وَصِيَّةْ لِكَبِيرْ الْغَنَّايِينْ: مَزْمُورْ لِأَوْلَادْ قُورَحْ
1 يَا الشَّعَبْ، إِنْتُو كُلُّكُو صَفُّقُوا
وَ أَفْرَحَوْا لِلرَّبّ بِزَغْرَاطْ!
2 أَشَانْ اللّٰهْ الْعَالِي مُخِيفْ
وَ هُو الْمَلِكْ الْكَبِيرْ فِي كُلَّ الْأَرْض.
3 هُو خَطَّ شُعُوبْ تِحِتْ سُلْطِتْنَا
وَ خَطَّ أُمَمْ تِحِتْ رِجِلَيْنَهْ.
4 هُو عَزَلْ لَيْنَا وَرَثَةْ،
فَرْحَةْ يَعْقُوبْ مَحْبُوبَهْ. وَقْفَةْ.
5 الرَّبّ أَنْرَفَعْ فِي أُسْط الزَّغْرَاطْ
وَ فِي حِسّ الْبُوقْ، اللّٰهْ جَاءْ.
6 غَنُّوا لِلرَّبّ، غَنُّوا!
غَنُّوا لِمَلِكْنَا، غَنُّوا!
7 أَشَانْ مَلِكْ كُلَّ الْأَرْض، هُو الرَّبّ!
غَنُّوا لَيَّهْ غِنَيْ!
8 الرَّبّ يَمْلُكْ فِي الْأُمَمْ،
الْإِلٰـهْ قَاعِدْ فِي عَرْشَهْ الْمُقَدَّسْ.
9 حُكَّامْ الشُّعُوبْ لَمَّوْا
مَعَ شَعَبْ إِلٰـهْ إِبْرَاهِيمْ
أَشَانْ كُبَارَاتْ الْأَرْض هِنَيْ اللّٰهْ،
هُو الْعَالِي مِنْ كُلَّ شَيّءْ.
© La Bible en arabe tchadien © Alliance biblique du Tchad, 2019
