وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ، غِنَيْ
1 خَلِّي الرَّبّ يُقُمّ وَ عُدْوَانَهْ يِشِتُّوا
وَ خُصْمَانَهْ يَجْرُوا قِدَّامَهْ.
2 وَ مِثِلْ الدُّخَّانْ يِشَتِّتْ،
مِثِلْ الشَّمْعَةْ تُمُوعْ فِي النَّارْ،
الْعَاصِيِينْ يِدَّمَّرَوْا قِدَّامْ الرَّبّ.
3 وَ لَاكِنْ الصَّالِحِينْ يَفْرَحَوْا
وَ يِنْبَسْطُوا قِدَّامْ الرَّبّ
وَ فَرْحَانِينْ زِيَادَةْ.
4 غَنُّوا لِلرَّبّ
وَ أَمْدَحَوْا أُسْمَهْ!
أَفْتَحَوْا الدَّرِبْ لِلرَّاكِبْ فِي السَّحَابْ،
أُسْمَهْ هُو اللّٰهْ،
وَ أَفْرَحَوْا قِدَّامَهْ.
5 الْإِلٰـهْ الْقَاعِدْ فِي مَسْكَنَهْ الْمُقَدَّسْ،
هُو أَبُو الْأَتَامَا وَ مُحَامِي الْأَرَامِلْ.
6 لِلنَّادُمْ الْقَاعِدْ وِحَيْدَهْ،
الرَّبّ يِسَكِّنَهْ مَعَ عَايِلَةْ
وَ لِلْمَسَاجِينْ،
يَمْرُقْهُمْ مِنْ السِّجِنْ
وَ يَنْطِيهُمْ النَّجَاةْ.
وَ لَاكِنْ لِلْحَرَامِيِّينْ،
يِسَكِّنْهُمْ فِي أَرْض جَفَافْ.
7 يَا رَبّ! مَرَقْت قِدَّامْ شَعَبَكْ
وَ مَشَيْت فِي الصَّحَرَاء. وَقْفَةْ.
8 وَ فِي الْوَكِتْ دَا، الْأَرْض رَجَفَتْ
وَ السَّمَاوَاتْ صَبَّوْا أَلْمِي
قِدَّامْ الرَّبّ إِلٰـهْ جَبَلْ سِينَاء،
قِدَّامْ الرَّبّ إِلٰـهْ بَنِي إِسْرَائِيلْ.
9 يَا رَبّ! إِنْتَ نَزَّلْت مَطَرَةْ شَدِيدَةْ
وَ ثَبَّتّْ شَعَبَكْ الْمِثِلْ وَرَثَتَكْ
الْمَا عِنْدُهُمْ قُدْرَةْ.
10 وَ شَعَبَكْ سَكَنَوْا فِي بَلَدَكْ
الْبِخَيْرَكْ إِنْتَ ثَبَّتّْ فَوْقهَا الْمِسْكِينْ، يَا رَبّ.
11 الرَّبّ أَنْطَى أَمُرْ
وَ الْمُبَشِّرَاتْ بِقَنْ كَتِيرَاتْ مِثِلْ دَيْش.
12 الْمُلُوكْ وَ الْعَسْكَرْ جَرَوْا وَ عَرَّدَوْا
وَ الْعَوِينْ الْفَضَّلَنْ فِي الْبُيُوتْ
يِلْقَاسَمَنْ الْغَنِيمَةْ.
13 حَتَّى إِنْتُو الرَّاقْدِينْ فِي الزَّرَايِبْ كُلَ،
وَاجِبْ تَلْقَوْا كَنْز
مِثِلْ جَنَاحَيْ حَمَامْ مُغَطَّيِينْ بِفُضَّةْ
الرِّيشْهَا أَصْفَرْ مِثِلْ دَهَبْ.
14 وَ وَكِتْ اللّٰهْ الْقَادِرْ
شَتَّتْ الْمُلُوكْ،
دَا بِقِي مِثِلْ التَّلَجْ
النَّازِلْ فِي جَبَلْ سَلْمُونْ.
15 يَا جِبَالْ الرَّبّ، جِبَالْ بَاشَانْ!
يَا جِبَالْ الرُّوسَيْكُو كَتِيرِينْ، جِبَالْ بَاشَانْ!
16 يَا جِبَالْ الرُّوسَيْكُو كَتِيرِينْ،
مَالَا تِنْحَسْدُوا فِي الْجَبَلْ
الْعَجَبْ الرَّبّ لِيَسْكُنْ فَوْقَهْ؟
أَيْوَى، اللّٰهْ يَسْكُنْ فَوْقَهْ إِلَى الْأَبَدْ.
17 عَرَبَاتْ الْحَرِبْ هَنَا الرَّبّ
يِنْحَسْبُوا مِنْ عِشْرِينْ أَلِفْ لَحَدِّي آلَافْ الْآلَافْ
وَ هُو جَاءْ مَعَاهُمْ مِنْ سِينَاء
لِبَكَانَهْ الْمُقَدَّسْ.
18 يَا اللّٰهْ الرَّبّ! إِنْتَ طَلَعْت فِي الْعَالِي
وَ كَرَبْت مَسَاجِينْ
وَ شِلْت هَدَايَا مِنْ النَّاسْ
حَتَّى مِنْ الْحَرَامِيِّينْ كُلَ
وَ سَوَّيْت مَسْكَنَكْ فِي جَبَلْ صَهْيُون.
19 بَارَكْ الرَّبّ كُلَّ يَوْم!
هُو يِشِيلْ مَسْؤُولِيِّتْنَا
وَ هُو إِلٰـهْنَا الْيِنَجِّينَا. وَقْفَةْ.
20 إِلٰـهْنَا هُو الْإِلٰـهْ الْيِنَجِّينَا،
اللّٰهْ الرَّبّ بَسْ يَحْفَضْنَا مِنْ الْمَوْت.
21 لَاكِنْ الرَّبّ يَكْسِرْ رُوسَيْ عُدْوَانَهْ
وَ رُوسَيْ الْعِنْدُهُمْ صُوفْ الْعَايْشِينْ فِي خَطَاهُمْ.
22 وَ الرَّبّ قَالْ:
«أَنَا نِجِيبْ الْعَدُو مِنْ بَاشَانْ
وَ نِجِيبْهُمْ مِنْ أُسْط الْبَحَرْ الْغَرِيقْ.
23 وَ بَيْدَا، إِنْتُو تِفَجُّقُوهُمْ فِي الدَّمّ
وَ كُلابْكُو كُلَ يَلْقَوْا حَقُّهُمْ مِنْ الْعَدُو.»
24 يَا رَبّ! النَّاسْ شَافَوْا جَيْتَكْ
وَ دِي جَيَّةْ إِلٰـهِي فِي الْبَكَانْ الْمُقَدَّسْ
وَ هُو مَلِكِي.
25 الْغَنَّايِينْ يَمْشُوا قِدَّامْ
وَ الْيَضُرْبُوا الْمُسِيقَى يَمْشُوا وَرَاءْ
مَعَ الْبَنَاتْ الْيَضُرْبَنْ النَّقَاقِيرْ.
26 فِي مَجْمُوعَاتْ، أَحْمُدُوا الرَّبّ
أَيْوَى، أَحْمُدُوا اللّٰهْ، يَا ذُرِّيَّةْ إِسْرَائِيلْ!
27 هِنَاكْ قَبِيلَةْ بَنْيَامِينْ
الصَّغَيْرَةْ تُقُودْهُمْ.
وَ بَعَدْهُمْ، كُبَارَاتْ قَبِيلَةْ يَهُوذَا مَعَ عَسْكَرْهُمْ
وَ كُبَارَاتْ قَبِيلَةْ زَبُلُونْ وَ كُبَارَاتْ قَبِيلَةْ نَفْتَالِي.
28 إِلٰـهَكْ قَرَّرْ يَنْطِيكْ قُدْرَةْ.
يَا رَبّ! وَصِّفْ لَيْنَا قُدُرْتَكْ
مِثِلْ إِنْتَ سَوَّيْتَهْ لَيْنَا زَمَانْ.
29 فِي بَيْتَكْ الْمُقَدَّسْ الْعَالِي فِي مَدِينَةْ الْقُدُسْ،
الْمُلُوكْ يِجِيبُوا لَيْك هَدَايَا.
30 قُمّ هَدِّدْ التُّمْسَاحْ الْكَارِسْ فِي التِّبِنْ
وَ دَوْر التِّيرَانْ
وَ هَدِّدْ شُعُوبْ الْعَجَّالْ الْيَعَبُدُوهُمْ
وَ يَنْطُوهُمْ حُجَارْ فُضَّةْ.
أَيْوَى، شَتِّتْ الشُّعُوبْ
الْيِرِيدُوا الْحَرِبْ!
31 مِنْ مَصِرْ يَجُوا نَاسْ كُبَارْ
وَ مِنْ الْحَبَشَةْ كَمَانْ
نَاسْهَا يِجِيبُوا هَدَايَا بِسُرْعَةْ لِلرَّبّ.
32 يَا مَمَالِكْ الْأَرْض، غَنُّوا لِلْإِلٰـهْ!
أَيْوَى، أَمْدَحَوْا الرَّبّ! وَقْفَةْ.
33 هُو رَاكِبْ فِي السَّمَاوَاتْ،
السَّمَاوَاتْ الْقَاعِدِينْ مِنْ زَمَانْ.
دَاهُو حِسَّهْ أَنْسَمَعْ،
حِسّ شَدِيدْ.
34 أَعَرْفُوا قُدْرَةْ الرَّبّ
وَ عَظَمَتَهْ الْفِي إِسْرَائِيلْ
وَ قُدُرْتَهْ الْقَاعِدَةْ فِي السَّحَابْ.
35 يَا رَبّ، إِنْتَ التِّخَوِّفْ
مِنْ بَيْتَكْ الْمُقَدَّسْ.
يَا رَبّ بَنِي إِسْرَائِيلْ، إِنْتَ التَّنْطِي
قُدْرَةْ وَ سُلْطَةْ لِشَعَبَكْ.
أَحْمُدُوا الرَّبّ!
© La Bible en arabe tchadien © Alliance biblique du Tchad, 2019
