لِدَاوُدْ
1 أَحْكِمْ لَيِّ، يَا اللّٰهْ!
أَشَانْ أَنَا مَاشِي بِنِيَّةْ مُخْلِصَةْ
وَ مُتَوَكِّلْ عَلَيْ اللّٰهْ
وَ أَبَداً مَا نَقَعْ.
2 أَكْشِفْنِي، يَا اللّٰهْ، وَ جَرِّبْنِي
وَ صَفِّي قَلْبِي وَ فِكْرِي.
3 أَشَانْ رَحْمَتَكْ قَاعِدَةْ قِدَّامْ عُيُونِي
وَ أَنَا مَاشِي حَسَبْ أَمَانَكْ.
4 أَنَا مَا مَشَيْت قَعَدْ مَعَ الْمَا نَافْعِينْ
وَ لَا دَخَلْت مَعَ الْمُنَافِقِينْ.
5 أَنَا كِرِهْت جَمَاعَةْ الْيِسَوُّوا الْفَسَالَةْ
وَ مَا قَعَدْت مَعَ الْعَاصِيِينْ.
6 أَنَا أَلْوَضَّيْت. أَنَا بَرِي!
وَ حَوَّقْت مَدْبَحَكْ، يَا اللّٰهْ،
7 أَشَانْ أَنَا نِكَلِّمْ بِشُكْرِي
وَ نِبَلِّغْ بِكُلَّ عَجَايْبَكْ.
8 يَا اللّٰهْ! أَنَا نِحِبّ مَسْكَنْ بَيْتَكْ
الْبَكَانْ الْفَوْقَهْ مَجْدَكْ.
9 مَا تِلِمِّنِي مَعَ الْمُذْنِبِينْ
وَ مَا تَرْبُطْنِي مَعَ كَتَّالِينْ الدِّمَمْ،
10 هُمَّنْ الْفِي إِيدَيْهُمْ الْفَسَالَةْ
وَ إِيدْهُمْ الزَّيْنَةْ مَلَانَةْ بِالرَّشْوَةْ.
11 أَنَا مَاشِي بِنِيَّةْ مُخْلِصَةْ،
أَفْدَانِي بِرَحْمَتَكْ!
12 رِجِلَيْنِي قَاعِدِينْ فِي أَرْض مُسْتَوِيَةْ
وَ نَحْمُدْ اللّٰهْ فِي الْمَجْمُوعَاتْ.
© La Bible en arabe tchadien © Alliance biblique du Tchad, 2019
