لِدَاوُدْ
1 يَا اللّٰهْ! أَنَا نَادَيْتَكْ، إِنْتَ مَلْجَئِي.
مَا تَابَى، أَسْمَعْنِي!
أَشَانْ كَنْ أَبَيْت وَ مَا تَسْمَعْنِي،
أَنَا نَبْقَى مِثِلْ الْيَنْزُلُوا فِي الْقُبُورْ.
2 أَسْمَعْ شِحِدْتِي وَ كُرَوْرَاكِي
وَكِتْ نَرْفَعْ إِيدَيْنِي عَلَيْ بَيْتَكْ الْمُقَدَّسْ.
3 مَا تَحْسِبْنِي مَعَ الْعَاصِيِينْ وَ مَعَ الْفَسْلِينْ
الْيِحَجُّوا لِأَخْوَانْهُمْ بِسَلَامْ
لَاكِنْ قُلُوبْهُمْ مَلَانِينْ بِشَرّ.
4 عَاقِبْهُمْ حَسَبْ عَمَلْهُمْ
وَ حَسَبْ عَمَلْهُمْ الْفَسِلْ.
وَ عَاقِبْهُمْ حَسَبْ خِدْمَةْ إِيدَيْهُمْ
وَ جَازِيهُمْ حَسَبْ الْوَاجِبْ لَيْهُمْ!
5 أَشَانْ هُمَّنْ مَا يِفَكُّرُوا فِي عَمَلْ اللّٰهْ
وَ لَا فِي خِدْمَةْ إِيدَيْنَهْ.
خَلِّي اللّٰهْ يِدَمِّرْهُمْ
مِثِلْ بَيْت الْهَدَّمَوْه
وَ بَتَّانْ مَا يِنْبَنِي!
6 بَارَكْ اللّٰهْ
أَشَانْ هُو سِمِعْ حِسّ مُنَادَاتِي.
7 اللّٰهْ هُو مَلْجَئِي
وَ دَرَقَتِي.
قَلْبِي أَتْوَكَّلْ عَلَيَّهْ
وَ أَنَا لِقِيتْ الْفَزَعْ.
أَنَا نَفْرَحْ بَيَّهْ بِكُلَّ قَلْبِي
وَ نَشْكُرَهْ بِغِنَيْ.
8 اللّٰهْ هُو قُدْرَةْ شَعَبَهْ
وَ هُو مَلْجَأْ الْقَوِي
لِيِنَجِّي الْمَلِكْ
الْهُو مَسَحَهْ وَ دَرَّجَهْ.
9 يَا رَبّ، نَجِّي شَعَبَكْ!
هُمَّنْ الْوَرَثَتَكْ، بَارِكْهُمْ.
أَبْقَى رَاعِيهُمْ
وَ فَكِّرْ فَوْقهُمْ إِلَى الْأَبَدْ.
© La Bible en arabe tchadien © Alliance biblique du Tchad, 2019
