مَزْمُورْ لِأَسَافْ
1 اللّٰهْ إِلٰـهْ الْإِلٰـهَاتْ حَجَّى
وَ نَادَى الْأَرْض
مِنْ بَكَانْ طَلُوعْ الْحَرَّايْ
لَحَدِّي وَقُوعْهَا.
2 فِي صَهْيُون جَمَالْ كَامِلْ،
مَجْد الرَّبّ يِبِينْ.
3 خَلِّي إِلٰـهْنَا يَجِي
وَ خَلِّي مَا يَسْكُتْ!
قِدَّامَهْ فِي نَارْ مُحْرِقَةْ
وَ رِيحْ شَدِيدَةْ تُسُوقْ حَوَالَيَّهْ.
4 هُو نَادَى السَّمَاوَاتْ وَ الْأَرْض
أَشَانْ يَشْهَدَوْا فِي مُحَاكَمَةْ شَعَبَهْ.
5 وَ قَالْ: «لِمُّوا الْمُؤمِنِينْ!
هُمَّنْ السَّوَّوْا مَعَايِ مُعَاهَدَةْ بِالضَّحِيَّةْ!»
6 وَ السَّمَاوَاتْ يِحَجُّوا بِعَدَالْتَهْ وَ يُقُولُوا:
«الْحَاكِمْ، هُو الرَّبّ.» وَقْفَةْ.
7 «أَسْمَعْ، يَا شَعَبِي، أَنَا نِحَجِّي.
يَا بَنِي إِسْرَائِيلْ، أَنَا نَشْهَدْ ضِدُّكُو.
أَيْوَى، أَنَا الرَّبّ إِلٰـهْكُو.
8 مَا بِسَبَبْ ضَحَايَاكُو أَنَا نُلُومْكُو
أَشَانْ ضَحَايَاكُو الْمُحَرَّقِينْ
قَاعِدِينْ قِدَّامِي دَايْماً.
9 أَنَا مَا نَقْبَلْ تِيرَانْ مِنْ زَرَايِبْكُو
وَ لَا تُيُوسْ مِنْ لُبّ دَوْركُو.
10 أَشَانْ كُلَّ حَيْوَانَاتْ الْكَدَادَةْ هِنَيّ أَنَا
وَ كُلَّ بَهَايِمْ الْفِي الْجِبَالْ بِالْأُلُوفْ.
11 وَ نَعَرِفْ كُلَّ طُيُورْ الْجِبَالْ
وَ حَيْوَانَاتْ الْكَدَادَةْ كُلَ هِنَيّ أَنَا.
12 كَنْ أَنَا جِيعَانْ كُلَ، مَا نِكَلِّمْكُو.
أَشَانْ الدُّنْيَا وَ كُلَّ شَيّءْ الْفَوْقهَا هِنَيّ أَنَا.
13 أَنَا نَاكُلْ لَحَمْ التِّيرَانْ وَلَّا؟
وَ نَشْرَبْ دَمّ التُّيُوسْ وَلَّا؟
14 «قَدُّمُوا لِلرَّبّ ضَحِيَّةْ شُكُرْ
وَ حَقُّقُوا نَذِرْكُو لِلْعَالِي.
15 فِي يَوْم الضِّيقَةْ، نَادُونِي
وَ خَلَاصْ، أَنَا نِنَجِّيكُو وَ إِنْتُو تِمَجُّدُونِي.»
16 الرَّبّ قَالْ لِلْعَاصِي:
«مَالَا تِكَلِّمْ بِشُرُوطِي
وَ تِحَجِّي بِمُعَاهَدَتِي؟
17 إِنْتَ التَّكْرَهْ الْأَدَبْ
وَ تَابَى كَلَامِي!
18 وَ كَنْ إِنْتَ شِفْت سَرَّاقْ، تِسْتَفِقْ مَعَايَهْ
وَ تَمْشِي مَعَ الزَّنَّايِينْ.
19 لِسَانَكْ يُقُولْ الْفَسَالَةْ
وَ خَشْمَكْ يِنْرَبِطْ فِي الْغَشّ.
20 إِنْتَ تَقْعُدْ وَ تِحَجِّي ضِدّ أَخُوكْ
وَ تِعَيِّبْ وَلْد أَمَّكْ.
21 أَنَا نَسْكُتْ فِي الشَّيّءْ الْإِنْتَ سَوَّيْتَهْ وَلَّا؟
إِنْتَ تَحْسِبْ أَنَا مِثْلَكْ وَلَّا؟
لَا! أَنَا نَتْهَمَكْ
وَ نِبَيِّنْ لُوَامْتِي قِدَّامَكْ!
22 أَفْهَمَوْه إِنْتُو النِّسِيتُونِي أَنَا الرَّبّ!
كَنْ مَا فِي، أَنَا نَكْتُلْ وَ مَا فِي نَادُمْ الْيِنَجِّي!»
23 الْيِقَدِّمْ ضَحِيَّةْ الشُّكُرْ يِمَجِّدْنِي
وَ الْيِفَكِّرْ فِي دَرْبَهْ، نِشَوِّفَهْ نَجَاتِي أَنَا الرَّبّ.
© La Bible en arabe tchadien © Alliance biblique du Tchad, 2019
