وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، تَعْلِيمْ مِنْ دَاوُدْ
1 يَا إِلٰـهِي، أَسْمَعْ صَلَاتِي وَكِتْ نَشْحَدَكْ
وَ مَا تَابَانِي!
2 فَكِّرْ فَوْقِي
وَ رُدّ لَيِّ.
أَنَا عَايِرْ
مِنْ شَكْوِتِي وَ قَنِتِينِي
3 أَشَانْ كُرَوْرَاكْ الْعَدُو
وَ مُضَايَقَةْ الْعَاصِيِينْ.
أَشَانْ هُمَّنْ صَبَّوْا فَوْقِي شَرُّهُمْ
وَ بِزَعَلْ، هَجَمَوْنِي.
4 قَلْبِي رَجَّفْ فِي دَاخِلِي
وَ الْخَوْف مِنْ الْمَوْت كَرَبَانِي.
5 الْخَوْف وَ الرَّجَفَانْ كَرَبَوْنِي
وَ بَهِيتَةْ شَدِيدَةْ كَرَبَتْنِي.
6 وَ قُلْت: «كَنْ عِنْدِي جَنَاحَيْ الْقِمْرِيَّةْ،
نِطِيرْ وَ نِفَتِّشْ مَسْكَنْ.
7 أَيْوَى! نِعَرِّدْ بَعِيدْ
وَ نَسْكُنْ فِي الْكَدَادَةْ. وَقْفَةْ.
8 «وَ بِسُرْعَةْ، نَلْقَى مَسْكَنْ
الْيَحْفَضْنِي مِنْ الرِّيحْ الشَّدِيدَةْ.»
9 يَا رَبّ! بَرْجِلْهُمْ
وَ شَتِّتْ كَلَامْهُمْ.
أَشَانْ أَنَا شِفْت الْعُنُفْ
وَ الْهُرَاجْ فِي الْمَدِينَةْ
10 لَيْل وَ نَهَارْ مُحَوِّقِينْ دَرَادِرْهَا
وَ الْفَسَالَةْ وَ التَّعَبْ فِي لُبَّهَا.
11 الدَّمَارْ قَاعِدْ فِي لُبَّهَا
وَ الْغَشّ وَ الظُّلُمْ
أَبَداً مَا يِكِسُّوا مِنْ شَوَارِعْهَا.
12 كَنْ عَدُو يِعَيِّرْنِي،
نَحْمَلَهْ
وَ كَنْ خَصِيمْ يُقُمّ ضِدِّي،
نِلَّبَّدْ مِنَّهْ.
13 وَ لَاكِنْ دَا إِنْتَ، رَاجِلْ مِثْلِي
وَ إِنْتَ بَسْ سِيدْ أَمَانِي
وَ رَفِيقِي النِّرِيدَكْ!
14 وَ إِنْتَ الْعِشْنَا مَعَاكْ سَوَا
فِي حَلُو وَ أَمَانْ.
وَ مَشَيْنَا سَوَا فِي بَيْت اللّٰهْ
مَعَ جَمَاعَةْ الْعَابِدِينْ.
15 وَ خَلِّي الْمَوْت يِفَاجِئ عُدْوَانِي
وَ يَنْزُلُوا حَيِّينْ فِي الْقُبُورْ
أَشَانْ الشَّرّ قَاعِدْ مَعَاهُمْ فِي أُسُطْهُمْ.
16 وَ لَاكِنْ أَنَا نِنَادِي الرَّبّ
وَ هُو بَسْ اللّٰهْ الْيِنَجِّينِي.
17 وَ بِفَجُرْ وَ قَايْلَةْ وَ عَشِيَّةْ،
أَنَا نَشْكِي وَ نَقْنِتْ
وَ هُو سِمِعْ حِسِّي.
18 هُو فَدَانِي بِالسَّلَامَةْ
وَكِتْ قَاعِدِينْ يِحَارُبُونِي
أَشَانْ كَتِيرِينْ قَايْمَيْن ضِدِّي.
19 خَلِّي الرَّبّ يَسْمَعْ وَ يِهِينْهُمْ،
هُو الْقَاعِدْ فِي عَرْشَهْ مِنْ زَمَانْ. وَقْفَةْ.
هُمَّنْ وَ لَا يِغَيُّرُوا
وَ لَا يَخَافَوْا مِنْ الرَّبّ.
20 الْخَايِنْ رَفَعْ إِيدَهْ ضِدّ نَاسْ السَّلَامْ
وَ مَا أَحْتَرَمْ مُعَاهَدَتَهْ.
21 وَ لِسَانَهْ حَلُو مِنْ الْعَسَلْ
وَ لَاكِنْ قَلْبَهْ خَطَّطْ الْحَرِبْ.
وَ كَلَامَهْ مَارِنْ مِنْ الزِّبْدَةْ
وَ لَاكِنْ مِثِلْ السَّيْف الْمَسْلُولْ.
22 خُطّ هَمَّكْ فِي اللّٰهْ
وَ هُو يِسَاعِدَكْ.
وَ هُو أَبَداً مَا يِخَلِّي الصَّالِحْ
يِتَّرْتَعْ.
23 وَ إِنْتَ، يَا إِلٰـهِي،
إِنْتَ تِنَزِّلْهُمْ فِي الْقَبُرْ.
كَتَّالِينْ الدِّمَمْ
وَ الْغَشَّاشِينْ
مَا يِعِيشُوا نُصّ عُمُرْهُمْ.
وَ لَاكِنْ أَنَا نِتْوَكَّلْ عَلَيْك.
© La Bible en arabe tchadien © Alliance biblique du Tchad, 2019
