وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، مَزْمُورْ لِأَسَافْ، غِنَيْ
1 الرَّبّ مَعْرُوفْ فِي يَهُوذَا
وَ أُسْمَهْ كَبِيرْ فِي إِسْرَائِيلْ.
2 وَ خَيْمِتَهْ فِي أُورُشَلِيمْ
وَ مَسْكَنَهْ فِي صَهْيُون.
3 وَ هِنَاكْ، هُو كَسَّرْ النَّشَاشِيبْ وَ النُّبَّالْ
وَ الدَّرَقْ وَ السَّيْف وَ السِّلَاحْ. وَقْفَةْ.
4 يَا اللّٰهْ، إِنْتَ نُورْ عَظِيمْ
وَ زِيَادَةْ مِنْ الْجِبَالْ الدَّايْمِينْ.
5 الْعَسْكَرْ الْفَحَلِينْ شَالَوْهُمْ مِثِلْ غَنِيمَةْ
وَ نَامَوْا نَوْم الْمَوْت.
وَ كُلَّ الرُّجَالْ الْفَحَلِينْ دَوْل
مَا قِدْرَوْا يِدَافُعُوا لِنُفُوسْهُمْ.
6 يَا إِلٰـهْ يَعْقُوبْ! بِسَبَبْ تَهْدِيدَكْ،
سِيَادْ الْخَيْل وَ خَيْلهُمْ مَا أَلْحَرَّكَوْا.
7 إِنْتَ التِّخَوِّفْ،
يَاتُو الْيَقْدَرْ يَقِيفْ قِدَّامَكْ
فِي وَكِتْ غَضَبَكْ؟
8 مِنْ السَّمَاوَاتْ، إِنْتَ قَرَّرْت الْعِقَابْ
وَ مِنْ الْخَوْف، الْأَرْض قَاعِدَةْ سَاكِتْ
9 وَكِتْ الرَّبّ يُقُمّ لِلشَّرِيعَةْ
لِيِنَجِّي مَسَاكِينْ الْأَرْض. وَقْفَةْ.
10 حَتَّى زَعَلْ الْإِنْسَانْ يِوَصِّفْ مَجْدَكْ
وَ الْمَا يِخَلُّوا زَعَلْهُمْ يَقْعُدُوا حَزْنَانِينْ.
11 سَوُّوا نَذِرْ لِلّٰهْ إِلٰـهْكُو
وَ تِمُّوهْ.
أَيْوَى، جِيبُوا هَدَايَاكُو لِلْإِلٰـهْ الْبِخَوِّفْ،
إِنْتُو الْمُحَوِّقِينَهْ.
12 أَشَانْ هُو يِمَسْكِنْ الْكُبَارَاتْ
وَ يِخَوِّفْ مُلُوكْ الْأَرْض.
© La Bible en arabe tchadien © Alliance biblique du Tchad, 2019
