غِنَيْ هَنَا الْحَجّ لِمَدِينَةْ الْقُدُسْ
1 يَا اللّٰهْ، فِي ضِيقْتِي أَنَا كَوْرَكْت لَيْك.
2 يَا رَبّ، أَسْمَعْ حِسِّي.
خُطّ أَدَانَكْ لِصَوْتِي وَ أَقْبَلْ دُعَايِ.
3 يَا اللّٰهْ، كَنْ تِحَاسِبْ خَطَايَانَا،
يَا رَبّ، يَاتُو الْيَنْجَى؟
4 لَاكِنْ إِنْتَ عِنْدَكْ الْغُفْرَانْ
وَ فِي شَانْ دَا، نَخَافَوْا مِنَّكْ.
5 أَنَا نَرْجَى اللّٰهْ، نَرْجَاهْ بِكُلَّ قَلْبِي
وَ نِآمِنْ بِكَلَامَهْ.
6 وَ قَلْبِي يِحِبّ الرَّبّ
زِيَادَةْ مِنْ حُبّ الْحَرَسْ لِطَلُوعْ الْحَرَّايْ.
أَيْوَى، زِيَادَةْ مِنْ حُبّ الْحَرَسْ لِطَلُوعْ الْحَرَّايْ.
7 يَا بَنِي إِسْرَائِيلْ، خُطُّوا عَشَمْكُو فِي اللّٰهْ
أَشَانْ هُو عِنْدَهْ الرَّحْمَةْ وَ الْفِدَا الْكَامِلْ.
8 وَ هُو الْيَفْدَى بَنِي إِسْرَائِيلْ
مِنْ كُلَّ خَطَايَاهُمْ.
© La Bible en arabe tchadien © Alliance biblique du Tchad, 2019
