1 أَخَيْر فَقْرِي مَاشِي بِصَحِيحْ
مِنْ مَطْمُوسْ يِحَجِّي بِكِدِبْ.
2 النِّيَّةْ فِي الْخِدْمَةْ بَلَا مَعْرَفَةْ مَا عَدِيلَةْ
وَ الْعَجَلَةْ تَرْمِي سِيدْهَا فِي الْخَطَا.
3 نِفَاقْ الْإِنْسَانْ بَسْ يِتَلِّفْ دَرْبَهْ
وَ بَتَّانْ هُو يُقُمّ يَزْعَلْ ضِدّ اللّٰهْ.
4 الْغُنَى يِكَتِّرْ رُفْقَانَكْ
وَ لَاكِنْ الْفَقْرِي، رَفِيقَهْ كُلَ يَابَاهْ.
5 الْيَشْهَدْ بِكِدِبْ، مَا يَجْعَلَوْه بَرِي
وَ الْكَدَّابْ كُلَ مَا يَنْجَى.
6 بِكَلَامْ حَلُو،
نَاسْ كَتِيرِينْ يِقَرُّبُوا الْمَسَائِيلْ
وَ الْيَنْطِي الْهَدَايَا،
أَيِّ نَادُمْ يِرَافِقَهْ.
7 الْفَقْرِي، أَخْوَانَهْ يَابَوْه
وَ رُفْقَانَهْ كُلَ يِبَعُّدُوا مِنَّهْ.
كَنْ يِحَجِّي كَلَامَهْ كُلَ،
مَا فِي نَادُمْ يَسْمَعَهْ.
8 الْيَلْقَى الْحِكْمَةْ، يِحِبّ نَفْسَهْ
وَ الْيَحْفَضْ عَقْلَهْ، يَلْقَى الْخَيْر.
9 الْيَشْهَدْ بِكِدِبْ، مَا يَجْعَلَوْه بَرِي
وَ الْكَدَّابْ كُلَ يِدَّمَّرْ.
10 مَا بِشَابِهْ لِلْمَطْمُوسْ
يِعِيشْ فِي الرَّاحَةْ
وَ زِيَادَةْ مِنْ دَا،
كَنْ الْعَبِدْ يَحْكِمْ فِي الْمُلُوكْ.
11 الرُّوحْ الطَّوِيلَةْ إِلَّا لِلْعَاقْلِينْ.
الْإِنْسَانْ يِشَرِّفْ نَفْسَهْ
كَنْ يِلْحَمَّلْ خَطَا الْآخَرِينْ.
12 غَضَبْ الْمَلِكْ مِثِلْ قَرْقَرَانْ الدُّودْ
لَاكِنْ رِضَايَهْ مِثِلْ الْمَطَرْ لِلْقَشّ.
13 أَكْبَرْ مَصِيبَةْ لِلْأَبُو
كَنْ وِلَيْدَهْ مَطْمُوسْ
وَ الْمَرَةْ الْمُخَالِفَةْ
مِثِلْ نَقَّاطْ أَلْمِي.
14 الْبَيْت وَ الْمَالْ
يِنْلَقُوا وَرَثَةْ مِنْ الْأَبَّهَاتْ
وَ لَاكِنْ الزَّوْجَةْ الْمُوَافْقَةْ،
اللّٰهْ بَسْ يَنْطِيهَا.
15 الْكَسَلْ يِلِزّ فِي النَّوْم الشَّدِيدْ
وَ الْيِطَبِّقْ إِيدَيْنَهْ يُمُوتْ مِنْ الْجُوعْ.
16 الْحَفَضْ الْوَصِيَّةْ حَفَضْ نَفْسَهْ
وَ الطَّلَقْ الدَّرِبْ وَدَّرْ نَفْسَهْ.
17 الْمَحَنَّةْ فِي الْمِسْكِينْ دَيْن.
اللّٰهْ يِكَفِّيهْ لِسِيدَهْ.
18 أَدِّبْ وِلَيْدَكْ
وَكِتْ عِنْدَكْ عَشَمْ فَوْقَهْ
أَشَانْ إِنْتَ مَا تُكُونْ سَبَبْ مَوْتَهْ.
19 وَاجِبْ الزَّعَّالْ يِكَفِّي خَسَارَةْ فِعِلَهْ.
كَنْ قُلْت تِكَفِّي لَيَّهْ، يِسَوِّيهْ بَتَّانْ.
20 أَسْمَعْ الْوَصِيَّةْ وَ أَقْبَلْ الْأَدَبْ
أَشَانْ فِي الأَخِيرْ تَبْقَى حَكِيمْ.
21 الْإِنْسَانْ عِنْدَهْ أَهْدَافْ كَتِيرِينْ
وَ لَاكِنْ قَرَارْ اللّٰهْ هُو بَسْ الْيُكُونْ.
22 عَدِيلْ لِلْإِنْسَانْ يُكُونْ أَمِينْ.
أَخَيْر فَقْرِي مِنْ تُكُونْ كَدَّابْ.
23 الْخَوْف مِنْ اللّٰهْ
يِجِيبْ الْحَيَاةْ لِلْإِنْسَانْ.
أَيِّ مَصِيبَةْ مَا تَجِيهْ
وَ يُنُومْ بِأَمَانْ.
24 الْكَسْلَانْ يِدِسّ إِيدَهْ فِي الْقَدَحْ
لَاكِنْ لِخَشْمَهْ كُلَ مَا يَقْدَرْ يِجِيبْهَا.
25 أَضْرُبْ الشَّمَّاتِي،
الْجَاهِلْ يَلْقَى عَقُلْ.
لُومْ الْفَاهِمْ،
هُو يَلْقَى مَعْرَفَةْ.
26 الْيِتَعِّبْ أَبُوهْ وَ يَطْرُدْ أَمَّهْ
يِجِيبْ الْعَيْب وَ الشَّمَاتَةْ سَوَا.
27 يَا وِلَيْدِي، كَنْ مَا تَسْمَعْ الْوَصِيَّةْ
تِبَعِّدْ مِنْ كَلَامْ الْمَعْرَفَةْ.
28 الشَّاهِدْ الْمَا نَافِعْ يِشَّمَّتْ فِي الشَّرِيعَةْ
وَ لِسَانْ الْعَاصِي عِنْدَهْ إِلَّا الظُّلُمْ.
29 الْعِقَابْ ثَابِتْ لِلشَّمَّاتِينْ
وَ الْفَرِشْ لِضَهَرْ الْمُغَفَّلِينْ.
© La Bible en arabe tchadien © Alliance biblique du Tchad, 2019
