1 جَوَابْ مِنِّي أَنَا بُولُسْ الْمَسْجُونْ فِي شَانْ الْمَسِيحْ عِيسَى وَ مِنْ أَخُونَا تِمُوتَاوُسْ. وَ نَكْتِبْ لَيْك إِنْتَ، يَا حَبِيبْنَا وَ رَفِيقْنَا فِي الْخِدْمَةْ فِلِمُونْ 2 وَ جَمَاعَةْ الْمُؤمِنِينْ الْيِلِمُّوا فِي بَيْتَكْ وَ أَخُتْنَا أَفِّيَّةْ وَ أَخُونَا أَرْخِبَّا الْمِثِلْنَا يِتَابِعْ كَلَامْ رَبِّنَا مِثِلْ عَسْكَرِي يِتَابِعْ كَبِيرَهْ. 3 عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.
4 يَا فِلِمُونْ، أَيِّ وَكِتْ النِّصَلِّي، نِفَكِّرْ فَوْقَكْ وَ نَشْكُرْ اللّٰهْ رَبِّي 5 أَشَانْ سِمِعْت خَبَرْ إِيمَانَكْ بِرَبِّنَا عِيسَى وَ بِمَحَبِّتَكْ لِكُلَّ الصَّالِحِينْ. 6 وَ نَسْأَلْ لَيْك اللّٰهْ كَدَرْ بِالْعَلَاقَةْ الْعِنْدَكْ مَعَ أَخْوَانَكْ الْمُؤمِنِينْ تَلْقَى عِرْفَةْ بِزِيَادَةْ فِي كُلَّ الْخَيْر الْعِنْدِنَا فِي الْمَسِيحْ. 7 وَ بِالصَّحِيحْ، يَا أَخُويِ، خَبَرْ هَنَا مَحَبِّتَكْ أَنْطَانِي فَرْحَةْ كَبِيرَةْ وَ شَجَاعَةْ شَدِيدَةْ أَشَانْ الشَّيّءْ الْإِنْتَ سَوَّيْتَهْ فَرَّحْ قُلُوبْ الصَّالِحِينْ.
8 وَ أَشَانْ دَا، نِدَوْر نَطْلُبْ مِنَّكْ شَيّءْ وَاحِدْ. عِنْدِي حَقّ فِي الْمَسِيحْ لِنَامُرَكْ طَوَّالِي أَشَانْ تِسَوِّي الشَّيّءْ النِّدَوْرَهْ. 9 وَ لَاكِنْ أَنِحْنَ نِرَّايَدَوْا وَ أَشَانْ دَا، يَبْقَى لَيِّ أَخَيْر كَنْ نِقَدِّمْ لَيْك طَلَبْ وَ إِنْتَ تَفْهَمْنِي. وَ أَنَا النِّحَجِّي لَيْك، أَنَا بُولُسْ سَفِيرْ الْمَسِيحْ عِيسَى الْحَالِيّاً مَسْجُونْ فِي شَانَهْ.
10 وَ نِقَدِّمْ لَيْك طَلَبْ فِي شَانْ وِلَيْدِي الْفَايِدْ الْأَنَا بِقِيتْ لَيَّهْ أَبُوهْ وَكِتْ أَنَا قَاعِدْ فِي السِّجِنْ. 11 أَوَّلْ هُو مَا عِنْدَهْ لَيْك فَايْدَةْ لَاكِنْ بِالصَّحِيحْ هَسَّعْ هُو بِقِي نَادُمْ عِنْدَهْ فَايْدَةْ كَتِيرَةْ بِلْحَيْن. هُو عِنْدَهْ فَايْدَةْ لَيْك إِنْتَ وَ لَيِّ أَنَا كُلَ. 12 وَ أَنَا قَاعِدْ نِقَبِّلَهْ لَيْك مَعَ الْجَوَابْ دَا وَ دَا قَاسِي لَيِّ أَشَانْ نَقْرَمْ لَيَّهْ بِلْحَيْن.
13 بِالصَّحِيحْ، دَوَّرْت هُو يَقْعُدْ هِنِي مَعَايِ. أَنَا قَاعِدْ فِي السِّجِنْ فِي شَانْ بِشَارَةْ الْمَسِيحْ وَ نَعَرِفْ كَدَرْ إِنْتَ تِدَوْر تِسَاعِدْنِي. وَ كَنْ الْفَايِدْ يَقْعُدْ مَعَايِ، هُو يَقْدَرْ يِسَاعِدْنِي فِي بَدَلَكْ إِنْتَ. 14 لَاكِنْ مَا دَوَّرْت نِسَوِّي أَيِّ شَيّءْ الْبُخُصَّهْ إِلَّا كَنْ إِنْتَ قَصَّدْت بَيَّهْ. وَ مِثِلْ دَا، تِسَوِّي الْخَيْر مَا أَشَانْ أَنَا عَصَرْتَكْ لَيَّهْ لَاكِنْ أَشَانْ إِنْتَ شِلْت نِيَّةْ لَيَّهْ بِنَفْسَكْ. 15 أَكُونْ فِي شَانْ دَا بَسْ، اللّٰهْ فَرَقَهْ مِنَّكْ وَكِتْ شِيَّةْ أَشَانْ هَسَّعْ يِقَبِّلْ لَيْك وَ يَقْعُدْ مَعَاكْ دَايْماً. 16 وَ مَا يَبْقَى بَتَّانْ عَبْدَكْ بَسْ لَاكِنْ يَبْقَى أَخَيْر مِنْ عَبْدَكْ. هُو بِقِي أَخُوكْ الْمَحْبُوبْ. أَكِيدْ أَنَا نِحِبَّهْ لَاكِنْ إِنْتَ وَاجِبْ تِحِبَّهْ بِزِيَادَةْ أَشَانْ هُو عَبْدَكْ الْغَالِي وَ بِرَبِّنَا الْمَسِيحْ، هُو بِقِي أَخُوكْ.
17 زَيْن. نَعَرِفْ كَدَرْ إِنْتَ تَجْعَلْنِي أَنَا مُشَارِكْ مَعَاكْ فِي الْإِيمَانْ. وَ نَطْلُبْ مِنَّكْ تَكْرُبْ الْفَايِدْ قَوِي مِثِلْ تِدَوْر تَكْرُبْنِي أَنَا قَوِي. 18 كَنْ هُو سَوَّى لَيْك شَيّءْ فَسِلْ وَلَّا عِنْدَهْ دَيْن فِي رَاسَهْ كُلَ، كَلِّفْنِي بَيَّهْ أَنَا. 19 أَنَا بُولُسْ كَرَبْت الْقَلَمْ وَ نَكْتِبْ الْكَلَامْ دَا بِإِيدِي: «أَنَا بَسْ نِكَفِّيكْ.» وَ إِنْتَ لِقِيتْ الْحَيَاةْ الْجَدِيدَةْ بِكَلَامِي أَنَا بَسْ وَ لَاكِنْ مَا نِدَوْر نِحَجِّي لَيْك بِالشَّيّءْ الْوَاجِبْ تِسَوِّيهْ لَيِّ.
20 أَيْوَى، يَا أَخُويِ، أَنِحْنَ أَخْوَانْ فِي الرَّبّ وَ نِدَوْر مِنَّكْ فَايْدَةْ شِيَّةْ. فَرِّحْ قَلْبِي فِي الْمَسِيحْ بِزِيَادَةْ. 21 أَنَا مُؤَكِّدْ كَدَرْ تِتَابِعْ كَلَامِي. أَنَا قَاعِدْ نَكْتِبْ لَيْك وَ فِي قَلْبِي نَعَرِفْ إِنْتَ تِسَوِّي زِيَادَةْ مِنْ الْقُلْتَهْ لَيْك كُلَ.
22 وَ مَعَ الْكَلَامْ دَا، نُقُولْ لَيْك جَهِّزْ لَيِّ بَكَانْ فِي بَيْتَكْ أَشَانْ نَجِي نَقْعُدْ مَعَاكْ. نَرْجَى اللّٰهْ يَسْمَعْ دُعَاكُو فِي شَانِي وَ يَطُلْقُونِي قَرِيبْ. 23 أَخُونَا أَبْفُرَاسْ الْقَاعِدْ مَعَايِ فِي السِّجِنْ فِي شَانْ الْمَسِيحْ عِيسَى، هُو يِسَلِّمَكْ. 24 وَ مَعَايَهْ الْأَخْوَانْ الْيَخْدُمُوا مَعَايِ مَرْخُوسْ وَ أَرِسْتَارْكُسْ وَ دِيمَاسْ وَ لُوقَا.
25 عَلَيْكُمْ رَحْمَةْ الرَّبّ عِيسَى الْمَسِيحْ.
© La Bible en arabe tchadien © Alliance biblique du Tchad, 2019
