1 يَا الصَّالِحِينْ! زَغْرُطُوا لِلّٰهْ مِنْ الْفَرَحْ!
حَمْد اللّٰهْ يِوَافِقْ مَعَ النَّاسْ الْعَدِيلِينْ.
2 أَشْكُرُوا اللّٰهْ بِجِقِنْدِيَّةْ
وَ غَنُّوا لَيَّهْ بِأَمْ سِبَيْبَةْ
الْعِنْدَهَا عَشَرَةْ حَبِلْ!
3 غَنُّوا لَيَّهْ غِنَيْ جَدِيدْ!
غَنُّوا عَدِيلْ بِآلَاتْ وَ زَغْرَاطْ.
4 أَشَانْ كَلَامْ اللّٰهْ عَدِيلْ
وَ كُلَّ خِدِمْتَهْ بِصِدِقْ.
5 هُو يِحِبّ الْحَقّ وَ الْعَدَالَةْ
وَ رَحْمَةْ اللّٰهْ مَلَتْ الْأَرْض.
6 بِكِلْمِتَهْ، اللّٰهْ خَلَقْ السَّمَاوَاتْ
وَ بِنَفْخَةْ وَاحِدَةْ، خَلَقْ كُلَّ قُوَّاتْهُمْ.
7 هُو جَمَعْ أَلْمِي الْبَحَرْ فِي بَكَانْ وَاحِدْ
وَ لَمَّ أَلْمِي الْمُحِيطَاتْ فِي خَزَّانْ.
8 خَلِّي كُلَّ سُكَّانْ الْأَرْض يَخَافَوْا اللّٰهْ
وَ كُلَّ نَاسْ الدُّنْيَا يَرْجُفُوا قِدَّامَهْ!
9 أَشَانْ بِكِلْمِتَهْ، كُلَّ شَيّءْ كَانْ
وَ بِأَمْرَهْ، كُلَّ شَيّءْ بِقِي.
10 اللّٰهْ نَقَضْ قَرَارْ الْأُمَمْ
وَ فَشَّلْ خِطَّةْ الشُّعُوبْ.
11 قَرَارْ اللّٰهْ قَاعِدْ إِلَى الْأَبَدْ
وَ خِطِّتَهْ مِنْ ذُرِّيَّةْ لِذُرِّيَّةْ.
12 مَبْرُوكْ لِلْأُمَّةْ الْإِلٰـهَّا اللّٰهْ
وَ الشَّعَبْ الْهُو عَزَلَهْ مِثِلْ وَرَثَتَهْ.
13 مِنْ السَّمَاوَاتْ، اللّٰهْ يَنْظُرْ
وَ يِشِيفْ كُلَّ النَّاسْ.
14 وَ مِنْ عَرْشَهْ،
هُو يِشِيفْ كُلَّ سُكَّانْ الْأَرْض.
15 هُو بَسْ الْخَلَقْ قُلُوبْهُمْ كُلُّهُمْ
وَ قَاعِدْ يَفْهَمْ كُلَّ خِدْمِتْهُمْ.
16 كَتَرَةْ الدَّيْش مَا تَفْزَعْ الْمَلِكْ
وَ الْقُوَّةْ الشَّدِيدَةْ مَا تِنَجِّي الْفَحَلْ.
17 الْكَدَّابْ يُقُولْ:
«الْجُوَادْ يِجِيبْ النَّصُرْ!»
وَ لَاكِنْ قُدُرْتَهْ الزِّيَادَةْ كُلَ
مَا تِنَجِّي سِيدَهْ.
18 وَ لَاكِنْ عَيْن اللّٰهْ قَاعِدَةْ تِشِيفْ الْيَخَافَوْا مِنَّهْ،
هُمَّنْ الْعِنْدُهُمْ عَشَمْ فِي رَحْمَتَهْ.
19 وَ دَا، لِيِنَجِّيهُمْ مِنْ الْمَوْت
وَ يَحْفَضْ حَيَاتْهُمْ فِي وَكْت الْجُوعْ.
20 وَ أَنِحْنَ كُلَ نَرْجَوْا اللّٰهْ
أَشَانْ هُو مُسَاعِدْنَا وَ دَرَقَتْنَا.
21 أَشَانْ مِنَّهْ هُو، جَايِ فَرَحْ قُلُوبْنَا
وَ عَلَيْ أُسْمَهْ الْمُقَدَّسْ، أَتْوَكَّلْنَا.
22 يَا اللّٰهْ، خَلِّي رَحْمَتَكْ تُكُونْ فَوْقنَا
مِثِلْ عَشَمْنَا قَاعِدْ فَوْقَكْ!
© La Bible en arabe tchadien © Alliance biblique du Tchad, 2019
