مَزْمُورْ لِدَاوُدْ
1 لِلّٰهْ الْأَرْض وَ كُلَّ شَيّءْ الْفَوْقهَا
وَ لَيَّهْ هُو الْعَالَمْ وَ السَّاكْنِينْ فَوْقَهْ.
2 أَشَانْ هُو أَسَّسْ الْأَرْض فِي الْبُحُورْ
وَ ثَبَّتْهَا فِي الْأَلْمِي.
3 يَاتُو عِنْدَهْ حَقّ يَطْلَعْ جَبَلْ اللّٰهْ؟
وَ يَاتُو يَقِيفْ فِي بَكَانَهْ الْمُقَدَّسْ؟
4 إِلَّا نَادُمْ الْإِيدَيْنَهْ بَرِيِّينْ
وَ قَلْبَهْ نَضِيفْ.
إِلَّا هُو الْمَا يِوَدِّي نَفْسَهْ فِي الْكِدِبْ
وَ مَا يَحْلِفْ لِيُغُشّ.
5 النَّادُمْ دَا يَلْقَى بَرَكَةْ اللّٰهْ
أَيْوَى، يَلْقَى عَدَالَةْ مِنْ إِلٰـهَهْ الْيِنَجِّيهْ.
6 النَّاسْ الْيِفَتُّشُوا وِجْهَكْ،
هُمَّنْ مِثِلْ دَا، يَا اللّٰهْ.
أَيْوَى، الْيِوَجُّهُوا عَلَيْك،
دَوْل ذُرِّيَّةْ يَعْقُوبْ. وَقْفَةْ.
7 أَنْفَتْحُوا، يَا بِيبَانْ!
أَنْفَتْحُوا، يَا مَدَاخِلْ الدَّايْمِينْ!
وَ خَلِّي يَدْخُلْ فَوْقكُو الْمَلِكْ الْعَظِيمْ.
8 يَاتُو الْمَلِكْ الْعَظِيمْ؟
هُو اللّٰهْ الْقَوِي وَ الشَّدِيدْ،
اللّٰهْ الشَّدِيدْ فِي الْحَرِبْ.
9 أَنْفَتْحُوا، يَا بِيبَانْ!
أَنْفَتْحُوا، يَا مَدَاخِلْ الدَّايْمِينْ!
وَ خَلِّي يَدْخُلْ فَوْقكُو
الْمَلِكْ الْعَظِيمْ.
10 يَاتُو الْمَلِكْ الْعَظِيمْ؟
هُو اللّٰهْ الْقَادِرْ،
هُو الْمَلِكْ الْعَظِيمْ. وَقْفَةْ.
© La Bible en arabe tchadien © Alliance biblique du Tchad, 2019
