وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 أَنَا خَطَّيْت كُلَّ عَشَمِي فِي اللّٰهْ
وَ هُو وَجَّهْ عَلَيِّ
وَ سِمِعْ صِرَاخِي لِلْفَزَعْ.
2 هُو مَرَقَانِي مِنْ نُقْرَةْ الْهَلَاكْ
وَ مِنْ الْوَحَلَةْ وَ الْأَمْ ظَحَلَوْطَةْ.
هُو وَقَّفَانِي بِطُولِي فِي الْحَجَرْ
وَ ثَبَّتْ خَطْوَاتِي.
3 هُو خَطَّ فِي خَشْمِي غِنَيْ جَدِيدْ،
غِنَيْ هَنَا شُكُرْ لِإِلٰـهْنَا.
كَتِيرْ يِشِيفُوا وَ يَخَافَوْا
وَ يِتْوَكَّلَوْا عَلَيْ اللّٰهْ.
4 مَبْرُوكْ لِلنَّادُمْ الْيِتْوَكَّلْ عَلَيْ اللّٰهْ
وَ مَا يِنْلَفِتْ لِلْمُسْتَكْبِرِينْ وَ الْكَدَّابِينْ.
5 يَا اللّٰهْ إِلٰـهِي!
إِنْتَ سَوَّيْت لَيْنَا عَجَايِبْ
وَ حَقَّقْت أَهْدَافْ كَتِيرِينْ
وَ مَا فِي نَادُمْ الْيِسَاوِيكْ.
أَنَا نِدَوْر نِحَجِّي بِعَجَايْبَكْ وَ نِبَلِّغْهُمْ
لَاكِنْ هُمَّنْ كَتِيرِينْ مَا بِنْحَسْبُوا.
6 إِنْتَ مَا دَوَّرْت وَ لَا ضَحِيَّةْ وَ لَا هَدِيَّةْ
وَ لَاكِنْ فَتَحْت أُدْنَيِّ لِنَفْهَمْ.
إِنْتَ مَا طَلَبْت ضَحَايَا مُحَرَّقِينْ
وَ لَا ضَحَايَا لِكَفَّارَةْ الذَّنِبْ.
7 خَلَاصْ، أَنَا قُلْت: «دَاهُو أَنَا جِيتْ!
أَنَا جِيتْ بِكِتَابْ مَلْفُوفْ الْكَتَبَوْه لَيِّ.»
8 يَا إِلٰـهِي! أَنَا نِسَوِّي رِضَاكْ وَ نَفْرَحْ
وَ نَحْفَضْ تَوْرَاتَكْ فِي دَاخَلْ قَلْبِي.
9 نِبَشِّرْ بِعَدَالْتَكْ لِمُجْتَمَعْ كَبِيرْ.
يَا اللّٰهْ، شِيفْ! أَنَا مَا نَسْكُتْ، إِنْتَ تَعَرْفَهْ.
10 أَنَا مَا لَبَّدْت عَدَالْتَكْ فِي دَاخَلْ قَلْبِي
وَ لَاكِنْ حَجَّيْت بِصِدْقَكْ وَ نَجَاتَكْ.
أَنَا مَا لَبَّدْت خَيْرَكْ
وَ أَمَانَكْ لِمُجْتَمَعْ كَبِيرْ.
11 مَا تَدْحَرْنِي مِنْ رَحْمَتَكْ، يَا اللّٰهْ!
خَيْرَكْ وَ أَمَانَكْ يَحْفَضَوْنِي لِلْأَبَدْ.
12 أَشَانْ مَصَايِبْ بَلَا عَدَدْ حَاصَرَوْنِي
وَ خَطَايِ فَاتَوْنِي، مَا نَقْدَرْ نَحْمَلْهُمْ.
هُمَّنْ كِتْرَوْا وَ بِقَوْا زِيَادَةْ مِنْ صُوفْ رَاسِي
وَ أَنَا مَا عِنْدِي قُدْرَةْ.
13 يَا اللّٰهْ، نَشْحَدَكْ نَجِّينِي!
وَ تَعَالْ عَجَلَةْ أَفْزَعْنِي!
14 خَلِّي الْعَيْب وَ الشَّمَاتَةْ يَكُرْبُوهُمْ كُلُّهُمْ،
هُمَّنْ الْيِدَوْرُوا مَوْتِي.
وَ الْيِحِبُّوا لَيِّ الشَّرّ،
خَلِّي يِعَرُّدُوا وَ يَخْجَلَوْا.
15 الْيِشَّمَّتَوْا لَيِّ،
خَلِّي الْعَيْب يَخْرِبْهُمْ.
16 وَ لَاكِنْ خَلِّي كُلَّ الْيِفَتُّشُوكْ
يَفْرَحَوْا وَ يِنْبَسْطُوا بَيْك.
وَ خَلِّي الْيِحِبُّوا نَجَاتَكْ يُقُولُوا دَايْماً:
«اللّٰهْ هُو أَكْبَرْ!»
17 أَنَا مِسْكِينْ وَ فَقْرَانْ.
يَا رَبّ، فَكِّرْ فَوْقِي!
إِنْتَ لَيِّ فَزَعْ وَ مُنَجِّي.
يَا إِلٰـهِي، مَا تِأَخِّرْ!
© La Bible en arabe tchadien © Alliance biblique du Tchad, 2019
