تَعْلِيمْ مِنْ دَاوُدْ، وَكِتْ هُو قَاعِدْ فِي لُبّ الْكَرْكُورْ، صَلَاةْ
1 أَنَا رَفَعْت حِسِّي وَ صَرَخْت لِلّٰهْ
أَيْوَى، أَنَا رَفَعْت حِسِّي وَ شَحَدْتَهْ.
2 قِدَّامَهْ هُو، أَنَا جِبْت شَكْوِتِي
وَ قِدَّامَهْ هُو، أَنَا حَجَّيْت بِضِيقْتِي.
3 يَا اللّٰهْ! وَكِتْ تَغْمَرْ رُوحِي،
إِنْتَ تَعَرِفْ دَرْبِي.
فِي دَرْبِي النَّمْشِي فَوْقَهْ،
كَجَّوْا لَيِّ شَرَكْ.
4 أَنْظُرْ بِالزَّيْنَةْ وَ شِيفْ!
مَا فِي نَادُمْ الْيَعَرِفْنِي
وَ مَا فِي مَلْجَأْ لَيِّ
وَ مَا فِي الْيِهِمّ بِحَيَاتِي.
5 يَا اللّٰهْ! أَنَا كَوْرَكْت لَيْك
وَ قُلْت: «إِنْتَ بَسْ مَلْجَئِي!
وَ فِي أَرْض الْحَيِّينْ،
إِنْتَ بَسْ قِسْمِي!»
6 أَسْمَعْ سُؤَالِي
أَشَانْ أَنَا ضِعِفْت مَرَّةْ وَاحِدْ.
نَجِّينِي مِنْ الْيِطَارُدُونِي
أَشَانْ هُمَّنْ شُدَادْ مِنِّي!
7 أَمْرُقْنِي مِنْ السِّجِنْ
أَشَانْ نَشْكُرْ أُسْمَكْ.
وَ الصَّالِحِينْ يِحَوُّقُونِي
وَكِتْ إِنْتَ تِسَوِّي لَيِّ الْخَيْر.
© La Bible en arabe tchadien © Alliance biblique du Tchad, 2019
