وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 يَا اللّٰهْ، خَلِّصْنِي مِنْ الرَّاجِلْ الْفَسِلْ
وَ أَحْفَضْنِي مِنْ سِيدْ الْعُنُفْ،
2 مِنْ هُمَّنْ الْيَنْوُوا الْفَسَالَةْ
وَ يِسَبُّبُوا الدُّوَاسْ كُلَّ يَوْم.
3 هُمَّنْ يِطَرُّقُوا لِسْنَيْهُمْ مِثِلْ دَابِي
وَ شَلَالِيفْهُمْ عِنْدُهُمْ سَمّ أَمْ شِدَيْقَاتْ. وَقْفَةْ.
4 يَا اللّٰهْ، أَحْفَضْنِي مِنْ إِيدْ الْعَاصِي
وَ أَحْمِينِي مِنْ سِيدْ الْعُنُفْ،
مِنْ هُمَّنْ الْعِنْدُهُمْ نِيَّةْ لِيَرْمُونِي.
5 الْمُسْتَكْبِرِينْ كَجَّوْا شَرَكْ وَ حُبَالْ لَيِّ
وَ مَدَّوْا شُرُكَّ وَ أَمْ كَجَّامَاتْ فِي طُولْ دَرْبِي. وَقْفَةْ.
6 وَ قُلْت لِلّٰهْ: «إِنْتَ إِلٰـهِي!
يَا اللّٰهْ، أَسْمَعْ حِسِّي هَنَا الشِّحْدَةْ.
7 يَا اللّٰهْ رَبِّي، إِنْتَ قُدُرْتِي وَ نَجَاتِي
وَ فِي يَوْم الْحَرِبْ، إِنْتَ حَمَيْتنِي.
8 يَا اللّٰهْ، مَا تِخَلِّي شَهْوَةْ الْعَاصِي تُكُونْ
وَ مَا تِخَلِّي خِطِّتَهْ تِلْحَقَّقْ وَ يُقُمّ. وَقْفَةْ.
9 «يَا اللّٰهْ، مَا تِخَلِّي نِيَّةْ الْفَسْلِينْ تِلْحَقَّقْ
وَ مَا تِخَلِّي خِطِّتْهُمْ تَنْجَحْ وَ يِحَاصُرُونِي.
10 خَلِّي يِتَّرْتَعَوْا فِي الْجَمُرْ وَ يَقَعَوْا فِي النَّارْ
وَ فِي نُقْرَةْ طَوِيلَةْ الْمَا يَمُرْقُوا مِنْهَا.
11 خَلِّي اللِّسَانَهْ طَوِيلْ مَا يَقْعُدْ فِي الْبَلَدْ
وَ الْفَسَالَةْ تِطَارِدْ سِيدْ الْعُنُفْ.»
12 يَا اللّٰهْ!
أَنَا نَعَرِفْ كَدَرْ تِحَاكِمْ بِالْعَدِلْ لِلْمَظْلُومْ
وَ تِدَافِعْ لِحُقُوقْ الْمَسَاكِينْ.
13 أَيْوَى، الصَّالِحِينْ يَشْكُرُوا أُسْمَكْ
وَ الْعَدِيلِينْ يَسْكُنُوا فِي حَضَرَتَكْ.
© La Bible en arabe tchadien © Alliance biblique du Tchad, 2019
