1 الْحَمْدُ للّٰهْ!
أَيْوَى، عَدِيلْ كَنْ نِغَنُّوا لِإِلٰـهْنَا
وَ حَلُو وَ سَمَحْ لِنَحْمُدُوهْ.
2 اللّٰهْ يَبْنِي مَدِينَةْ الْقُدُسْ بَتَّانْ
وَ يِلِمّ بَنِي إِسْرَائِيلْ الْمُشَتَّتِينْ.
3 هُو يَشْفِي الْقَلِبْهُمْ مَجْرُوحْ
وَ يِعَالِجْ وَجَعْهُمْ.
4 هُو يَحْسِبْ عَدَدْ النُّجُومْ
وَ لِكُلِّ وَاحِدَةْ يَنْطِي أُسُمْ.
5 رَبِّنَا هُو كَبِيرْ وَ قُدُرْتَهْ كُلَ كَتِيرَةْ
وَ عِلْمَهْ مَا عِنْدَهْ حَدّ.
6 اللّٰهْ يِسَاعِدْ الْمَسَاكِينْ
وَ يَرْمِي الْعَاصِيِينْ فِي التُّرَابْ.
7 غَنُّوا لِلّٰهْ بِشُكُرْ
وَ أَضُرْبُوا لِإِلٰـهْنَا الْجِقِنْدِيَّةْ.
8 دَا هُو الْيَمْلَا السَّمَاءْ بِالسَّحَابْ
وَ يِجَهِّزْ الْمَطَرَةْ وَ يِنَزِّلْهَا فِي التُّرَابْ
وَ يِقَوِّمْ الْقَشّ فِي الْجِبَالْ.
9 هُو يَنْطِي أَكِلْ لِلْبَهَايِمْ
وَ لِعِيَالْ الْغُرَابْ وَكِتْ يَبْكُوا.
10 قُدْرَةْ الْجُوَادْ مَا تَعَجِبَهْ
وَ بِمَنَعْ الرَّاجِلْ، مَا لَمَّاهْ.
11 لَاكِنْ اللّٰهْ يَفْرَحْ بِالْيَخَافَوْا مِنَّهْ
وَ الْيُخُطُّوا عَشَمْهُمْ فِي رَحْمَتَهْ.
12 يَا مَدِينَةْ الْقُدُسْ، مَجِّدِي اللّٰهْ!
أَيْوَى، يَا صَهْيُون، أَحْمُدِي إِلٰـهْكِ!
13 أَشَانْ هُو قَوَّى حَوَادِرْ بِيبَانْكِ
وَ بَارَكْ أَوْلَادْكِ فِي أُسُطْكِ.
14 هُو يِثَبِّتْ السَّلَامْ فِي أَرْضِكِ
وَ بِأَفْضَلْ قَمَحْ، يَشْبِعْكِ.
15 هُو يِرَسِّلْ كَلَامَهْ فِي الْأَرْض
وَ كَلَامَهْ يَجْرِي بِسُرْعَةْ.
16 هُو يَفْرُشْ التَّلَجْ مِثِلْ قُطُنْ
وَ يِشَتِّتْ الْكَرَنْج مِثِلْ رُمَادْ.
17 هُو يِنَزِّلْ الْبَرَدْ مِثِلْ حَصْحَصْ
وَ يَاتُو يَقْدَرْ يَحْمَلْ بَرْدَهْ؟
18 هُو يِرَسِّلْ كَلَامَهْ وَ يِمَوِّعْهُمْ
وَ يَنْفُخْ الرِّيحْ وَ الْأَلْمِي يَجْرِي.
19 اللّٰهْ يِكَلِّمْ كَلَامَهْ لِذُرِّيَّةْ يَعْقُوبْ
أَيْوَى، لِبَنِي إِسْرَائِيلْ يُقُولْ قَوَانِينَهْ وَ شُرُوطَهْ.
20 وَ دَا، هُو مَا سَوَّاهْ لِأَيِّ أُمَّةْ
وَ الْأُمَمْ مَا يَعَرْفُوا شُرُوطَهْ.
الْحَمْدُ للّٰهْ!
© La Bible en arabe tchadien © Alliance biblique du Tchad, 2019
