وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 يَا رَبّ! أَسْمَعْ حِسّ شَكْوِتِي.
أَنَا خَايِفْ مِنْ عُدْوَانِي،
أَحْفَضْ حَيَاتِي.
2 لَبِّدْنِي بَعِيدْ مِنْ مُؤآمَرَةْ الْفَسْلِينْ
وَ بَعِّدْنِي مِنْ نِيَّةْ الظَّالِمِينْ.
3 هُمَّنْ يِطَرُّقُوا لِسْنَيْهُمْ مِثِلْ السَّيْف
وَ كَلَامْهُمْ مُرّ مِثِلْ النُّشَّابْ.
4 هُمَّنْ يَكُرْسُوا وَ يَزُرْقُوا التَّمَامِينْ
وَ بِغَفْلَةْ، يَزُرْقُوهْ بَلَا خَوْف.
5 يِلْحَارَشَوْا أَمْبَيْنَاتْهُمْ لِيِسَوُّوا الْفَسَالَةْ
وَ يِخَطُّطُوا لِيُكُجُّوا أَمْ كَجَّامَاتْ
وَ يُقُولُوا: «يَاتُو يِشِيفْنَا؟»
6 يَنْوُوا الْجَرِيمَةْ وَ يُقُولُوا:
«أَنِحْنَ جَهَّزْنَا لِنِحَقُّقُوا نِيِّتْنَا.
الْفِي قَلْب الْإِنْسَانْ مَا بِنْعَرِفْ!»
7 لَاكِنْ بِغَفْلَةْ، الرَّبّ زَرَقَاهُمْ بِنُشَّابْ
وَ دَاهُو النُّشَّابْ دَا ضَرَبَاهُمْ!
8 كَلَامْهُمْ قَبَّلْ فَوْقهُمْ
وَ وَكِتْ يِشِيفْهُمْ،
أَيِّ نَادُمْ يِهِزّ رَاسَهْ.
9 كُلَّ النَّاسْ يَخَافَوْا وَ يِخَبُّرُوا بِعَمَلْ الرَّبّ
وَ يَفْهَمَوْا خِدِمْتَهْ.
10 خَلِّي الصَّالِحْ يَفْرَحْ بِاللّٰهْ وَ يَلْجَأْ لَيَّهْ
وَ كُلَّ النَّاسْ الْقُلُوبْهُمْ عَدِيلِينْ يَشْكُرُوهْ.
© La Bible en arabe tchadien © Alliance biblique du Tchad, 2019
