غِنَيْ، مَزْمُورْ لِدَاوُدْ
1 يَا رَبّ، قَلْبِي ثَابِتْ.
أَنَا نِغَنِّي لَيْك وَ نَمْدَحَكْ بِكُلَّ قَلْبِي، يَا اللّٰهْ!
2 أَقْعُدُوا وَاعِيِّينْ،
يَا أَمْ سِبَيْبَةْ وَ الْجِقِنْدِيَّةْ!
أَنَا نِوَعِّي الشَّقَاقْ.
3 يَا اللّٰهْ! أَنَا نَشْكُرَكْ فِي أُسْط الشُّعُوبْ
وَ نَمْدَحَكْ فِي أُسْط الْأُمَمْ.
4 أَشَانْ رَحْمَتَكْ كَبِيرَةْ مِنْ السَّمَاءْ
وَ أَمَانَكْ لِحِقْ لَحَدِّي السَّحَابْ.
5 يَا رَبّ، وَصِّفْ عَظَمَتَكْ فِي السَّمَاءْ
وَ وَصِّفْ مَجْدَكْ فِي كُلَّ الْأَرْض.
6 رُدّ لَيْنَا! وَ بِإِيدَكْ الزَّيْنَةْ، نَجِّينَا
أَشَانْ مَحْبُوبِينَكْ يَلْقَوْا النَّجَاةْ.
7 الرَّبّ كَلَّمْ فِي بَكَانَهْ الْمُقَدَّسْ:
«أَنَا نِنْبَسِطْ! وَ نِقَسِّمْ حِلَّةْ شَكِيمْ
وَ نِقَاوِسْ وَادِي سُكُّوتْ.
8 تُرَابْ قِلْعَادْ لَيِّ
وَ أَرْض مَنَسَّى كُلَ لَيِّ.
وَ أَرْض أَفْرَايِمْ مِثِلْ طَاقِيَّةْ التَّحْمِي رَاسِي
وَ بَلَدْ يَهُوذَا مِثِلْ عَصَاةْ مُلْكِي.
9 بَلَدْ مُوَابْ مِثِلْ مَاعُونْ بَرُودِي
وَ بَلَدْ أَدَوْم مِثِلْ بَكَانْ النَّزْقُلْ فَوْقَهْ نَعَالِي.
وَ ضِدّ بَلَدْ الْفِلِسْطِيِّينْ،
نِكَوْرِكْ كُرَوْرَاكْ الْحَرِبْ!»
10 يَاتُو الْيِوَدِّينِي لِلْمَدِينَةْ الْقَوِيَّةْ؟
يَاتُو الْيُقُودْنِي لَحَدِّي بَلَدْ أَدَوْم؟
11 مَا إِنْتَ، الْإِلٰـهْ الطَّرَدْتِنَا وَلَّا؟
مَا إِنْتَ، الرَّبّ الْأَبَى مَا يَمْرُقْ مَعَ عَسْكَرْنَا وَلَّا؟
12 تَعَالْ! سَاعِدْنَا ضِدّ عَدُونَا
أَشَانْ فَزَعْ الْإِنْسَانْ مَا مَضْمُونْ.
13 وَ لَاكِنْ مَعَ الرَّبّ، نَلْقَوْا الْقُدْرَةْ
وَ هُو بَسْ يِفَجِّقْ عُدْوَانَّا.
© La Bible en arabe tchadien © Alliance biblique du Tchad, 2019
