الفانوس و نيرانه
1 وَ اللّٰهْ حَجَّى لِمُوسَى وَ قَالْ: 2 «قُولْ لِهَارُونْ وَكِتْ يِرَكِّبْ السَّبْعَةْ طِيَيْسَاتْ لِلنَّارْ، خَلِّي يِوَجِّهْ النِّيرَانْ لِيِضَوُّوا الْبَكَانْ الْقَاعِدْ قِدَّامْ الْفَانُوسْ.»
3 وَ هَارُونْ سَوَّى مِثِلْ اللّٰهْ أَمَرْ بَيَّهْ مُوسَى. رَكَّبْ كُلَّ طِيَيْسَاتْ النَّارْ وَ وَجَّهْ نِيرَانْهُمْ أَشَانْ قَاعِدِينْ يِضَوُّوا الْبَكَانْ الْقَاعِدْ قِدَّامْ الْفَانُوسْ. 4 وَ الْفَانُوسْ دَا مَدْقُوقْ بِدَهَبْ مِنْ قَعَرَهْ لَحَدِّي رَاسَهْ الْقَاعِدِينْ فَوْقَهْ الزُّهُورْ هَنَا الدَّهَبْ. وَ دَقَّوْه حَسَبْ وَصِفْ الْوَصَّفَهْ اللّٰهْ لِمُوسَى.
طِهارة اللاوِيِّين
5 وَ بَتَّانْ اللّٰهْ حَجَّى لِمُوسَى وَ قَالْ: 6 «شِيلْ اللَّاوِيِّينْ مِنْ بَنِي إِسْرَائِيلْ وَ سَوِّيهُمْ طَاهِرِينْ. 7 وَ دَاهُو الشَّيّءْ التِّسَوِّيهْ لِيَبْقَوْا طَاهِرِينْ. رُشُّهُمْ بِأَلْمِي التَّطْهِيرْ وَ خَلِّي يِزَيُّنُوا كُلَّ جِلِدْهُمْ وَ يِغَسُّلُوا خُلْقَانْهُمْ وَ بَيْدَا، خَلَاصْ يَبْقَوْا طَاهِرِينْ. 8 وَ يِشِيلُوا تَوْر وَ مَعَايَهْ هَدِيَّةْ هَنَا دَقِيقْ مُخَلْبَطْ بِدِهِنْ وَ إِنْتَ تِشِيلْ تَوْر آخَرْ ضَحِيَّةْ لِكَفَّارَةْ الذَّنِبْ. 9 وَ جِيبْ اللَّاوِيِّينْ قِدَّامْ خَيْمَةْ الْإِجْتِمَاعْ وَ لِمّ كُلَّ مُجْتَمَعْ بَنِي إِسْرَائِيلْ. 10 وَ قَدِّمْ اللَّاوِيِّينْ قِدَّامْ اللّٰهْ. وَ خَلِّي بَنِي إِسْرَائِيلْ يُخُطُّوا إِيدَيْهُمْ فَوْق اللَّاوِيِّينْ. 11 وَ هَارُونْ يِقَدِّمْ اللَّاوِيِّينْ مِثِلْ هَدِيَّةْ مَرْفُوعَةْ الْيِقَدُّمُوهَا بَنِي إِسْرَائِيلْ لِلّٰهْ. وَ بَيْدَا، اللَّاوِيِّينْ يَقْدَرَوْا يَخْدُمُوا لِلّٰهْ. 12 وَ اللَّاوِيِّينْ يُخُطُّوا إِيدَيْهُمْ فِي رُوسَيْ التِّيرَانْ دَوْل وَ إِنْتَ قَدِّمْهُمْ لِلّٰهْ. التَّوْر الْوَاحِدْ ضَحِيَّةْ لِكَفَّارَةْ الذَّنِبْ وَ الْوَاحِدْ ضَحِيَّةْ مُحَرَّقَةْ وَ دَا يَبْقَى كَفَّارَةْ لِذُنُوبْ اللَّاوِيِّينْ. 13 وَ جِيبْ اللَّاوِيِّينْ قِدَّامْ هَارُونْ وَ أَوْلَادَهْ وَ قَدِّمْهُمْ مِثِلْ هَدِيَّةْ مَرْفُوعَةْ لِلّٰهْ. 14 وَ بَيْدَا، أَعَزِلْ اللَّاوِيِّينْ مِنْ بَنِي إِسْرَائِيلْ وَ هُمَّنْ يَبْقَوْا هِنَيّ أَنَا اللّٰهْ.
15 «وَ بَعَدْ تِطَهِّرْ اللَّاوِيِّينْ وَ تِقَدِّمْهُمْ لَيِّ مِثِلْ هَدِيَّةْ مَرْفُوعَةْ، خَلِّي يَمْشُوا يَخْدُمُوا فِي خَيْمَةْ الْإِجْتِمَاعْ. 16 أَشَانْ مِنْ كُلَّ بَنِي إِسْرَائِيلْ، هُمَّنْ بَسْ هِنَيّ حَلَالِي. وَ أَنَا شِلْتُهُمْ فِي بَدَلْ كُلَّ أَوْلَادْ الْبِكِرْ مِنْ بَنِي إِسْرَائِيلْ لِيَبْقَوْا هِنَيّ أَنَا اللّٰهْ. 17 أَشَانْ كُلَّ أَوْلَادْ الْبِكِرْ هِنَيّ. مِنْ يَوْم أَنَا كَتَلْت كُلَّ أَوْلَادْ الْبِكِرْ فِي بَلَدْ مَصِرْ، كُلَّ أَوْلَادْ الْبِكِرْ فِي إِسْرَائِيلْ كَنْ مِنْ النَّاسْ وَلَّا مِنْ الْبَهَايِمْ كُلَ، أَنَا خَصَّصْتُهُمْ لِيَبْقَوْا هِنَيّ أَنَا. 18 وَ لَاكِنْ هَسَّعْ أَنَا شِلْت اللَّاوِيِّينْ فِي بَدَلْ كُلَّ أَوْلَادْ الْبِكِرْ مِنْ بَنِي إِسْرَائِيلْ. 19 وَ أَنَا شِلْت اللَّاوِيِّينْ وَ أَنْطَيْتهُمْ لِهَارُونْ وَ أَوْلَادَهْ أَشَانْ يَخْدُمُوا لِبَنِي إِسْرَائِيلْ فِي خَيْمَةْ الْإِجْتِمَاعْ وَ يِسَوُّوا لَيْهُمْ الْكَفَّارَةْ. وَ بَيْدَا، الْوَبَاءْ مَا يَنْزِلْ فِي بَنِي إِسْرَائِيلْ وَكِتْ يَجُوا قَرِيبْ لِلْبَكَانْ الْمُقَدَّسْ.»
20 وَ مُوسَى وَ هَارُونْ وَ كُلَّ مُجْتَمَعْ بَنِي إِسْرَائِيلْ سَوَّوْا كُلَّ شَيّءْ الْبُخُصّ اللَّاوِيِّينْ مِثِلْ اللّٰهْ أَمَرْ بَيَّهْ مُوسَى. 21 وَ اللَّاوِيِّينْ طَهَّرَوْا نُفُوسْهُمْ وَ غَسَّلَوْا خُلْقَانْهُمْ وَ هَارُونْ قَدَّمَاهُمْ مِثِلْ هَدِيَّةْ مَرْفُوعَةْ لِلّٰهْ. وَ سَوَّى لَيْهُمْ الْكَفَّارَةْ أَشَانْ يَبْقَوْا طَاهِرِينْ. 22 وَ بَعَدْ دَا، اللَّاوِيِّينْ قِدْرَوْا خَدَمَوْا فِي خَيْمَةْ الْإِجْتِمَاعْ تِحِتْ مُرَاقَبَةْ هَارُونْ وَ أَوْلَادَهْ. وَ سَوَّوْا كُلَّ شَيّءْ الْبُخُصّ اللَّاوِيِّينْ مِثِلْ اللّٰهْ أَمَرْ بَيَّهْ مُوسَى.
23 وَ بَتَّانْ اللّٰهْ حَجَّى لِمُوسَى وَ قَالْ: 24 «دَاهُو خِدْمَةْ اللَّاوِيِّينْ. أَيِّ وَاحِدْ الْعُمْرَهْ مِنْ 25 سَنَةْ وَ فَوْق، وَاجِبْ يُقُمّ وَ يَخْدِمْ فِي خَيْمَةْ الْإِجْتِمَاعْ. 25 وَ كَنْ عُمْرَهْ لِحِقْ 50 سَنَةْ، خَلَاصْ خَلِّي يَقِيفْ بَتَّانْ مَا يَخْدِمْ. 26 هُو يِسَاعِدْ أَخْوَانَهْ الْقَاعِدِينْ يَحْفَضَوْا وَ يَخْدُمُوا فِي خَيْمَةْ الْإِجْتِمَاعْ لَاكِنْ مَا يَنْطُوهْ خِدْمَةْ خَاصَّةْ لَيَّهْ. وَ دَا الشَّيّءْ الْوَاجِبْ تِسَوِّيهْ فِي الْخِدْمَةْ التُّخُصّ اللَّاوِيِّينْ.»
© La Bible en arabe tchadien © Alliance biblique du Tchad, 2019
