لِدَاوُدْ
1 يَا اللّٰهْ! أَنَا نَشْكُرَكْ بِكُلَّ قَلْبِي
وَ نَمْدَحَكْ قِدَّامْ قُوَّاتْ السَّمَاءْ.
2 نَسْجُدْ عَلَيْ بَيْتَكْ الْمُقَدَّسْ
وَ نِمَجِّدْ أُسْمَكْ
أَشَانْ رَحْمَتَكْ وَ أَمَانَكْ.
أَشَانْ إِنْتَ كَبَّرْت أُسْمَكْ وَ وَعَدَكْ
زِيَادَةْ مِنْ كُلِّ شَيّءْ.
3 يَوْم أَنَا نَادَيْتَكْ، إِنْتَ رَدَّيْت لَيِّ
وَ أَنْطَيْتنِي شَجَاعَةْ وَ قُدْرَةْ.
4 يَا اللّٰهْ، خَلِّي كُلَّ مُلُوكْ الْأَرْض يَشْكُرُوكْ
أَشَانْ سِمْعَوْا كَلَامْ خَشْمَكْ.
5 خَلِّي يِغَنُّوا حَسَبْ عَمَلْ اللّٰهْ:
«مَجْد اللّٰهْ كَبِيرْ.
6 اللّٰهْ قَاعِدْ فِي الْعَالِي وَ يِشِيفْ الْمِسْكِينْ
وَ مِنْ بَعِيدْ، يَعَرِفْ الْمُسْتَكْبِرْ.»
7 وَكِتْ أَنَا نَمْشِي فِي أُسْط الضِّيقَةْ،
إِنْتَ تِحَيِّينِي.
تِنَزِّلْ إِيدَكْ فِي عُدْوَانِي
وَ إِيدَكْ الزَّيْنَةْ تِنَجِّينِي.
8 اللّٰهْ يِتَمِّمْ كُلَّ شَيّءْ الْهُو بَدَا لَيِّ.
يَا اللّٰهْ، رَحْمَتَكْ دَايْمَةْ إِلَى الْأَبَدْ.
مَا تِخَلِّي أَعْمَالْ إِيدَيْنَكْ!
© La Bible en arabe tchadien © Alliance biblique du Tchad, 2019
