وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «مَا تِدَمِّرْ»، شِعِرْ لِدَاوُدْ
1 يَا بَنِي آدَم، صَحِيحْ كَيْ؟
بِالسُّكُوتْ تِجِيبُوا الْعَدَالَةْ وَلَّا؟
قَاعِدِينْ تَحْكُمُوا بِالْحَقّ أَمْبَيْنَاتْكُو وَلَّا؟
2 لَا! بِنِيِّتْكُو قَاعِدِينْ تِسَوُّوا جَرِيمَةْ
وَ فِي الْأَرْض قَاعِدِينْ تِكَتُّرُوا الْعُنُفْ بِإِيدْكُو.
3 الْعَاصِيِينْ مُنَافِقِينْ
مِنْ هُمَّنْ فِي رِحِمْ أَمَّهَاتْهُمْ
وَ الْكَدَّابِينْ مُوَدِّرِينْ
مِنْ يَوْم مَرَقَوْا مِنْ بُطُونْ أَمَّهَاتْهُمْ.
4 هُمَّنْ عِنْدُهُمْ سَمّ
مِثِلْ سَمّ الدَّابِي
وَ مِثِلْ أَمْ شِدَيْقَاتْ الطَّرْشَانَةْ
السَّدَّتْ أُدْنَيْهَا
5 وَ مَا تِدَوْر تَسْمَعْ حِسّ سِيدْهَا
وَ لَا حِسّ السَّاحِرْ الزِّيَادَةْ مِنَّهْ.
6 يَا رَبّ، كَسِّرْ سُنُونْهُمْ فِي دَاخَلْ خُشُومْهُمْ!
وَ دَمِّرْ فَوَاطِرْ عِيَالْ الدُّودْ، يَا اللّٰهْ!
7 خَلِّي يِسِيلُوا مِثِلْ أَلْمِي الْجَارِي
وَ نَشَاشِيبْهُمْ الْيِصَوُّبُوهُمْ
يُكُونُوا مَا عِنْدُهُمْ قُدْرَةْ.
8 وَ مِثِلْ دُودْ الْكَرْكُورْ
الْيُمُوعْ وَكِتْ يَزْحَفْ
وَ مِثِلْ صَغِيرْ الرُّمَايَةْ،
أَبَداً مَا يِشِيفُوا الْحَرَّايْ.
9 وَ قُبَّالْ بُرَامْكُو مَا يِحِسُّوا بِنَارْ الشَّوْك،
غَضَبْ اللّٰهْ يُقُشُّهُمْ بِرِيحْ شَدِيدَةْ.
10 وَ الصَّالِحْ يَفْرَحْ
أَشَانْ هُو شَافْ شَيْلِينْ التَّارْ
وَ هُو يِغَسِّلْ رِجِلَيْنَهْ
فِي دَمّ الْعَاصِيِينْ.
11 وَ النَّاسْ يُقُولُوا:
«أَيْوَى، لِلصَّالِحْ أَجُرْ!
أَيْوَى، الرَّبّ قَاعِدْ
وَ يَحْكِمْ فِي الْأَرْض!»
© La Bible en arabe tchadien © Alliance biblique du Tchad, 2019
