تَعْلِيمْ مِنْ دَاوُدْ
1 مَبْرُوكْ لِلنَّادُمْ
الْاللّٰهْ مَرَقْ مِنَّهْ عِصْيَانَهْ
وَ غَفَرْ لَيَّهْ ذُنُوبَهْ.
2 مَبْرُوكْ لِلنَّادُمْ
الْاللّٰهْ مَا يَجْعَلَهْ خَاطِي
وَ مَا عِنْدَهْ خِيَانَةْ فِي قَلْبَهْ.
3 وَكِتْ مَا أَعْتَرَفْت بِذَنْبِي،
الْوَجَعْ زَادْ فِي عُضَامِي
وَ قَنَتّْ طُولْ الْيَوْم.
4 أَشَانْ طُولْ اللَّيْل وَ النَّهَارْ،
نِحِسّ بِتُقُلْ إِيدَكْ فَوْقِي
وَ بِقِيتْ مِثِلْ الْقَشّ الْيَابِسْ،
قُدْرَةْ مَا عِنْدِي. وَقْفَةْ.
5 وَ خَلَاصْ، أَنَا كَلَّمْت لَيْك بِذَنْبِي
وَ مَا لَبَّدْت خَطَايِ.
وَ قُلْت: «يَا رَبّ، أَنَا أَعْتَرَفْت بِعِصْيَانِي.»
وَ إِنْتَ، يَا اللّٰهْ،
غَفَرْت لَيِّ خَطَايِ وَ ذَنْبِي. وَقْفَةْ.
6 أَشَانْ دَا، كُلَّ مُؤمِنْ وَاجِبْ يَسْأَلَكْ فِي وَكْت الضِّيقَةْ
وَ بَيْدَا، هُو يَنْجَى أَكِيدْ مِنْ الْغَرَقْ الشَّدِيدْ.
7 إِنْتَ مَلْجَئِي وَ فِي الضِّيقَةْ تَحْمِينِي
وَ بِغِنَيْ النَّجَاةْ، مَلَيْت قَلْبِي. وَقْفَةْ.
8 وَ اللّٰهْ قَالْ: «نَعَمْ. أَنَا نِعَلِّمَكْ
وَ نِوَصِّفَكْ الطَّرِيقْ التِّشِيلَهْ
وَ نِوَصِّيكْ وَ نِفَكِّرْ فِيكْ.
9 مَا تَبْقَى مِثِلْ الْجُوَادْ أَوْ الْبَغَلْ الْمَا يَفْهَمْ
وَ مَا يَقِيفْ إِلَّا بِالصَّرِيمَةْ وَ اللِّجَامْ.
وَ بَلَاهُمْ مَا يَتْبَعَكْ.»
10 الْعَذَابْ الزِّيَادَةْ يَرْجَى الْعَاصِي
وَ لَاكِنْ الْعِنْدَهْ فِي اللّٰهْ ضَمَانْ يَلْقَى الْأَمَانْ.
11 أَفْرَحَوْا بِاللّٰهْ وَ غَنُّوا، يَا الصَّالِحِينْ!
وَ وَصُّفُوا فَرَحْكُو، يَا الْعَادِلِينْ!
© La Bible en arabe tchadien © Alliance biblique du Tchad, 2019
