1 أَشْكُرُوا اللّٰهْ أَشَانْ هُو رَحِيمْ
وَ رَحْمَتَهْ دَايْمَةْ إِلَى الْأَبَدْ!
2 أَشْكُرُوا إِلٰـهْ الْإِلٰـهَاتْ،
أَشَانْ رَحْمَتَهْ دَايْمَةْ إِلَى الْأَبَدْ!
3 أَشْكُرُوا رَبّ الْأَرْبَابْ،
أَشَانْ رَحْمَتَهْ دَايْمَةْ إِلَى الْأَبَدْ!
4 هُو وِحَيْدَهْ يِسَوِّي عَجَايِبْ كُبَارْ،
أَشَانْ رَحْمَتَهْ دَايْمَةْ إِلَى الْأَبَدْ
5 وَ بِعِلْمَهْ هُو خَلَقْ السَّمَاوَاتْ،
أَشَانْ رَحْمَتَهْ دَايْمَةْ إِلَى الْأَبَدْ
6 وَ فَلَّ الْأَرْض مِنْ فَوْق لِلْأَلْمِي،
أَشَانْ رَحْمَتَهْ دَايْمَةْ إِلَى الْأَبَدْ.
7 هُو خَلَقْ الْأَنْوَارْ الْكُبَارْ،
أَشَانْ رَحْمَتَهْ دَايْمَةْ إِلَى الْأَبَدْ
8 الْحَرَّايْ التَّحْكِمْ فِي النَّهَارْ،
أَشَانْ رَحْمَتَهْ دَايْمَةْ إِلَى الْأَبَدْ
9 وَ الْقَمَرْ وَ النُّجُومْ لِيَحْكُمُوا فِي اللَّيْل،
أَشَانْ رَحْمَتَهْ دَايْمَةْ إِلَى الْأَبَدْ.
10 هُو ضَرَبْ أَوْلَادْ الْبِكِرْ هَنَا مَصِرْ،
أَشَانْ رَحْمَتَهْ دَايْمَةْ إِلَى الْأَبَدْ
11 وَ مَرَقْ بَنِي إِسْرَائِيلْ مِنْ مَصِرْ،
أَشَانْ رَحْمَتَهْ دَايْمَةْ إِلَى الْأَبَدْ
12 بِدُرَاعْ قَوِي وَ إِيدْ مَرْفُوعَةْ،
أَشَانْ رَحْمَتَهْ دَايْمَةْ إِلَى الْأَبَدْ.
13 هُو شَقَّ الْبَحَرْ الْأَحْمَرْ إِتْنَيْن،
أَشَانْ رَحْمَتَهْ دَايْمَةْ إِلَى الْأَبَدْ
14 وَ قَادْ بَنِي إِسْرَائِيلْ فِي أُسْطَهْ،
أَشَانْ رَحْمَتَهْ دَايْمَةْ إِلَى الْأَبَدْ
15 وَ طَمَّسْ فِرْعَوْن وَ عَسْكَرَهْ فِي لُبّ الْبَحَرْ،
أَشَانْ رَحْمَتَهْ دَايْمَةْ إِلَى الْأَبَدْ.
16 هُو قَادْ شَعَبَهْ فِي الصَّحَرَاء،
أَشَانْ رَحْمَتَهْ دَايْمَةْ إِلَى الْأَبَدْ
17 وَ ضَرَبْ مُلُوكْ قَوِيِّينْ،
أَشَانْ رَحْمَتَهْ دَايْمَةْ إِلَى الْأَبَدْ
18 وَ كَتَلْ مُلُوكْ عَظِيمِينْ،
أَشَانْ رَحْمَتَهْ دَايْمَةْ إِلَى الْأَبَدْ
19 سِيحُونْ مَلِكْ الْأَمُورِيِّينْ،
أَشَانْ رَحْمَتَهْ دَايْمَةْ إِلَى الْأَبَدْ
20 وَ عُوقْ مَلِكْ بَاشَانْ،
أَشَانْ رَحْمَتَهْ دَايْمَةْ إِلَى الْأَبَدْ.
21 اللّٰهْ أَنْطَى بَلَدْهُمْ وَرَثَةْ،
أَشَانْ رَحْمَتَهْ دَايْمَةْ إِلَى الْأَبَدْ
22 هِي وَرَثَةْ لِبَنِي إِسْرَائِيلْ عَبِيدَهْ،
أَشَانْ رَحْمَتَهْ دَايْمَةْ إِلَى الْأَبَدْ.
23 هُو فَكَّرْ فَوْقنَا وَكِتْ أَنِحْنَ تَعْبَانِينْ،
أَشَانْ رَحْمَتَهْ دَايْمَةْ إِلَى الْأَبَدْ
24 وَ قَلَعْنَا مِنْ عُدْوَانَّا،
أَشَانْ رَحْمَتَهْ دَايْمَةْ إِلَى الْأَبَدْ.
25 هُو يَنْطِي الْأَكِلْ لِكُلَّ الْمَخْلُوقِينْ،
أَشَانْ رَحْمَتَهْ دَايْمَةْ إِلَى الْأَبَدْ.
26 أَشْكُرُوا إِلٰـهْ السَّمَاوَاتْ،
أَشَانْ رَحْمَتَهْ دَايْمَةْ إِلَى الْأَبَدْ!
© La Bible en arabe tchadien © Alliance biblique du Tchad, 2019
