تَعْلِيمْ مِنْ أَسَافْ
1 يَا رَبّ، مَالَا خَلَّيْتنَا إِلَى الْأَبَدْ؟
وَ مَالَا غَضَبَكْ يَحْرِقْنَا،
أَنِحْنَ غَنَمَكْ التَّسْرَحْ بَيْنَا؟
2 أَذَّكَّرْ مُجْتَمَعَكْ الْإِنْتَ عَزَلْتَهْ مِنْ زَمَانْ
وَ الْقَبِيلَةْ الْفَدَيْتهَا لِتُكُونْ وَرَثَتَكْ.
أَذَّكَّرْ جَبَلْ صَهْيُون،
الْبَكَانْ الْإِنْتَ سَوَّيْتَهْ مَسْكَنَكْ.
3 أَمْشِي شِيفْ الدَّمَارْ الْكَامِلْ
فِي بَيْتَكْ الْمُقَدَّسْ،
الْعَدُو فَتْفَتْ كُلَّ شَيّءْ.
4 عُدْوَانَكْ رَقْرَقَوْا
فِي لُبّ الْبَكَانْ النِّلِمُّوا مَعَاكْ فَوْقَهْ
وَ هِنَاكْ خَطَّوْا عَلَامِتْهُمْ.
5 هُمَّنْ بِقَوْا مِثِلْ الْيَرْفَعَوْا فَاسْهُمْ
لِيَقْطَعَوْا شَدَرْ الْغَابَةْ.
6 هُمَّنْ كَسَّرَوْا صُوَرْ مَنْقُوشِينْ هَنَا خَشَبْ
وَ دَقَّوْهُمْ بِفَاسْ وَ مِطْرَقَةْ.
7 وَ دَسَّوْا نَارْ فِي بَيْتَكْ الْمُقَدَّسْ.
أَيْوَى، الْبَكَانْ الْخَطَّيْت فَوْقَهْ أُسْمَكْ،
رَمَوْه وَ مَا جَعَلَوْه مُقَدَّسْ.
8 وَ قَالَوْا أَمْبَيْنَاتْهُمْ:
«يَلَّا! نِدَمُّرُوهُمْ كُلُّهُمْ!»
وَ فِي الْبَلَدْ، حَرَّقَوْا كُلَّ الْبَكَانَاتْ
الْنِلِمُّوا فَوْقهُمْ مَعَ الرَّبّ.
9 أَنِحْنَ مَا شِفْنَا بَتَّانْ عَلَامَاتْ الرَّبّ
وَ مَا فِي أَنْبِيَاء.
وَ فِي أُسُطْنَا، مَا فِي نَادُمْ
الْيَعَرِفْ الشَّيّءْ دَا يَقْعُدْ لِمَتَى.
10 لَحَدِّي مَتَى، يَا رَبّ، الْمُضَايِقِينْ يِعَيُّرُوكْ؟
الْعُدْوَانْ يَحْقُرُوا أُسْمَكْ دَايْماً وَلَّا؟
11 مَالَا كَرَبْت إِيدَكْ؟
مَالَا كَرَبْت زَيْنَايْتَكْ؟
أَرْفَعْهَا وَ كَمِّلْهُمْ!
12 يَا رَبّ! إِنْتَ مَلِكِي مِنْ زَمَانْ
وَ إِنْتَ بَسْ التِّجِيبْ النَّجَاةْ فِي الْبَلَدْ.
13 وَ بِقُدُرْتَكْ، إِنْتَ شَقَّيْت الْبَحَرْ إِتْنَيْن
وَ فِي الْأَلْمِي، كَسَّرْت رَاسْ غُولْ الْبَحَرْ.
14 أَيْوَى، إِنْتَ رِحِكْت رُوسَيْ لُيَاتَانْ
وَ سَوَّيْتَهْ أَكِلْ لِلشَّعَبْ
الْيَسْكُنُوا فِي الصَّحَرَاء.
15 إِنْتَ بَسْ جَرَّيْت عُيُونْ أَلْمِي وَ وُدْيَانْ
وَ إِنْتَ بَسْ يَبَّسْت بُحُورْ الْمَا يِكَمُّلُوا.
16 اللَّيْل وَ النَّهَارْ كُلَ
هُمَّنْ هِنَيْك إِنْتَ.
وَ الْقَمَرْ وَ الْحَرَّايْ كُلَ،
إِنْتَ خَطَّيْت أَيِّ وَاحِدْ فِي بَكَانَهْ.
17 إِنْتَ بَسْ الْخَطَّيْت حُدُودْ الْأَرْض
وَ الصَّيْف وَ الشِّتَاءْ كُلَ،
إِنْتَ بَسْ سَوَّيْتهُمْ.
18 يَا اللّٰهْ، أَذَّكَّرْ! الْعَدُو عَيَّرَكْ
وَ الشَّعَبْ الْمَطْمُوسْ حَقَرْ أُسْمَكْ!
19 مَا تِسَلِّمْ شَعَبَكْ لِلْعَدُو
مِثِلْ قِمْرِيَّةْ التَّنْطِيهَا لِلْحَيْوَانَاتْ.
وَ مَا تَنْسَى دَايْماً
حَيَاةْ مَسَاكِينَكْ.
20 فَكِّرْ فِي الْمُعَاهَدَةْ
أَشَانْ الْبَلَدْ مَلَانَةْ بِبَكَانَاتْ ضُلُمْ
وَ دَوْل بَسْ بَكَانَاتْ الْعُنُفْ.
21 خَلِّي الْمَظْلُومِينْ مَا يَخْجَلَوْا
وَ خَلِّي الْمَسَاكِينْ وَ الضَّعِيفِينْ يَشْكُرُوا أُسْمَكْ.
22 قُمّ، يَا رَبّ، دَافِعْ لِهَدَفَكْ
وَ فَكِّرْ فِي الْمُعْيَارْ الْجَايِ لَيْك
دَايْماً مِنْ الْمَطَامِيسْ.
23 مَا تَنْسَى حَرَكَةْ عُدْوَانَكْ
وَ عَايِطْ الْيُقُمُّوا ضِدَّكْ بِشِدَّةْ.
© La Bible en arabe tchadien © Alliance biblique du Tchad, 2019
