وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، مَزْمُورْ لِدَاوُدْ
1 يَا رَبّ، أَسْمَعْ صِرَاخِي
وَ أَسْمَعْ صَلَاتِي!
2 مِنْ آخِرْ الْأَرْض، أَنَا نَادَيْتَكْ إِنْتَ
وَكِتْ مَا عِنْدِي قُدْرَةْ.
قُودْنِي فِي الْجَبَلْ الْعَالِي
الْمَا نَقْدَرْ نَلْحَقَهْ.
3 أَشَانْ إِنْتَ مَلْجَئِي
وَ بَيْت الْمُرَاقَبَةْ قِدَّامْ عُدْوَانِي.
4 أَنَا نِدَوْر نَسْكُنْ تِحِتْ خَيْمِتَكْ إِلَى الْأَبَدْ
وَ نَلْجَأْ تِحِتْ جَنَاحَيْك. وَقْفَةْ.
5 أَشَانْ إِنْتَ، يَا رَبّ،
سِمِعْت بِنَذْرِي
وَ أَنْطَيْتنِي الْوَرَثَةْ الْحَفَضْتَهَا
لِلنَّاسْ الْيَخَافَوْا مِنْ أُسْمَكْ.
6 زِيدْ أَيَّامْ فِي عُمُرْ الْمَلِكْ
وَ خَلِّي عُمْرَهْ يَبْقَى طَوِيلْ
مِنْ ذُرِّيَّةْ لِذُرِّيَّةْ!
7 خَلِّي يَقْعُدْ فِي عَرْشَهْ
قِدَّامْ الرَّبّ إِلَى الْأَبَدْ.
أَحْفَضَهْ بِرَحْمَتَكْ
وَ أَمَانَكْ.
8 بَيْدَا، أَنَا نِغَنِّي بِأُسْمَكْ دَايْماً
وَ نِحَقِّقْ نَذْرِي كُلَّ يَوْم.
© La Bible en arabe tchadien © Alliance biblique du Tchad, 2019
