وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ، وَكِتْ النَّبِي نَاتَانْ جَاءْ لَيَّهْ وَ دَا بَعَدْ دَاوُدْ دَخَلْ فِي بَتْشَابَعْ
1 يَا رَبِّي! حِنّ فَوْقِي حَسَبْ نِعْمَتَكْ
وَ بِرَحْمَتَكْ الْكَبِيرَةْ، أَمْحَا خَطَايِ.
2 قُشّ خَطَايِ مَرَّةْ وَاحِدْ
وَ طَهِّرْنِي مِنْ ذَنْبِي.
3 أَشَانْ أَنَا عِرِفْت خَطَايِ
وَ ذَنْبِي قَاعِدْ دَايْماً فِي عَقْلِي.
4 ضِدَّكْ إِنْتَ وِحَيْدَكْ بَسْ، أَنَا أَذْنَبْت
وَ سَوَّيْت شَيّءْ فَسِلْ قِدَّامَكْ.
وَ فِي شَانْ دَا، إِنْتَ صَادِقْ وَكِتْ تِكَلِّمْ
وَ عَادِلْ وَكِتْ تِحَاكِمْ.
5 دَاهُو مِنْ وِلْدَوْنِي، أَنَا فِي الْخَطَا
أَيْوَى، مِنْ أَمِّي غِلْبَتْ بَيِّ، أَنَا مُذْنِبْ.
6 لَاكِنْ إِنْتَ تَفْرَحْ بِالْحَقّ الْفِي دَاخَلْ الْقَلِبْ.
فِي دَاخِلِي، عَرِّفْنِي الْحِكْمَةْ.
7 طَهِّرْنِي مِنْ ذَنْبِي بِوَرْشَالْ زُوفَةْ
وَ نَبْقَى طَاهِرْ.
غَسِّلْنِي لَحَدِّي نَبْقَى أَبْيَضْ كَرّ
زِيَادَةْ مِنْ الْقُطُنْ.
8 أَنْطِينِي الْفَرَحْ وَ السُّرُورْ
وَ خَلِّي الْجِسِمْ الْإِنْتَ رِحِكْتَهْ يَفْرَحْ.
9 مَا تِوَجِّهْ عَلَيْ ذُنُوبِي
وَ أَمْحَا كُلَّ خَطَايِ.
10 يَا رَبِّي! أَخْلِقْ فِي دَاخِلِي قَلِبْ طَاهِرْ
وَ قَبِّلْ لَيِّ رُوحِي الثَّابْتَةْ!
11 مَا تَزْقُلْنِي بَعِيدْ مِنْ حَضَرَتَكْ
وَ مَا تِشِيلْ مِنِّي رُوحَكْ الْمُقَدَّسْ.
12 أَنْطِينِي فَرَحْ نَجَاتَكْ
وَ قَوِّينِي بِرُوحْ كَرِيمَةْ.
13 نِعَلِّمْ دُرُوبَكْ لِلْعَاصِيِينْ
وَ الْمُذْنِبِينْ يِقَبُّلُوا لَيْك.
14 يَا رَبِّي، يَا إِلٰـهِي،
يَا مُنَجِّي حَيَاتِي!
نَجِّينِي مِنْ الدِّمَّةْ
وَ لِسَانِي يِكَلِّمْ بِعَدَالْتَكْ.
15 يَا رَبّ، أَفْتَحْ خَشْمِي
وَ لِسَانِي يَشْكُرَكْ.
16 إِنْتَ مَا تِدَوْر نَدْبَحْ ضَحِيَّةْ.
حَتَّى كَنْ نِقَدِّمْ لَيْك ضَحِيَّةْ مُحَرَّقَةْ كُلَ،
إِنْتَ مَا تَقْبَلْهَا.
17 الضَّحِيَّةْ الْيَقْبَلْهَا الرَّبّ،
هِي ضَحِيَّةْ الرُّوحْ الْمُحَطَّمَةْ.
يَا إِلٰـهِي، إِنْتَ مَا تَابَى
الْقَلِبْ الْمَكْسُورْ وَ مَرْحُوكْ.
18 بِرِضَاكْ، سَوِّي الْخَيْر لِصَهْيُون
وَ أَبْنِي بَتَّانْ دَرَادِرْ مَدِينَةْ الْقُدُسْ.
19 وَ بَيْدَا، تَرْضَى بِالضَّحَايَا الْمُوَافْقِينْ
وَ دَوْل الضَّحَايَا الْمُحَرَّقِينْ
وَ الْهَدَايَا الْكَامِلِينْ.
أَيْوَى، يِقَدُّمُوا تِيرَانْ فِي مَدْبَحَكْ.
© La Bible en arabe tchadien © Alliance biblique du Tchad, 2019
