لِدَاوُدْ
1 مَا تَزْعَلْ ضِدّ الْفَسْلِينْ
وَ مَا تَحْسِدْ الْيِسَوُّوا الْفَسَالَةْ.
2 أَشَانْ هُمَّنْ مِثِلْ الْقَشّ الْيَمْرَضْ عَجَلَةْ
وَ مِثِلْ الزِّرَاعَةْ التَّيْبَسْ.
3 أَتْوَكَّلْ عَلَيْ اللّٰهْ وَ سَوِّي الْخَيْر
وَ فِي الْبَلَدْ، تَسْكُنْ بِأَمَانْ.
4 وَ مَعَ اللّٰهْ، تَلْقَى كُلَّ شَيّءْ سَمَحْ
وَ هُو يَنْطِيكْ طَلَبَاتْ قَلْبَكْ.
5 وَجِّهْ خَطْوَاتَكْ عَلَيْ اللّٰهْ
وَ أَتْوَكَّلْ عَلَيَّهْ
وَ هُو يِسَوِّي لَيْك كُلَّ شَيّءْ.
6 هُو يِبَيِّنْ عَدَالْتَكْ مِثِلْ النُّورْ
وَ حُقُوقَكْ مِثِلْ نُورْ الْقَايْلَةْ.
7 أَقْعُدْ سَاكِتْ قِدَّامْ اللّٰهْ
وَ خُطّ عَشَمَكْ فَوْقَهْ.
وَ مَا تَزْعَلْ ضِدّ الْيَنْجَحْ فِي طَرِيقَهْ
وَ لَا ضِدّ النَّادُمْ الْيِسَوِّي مُؤآمَرَةْ.
8 خَلِّي الزَّعَلْ وَ آبَى الْغَضَبْ
وَ مَا تَغْضَبْ شَدِيدْ لَحَدِّي تِسَوِّي الْفَسَالَةْ.
9 أَشَانْ الْفَسْلِينْ، يَفْصُلُوهُمْ
وَ لَاكِنْ الْيُخُطُّوا عَشَمْهُمْ فِي اللّٰهْ يَوْرُثُوا الْأَرْض.
10 بَعَدْ شِيَّةْ، الْعَاصِي يَبْقَى مَا فِيهْ.
كَنْ تِفَتِّشَهْ فِي بَكَانَهْ،
مَا تَلْقَاهْ فِي أَيِّ بَكَانْ.
11 وَ لَاكِنْ الْمَسَاكِينْ يَوْرُثُوا الْأَرْض
وَ يَفْرَحَوْا بِسَلَامْ كَتِيرْ.
12 الْعَاصِي يِخَطِّطْ ضِدّ الصَّالِحْ
وَ ضِدَّهْ هُو، يِعَضِّي سُنُونَهْ.
13 وَ لَاكِنْ الرَّبّ يَضْحَكْ لَيَّهْ
أَشَانْ هُو يَعَرِفْ كَدَرْ يَوْمَهْ يَجِي.
14 الْعَاصِيِينْ يَرْفَعَوْا السَّيْف
وَ يَجْبُدُوا النُّبَّالْ
لِيَرْمُوا الْمَظْلُومْ وَ الْمِسْكِينْ،
لِيَدْبَحَوْا الْمَاشِينْ فِي الدَّرِبْ الْعَدِيلْ.
15 وَ لَاكِنْ سَيْفهُمْ يِقَبِّلْ يَطْعَنْهُمْ فِي قُلُوبْهُمْ
وَ نُبَّالْهُمْ يِلْكَسَّرْ.
16 الشِّيَّةْ هَنَا الصَّالِحْ
أَخَيْر مِنْ الْكَتَرَةْ هَنَا الْعَاصِيِينْ.
17 أَشَانْ إِيدَيْن الْعَاصِيِينْ يِلْكَسَّرَوْا
وَ لَاكِنْ اللّٰهْ يِسَاعِدْ الصَّالِحِينْ.
18 اللّٰهْ يَحْفَضْ أَيَّامْ الصَّالِحِينْ
وَ وَرَثَتْهُمْ تَقْعُدْ إِلَى الْأَبَدْ.
19 وَ فِي شَانَهْ هُو، مَا يَلْقَوْا عَيْب فِي وَكْت الْمَصِيبَةْ
وَ فِي أَيَّامْ الْجُوعْ، هُمَّنْ يَشْبَعَوْا.
20 لَاكِنْ الْفَسْلِينْ يُمُوتُوا
أَيْوَى، عُدْوَانْ اللّٰهْ يِدَّمَّرَوْا مِثِلْ نُوَّارْ الْكَدَادَةْ
وَ يُفُوتُوا مِثِلْ الدُّخَّانْ الْيَبْقَى مَا فِيهْ.
21 الْعَاصِي يِدَّيَّنْ وَ مَا يِكَفِّي
وَ الصَّالِحْ يِحِنّ وَ يَنْطِي.
22 أَيْوَى، الْيِبَارِكْهُمْ اللّٰهْ يَوْرُثُوا الْبَلَدْ
وَ النَّاسْ الْهُو يَلْعَنْهُمْ، يَفْصُلُوهُمْ.
23 وَ بِاللّٰهْ، خَطْوَاتْ النَّادُمْ يَبْقَوْا ثَابْتِينْ
وَ هُو يَبْقَى فَرْحَانْ بِدَرْبَهْ.
24 وَ كَنْ أَتَّرْتَعْ كُلَ، مَا يَقَعْ
أَشَانْ اللّٰهْ كَارِبْ إِيدَهْ.
25 أَنَا كُنْت صَبِي وَ لَحَدِّي شَيَّبْت
وَ مَا شِفْت صَالِحْ الْاللّٰهْ أَبَاهْ
وَ لَا ذُرِّيّتَهْ شَحَدَوْا أَكِلْ.
26 كُلَّ يَوْم الْعَادِلْ يِحِنّ وَ يِسَاعِدْ
وَ ذُرِّيّتَهْ مُبَارَكَةْ.
27 بَعِّدْ مِنْ الْفَسَالَةْ وَ سَوِّي الْخَيْر
وَ إِنْتَ تَسْكُنْ الْبَلَدْ كُلَّ أَيَّامْ حَيَاتَكْ.
28 أَشَانْ اللّٰهْ يِحِبّ الْعَدَالَةْ
وَ مَا يَابَى الْآمَنَوْا بَيَّهْ.
هُو يَحْفَضْهُمْ دَايْماً
وَ لَاكِنْ ذُرِّيَّةْ الْعَاصِيِينْ، يَفْصُلُوهُمْ.
29 الصَّالِحِينْ يَوْرُثُوا الْأَرْض
وَ يَسْكُنُوا فَوْقهَا إِلَى الْأَبَدْ.
30 خَشُمْ الصَّالِحْ دَايْماً يُقُولْ الْحِكْمَةْ
وَ لِسَانَهْ يَنْطَقْ بِالْحَقّ.
31 وَ تَوْرَاةْ رَبَّهْ قَاعِدْ فِي قَلْبَهْ
وَ خَطْوَاتَهْ مَا يِتَّرْتَعَوْا.
32 الْعَاصِيِينْ يِرَاقُبُوا الصَّالِحْ
وَ يِفَتُّشُوا طَرِيقَةْ الْيَكْتُلُوهْ بَيْهَا.
33 وَ لَاكِنْ اللّٰهْ مَا يِخَلِّيهْ فِي إِيدَيْهُمْ
وَ مَا يَرْضَى يِحَاكُمُوهْ
كَنْ وَدَّوْه الشَّرِيعَةْ كُلَ.
34 خُطّ عَشَمَكْ فِي اللّٰهْ وَ أَحْفَضْ دَرْبَكْ،
هُو يِعَظِّمَكْ وَ يَنْطِيكْ الْبَلَدْ مِثِلْ وَرَثَةْ
وَ إِنْتَ تِشِيفْ وَكِتْ الْعَاصِيِينْ يَفْصُلُوهُمْ.
35 أَنَا شِفْت الْعَاصِي سِيدْ الْعُنُفْ
زَادْ مِثِلْ شَدَرَةْ خَضْرَةْ.
36 وَ لَاكِنْ هُو فَاتْ وَ بِقِي مَا فِيهْ
وَ أَنَا فَتَّشْتَهْ وَ مَا لِقِيتَهْ.
37 شِيفْ النَّادُمْ التَّمَامْ
أَيْوَى، شِيفْ النَّادُمْ الصَّالِحْ.
سِيدْ السَّلَامْ
عِنْدَهْ مُسْتَقْبَلْ طَوِيلْ.
38 وَ لَاكِنْ الْعَاصِيِينْ يِدَّمَّرَوْا سَوَا
وَ مُسْتَقْبَلْ سِيَادْ الْفَسَالَةْ مَا فِيهْ.
39 نَجَاةْ الصَّالِحِينْ جَايَةْ مِنْ اللّٰهْ،
هُو مَلْجَئْهُمْ فِي وَكْت الضِّيقَةْ.
40 اللّٰهْ يَفْزَعْهُمْ وَ يِنَجِّيهُمْ،
أَيْوَى، يِنَجِّيهُمْ مِنْ الْعَاصِيِينْ وَ يَفْزَعْهُمْ
أَشَانْ الْعَدِيلِينْ يَلْجَأَوْا لَيَّهْ هُو.
© La Bible en arabe tchadien © Alliance biblique du Tchad, 2019
