لِكَفَّارَةْ الذَّنِبْ. 23 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا نَتَنِيلْ وِلَيْد صُوعَرْ.
24 وَ فِي الْيَوْم التَّالِتْ، أَلِيَابْ وِلَيْد حِيلُونْ شَيْخ قَبِيلَةْ زَبُلُونْ جَاءْ قَدَّمْ هَدِيّتَهْ. 25 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 26 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 27 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 28 وَ تَيْس ضَحِيَّةْ لِكَفَّارَةْ الذَّنِبْ. 29 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَلِيَابْ وِلَيْد حِيلُونْ.
30 وَ فِي الْيَوْم الرَّابِعْ، أَلِصُورْ وِلَيْد شَدَيُورْ شَيْخ قَبِيلَةْ رَأُوبِينْ جَاءْ قَدَّمْ هَدِيّتَهْ. 31 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 32 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 33 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 34 وَ تَيْس ضَحِيَّةْ لِكَفَّارَةْ الذَّنِبْ. 35 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَلِصُورْ وِلَيْد شَدَيُورْ.
36 وَ فِي الْيَوْم الْخَامِسْ، شَلُمِيِيلْ وِلَيْد صُرِشَدَايْ شَيْخ قَبِيلَةْ شِمْعُونْ جَاءْ قَدَّمْ هَدِيّتَهْ. 37 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 38 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 39 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 40 وَ تَيْس ضَحِيَّةْ لِكَفَّارَةْ الذَّنِبْ. 41 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا شَلُمِيِيلْ وِلَيْد صُرِشَدَايْ.
42 وَ فِي الْيَوْم السَّادِسْ، أَلِيَاسَفْ وِلَيْد دَعُوِيلْ شَيْخ قَبِيلَةْ قَادْ جَاءْ قَدَّمْ هَدِيّتَهْ. 43 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 44 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 45 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 46 وَ تَيْس ضَحِيَّةْ لِكَفَّارَةْ الذَّنِبْ. 47 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَلِيَاسَفْ وِلَيْد دَعُوِيلْ.
48 وَ فِي الْيَوْم السَّابِعْ، أَلِشَمَعْ وِلَيْد عَمِهُودْ شَيْخ قَبِيلَةْ أَفْرَايِمْ جَاءْ قَدَّمْ هَدِيّتَهْ. 49 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 50 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 51 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 52 وَ تَيْس ضَحِيَّةْ لِكَفَّارَةْ الذَّنِبْ. 53 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَلِشَمَعْ وِلَيْد عَمِهُودْ.
54 وَ فِي الْيَوْم التَّامِنْ، قَمَلِيِيلْ وِلَيْد فَدَهْصُورْ شَيْخ قَبِيلَةْ مَنَسَّى جَاءْ قَدَّمْ هَدِيّتَهْ. 55 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 56 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 57 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 58 وَ تَيْس ضَحِيَّةْ لِكَفَّارَةْ الذَّنِبْ. 59 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا قَمَلِيِيلْ وِلَيْد فَدَهْصُورْ.
60 وَ فِي الْيَوْم التَّاسِعْ، أَبِدَانْ وِلَيْد قِدْعُونِي شَيْخ قَبِيلَةْ بَنْيَامِينْ جَاءْ قَدَّمْ هَدِيّتَهْ. 61 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 62 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 63 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 64 وَ تَيْس ضَحِيَّةْ لِكَفَّارَةْ الذَّنِبْ. 65 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَبِدَانْ وِلَيْد قِدْعُونِي.
66 وَ فِي الْيَوْم الْعَاشِرْ، أَخِعَازَرْ وِلَيْد عَمِشَدَايْ شَيْخ قَبِيلَةْ دَانْ جَاءْ قَدَّمْ هَدِيّتَهْ. 67 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 68 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 69 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 70 وَ تَيْس ضَحِيَّةْ لِكَفَّارَةْ الذَّنِبْ. 71 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَخِعَازَرْ وِلَيْد عَمِشَدَايْ.
72 وَ فِي يَوْم 11، فَقْعِيِيلْ وِلَيْد عُكْرَنْ شَيْخ قَبِيلَةْ أَشِيرْ جَاءْ قَدَّمْ هَدِيّتَهْ. 73 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 74 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 75 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 76 وَ تَيْس ضَحِيَّةْ لِكَفَّارَةْ الذَّنِبْ. 77 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا فَقْعِيِيلْ وِلَيْد عُكْرَنْ.
78 وَ فِي يَوْم 12، أَخِيرَعْ وِلَيْد عِنَانْ شَيْخ قَبِيلَةْ نَفْتَالِي جَاءْ قَدَّمْ هَدِيّتَهْ. 79 وَ فِي الْهَدِيَّةْ دِي فِي صُفْرَةْ هَنَا فُضَّةْ وَزِنْهَا 50 حَجَرْ وَ كَاسْ هَنَا فُضَّةْ الْيَوْزِنْ 30 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. وَ الْمَوَاعِينْ الْإِتْنَيْن دَوْل مَلَوْهُمْ دَقِيقْ مُخَلْبَطْ بِدِهِنْ وَ قَدَّمَوْهُمْ هَدِيَّةْ. 80 وَ فِي الْهَدِيَّةْ دِي فِي بَتَّانْ طَاسَةْ صَغَيْرَةْ هَنَا دَهَبْ التَّوْزِنْ 14 جِنَيْه وَ سِيسِي مَلَانَةْ بَخُورْ. 81 وَ فِي تَوْر وَ كَبِشْ وَ خَرُوفْ وَلْد سَنَةْ لِلضَّحِيَّةْ الْمُحَرَّقَةْ 82 وَ تَيْس ضَحِيَّةْ لِكَفَّارَةْ الذَّنِبْ. 83 وَ لِضَحِيَّةْ السَّلَامَةْ كَمَانْ فِي تِيرَانْ إِتْنَيْن وَ خَمْسَةْ كَبِشْ وَ خَمْسَةْ تَيْس وَ خَمْسَةْ خَرُوفْ أَيِّ وَاحِدْ وَلْد سَنَةْ. وَ دِي الْهَدِيَّةْ الْقَدَّمَاهَا أَخِيرَعْ وِلَيْد عِنَانْ.
84 وَ دَوْل الْهَدَايَا الْجَابَوْهُمْ شُيُوخْ بَنِي إِسْرَائِيلْ وَكِتْ مَسَحَوْا الْمَدْبَحْ وَ فَتَحَوْه. هُمَّنْ جَابَوْا 12 صُفْرَةْ هَنَا فُضَّةْ وَ 12 كَاسْ هَنَا فُضَّةْ وَ 12 طَاسَةْ صَغَيْرَةْ هَنَا دَهَبْ. 85 وَ أَيِّ صُفْرَةْ هَنَا فُضَّةْ وَزِنْهَا 50 حَجَرْ وَ أَيِّ كَاسْ هَنَا فُضَّةْ وَزْنَهْ 30 حَجَرْ وَ كُلَّ مَوَاعِينْ الْفُضَّةْ دَوْل وَزِنْهُمْ 985 حَجَرْ وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. 86 وَ الْأَتْنَا عَشَرْ طَاسَةْ صَغَيْرَةْ هَنَا دَهَبْ مَلَانَةْ بَخُورْ أَيِّ وَاحِدَةْ تَوْزِنْ 14 جِنَيْه وَ سِيسِي. وَ الطَّاسَاتْ الصُّغَارْ هَنَا الدَّهَبْ دَوْل كُلُّهُمْ كَيْ يَوْزُنُوا 174 جِنَيْه وَ دَا حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. 87 وَ بِالْجُمْلَةْ جَابَوْا لِلضَّحَايَا الْمُحَرَّقِينْ 12 تَوْر وَ 12 كَبِشْ وَ 12 خَرُوفْ أَيِّ وَاحِدْ وَلْد سَنَةْ وَ جَابَوْا مَعَاهُمْ هَدِيَّةْ هَنَا دَقِيقْ. وَ جَابَوْا 12 تَيْس ضَحَايَا لِكَفَّارَةْ الذَّنِبْ. 88 وَ بِالْجُمْلَةْ جَابَوْا لِضَحَايَا السَّلَامَةْ 24 تَوْر وَ 60 كَبِشْ وَ 60 تَيْس وَ 60 خَرُوفْ أَيِّ وَاحِدْ وَلْد سَنَةْ. وَ دَوْل الْهَدَايَا الْقَدَّمَوْهُمْ لِفَتِحِينْ الْمَدْبَحْ بَعَدْ مَسَحَوْه.
مُوسَى يكلِّم مع اللّه
89 وَ وَكِتْ مُوسَى يَدْخُلْ فِي خَيْمَةْ الْإِجْتِمَاعْ لِيِكَلِّمْ مَعَ اللّٰهْ، هُو يَسْمَعْ حِسَّهْ يَجِي لَيَّهْ مِنْ فَوْق لِسِدَادَةْ صَنْدُوقْ الْفَوْقَهْ لِيحَانْ الْمُعَاهَدَةْ أَمْبَيْن الْمَخْلُوقِينْ السَّمَاوِيِّينْ الْإِتْنَيْن الْمَصْنُوعِينْ فِي ضَهَرْ السِّدَادَةْ. وَ يِكَلِّمْ مَعَايَهْ.
© La Bible en arabe tchadien © Alliance biblique du Tchad, 2019
