مَزْمُورْ لِأَسَافْ
1 يَا رَبّ! الْأُمَمْ هَجَمَوْا أَرْض وَرَثَتَكْ
وَ نَجَّسَوْا بَيْتَكْ الْمُقَدَّسْ
وَ سَوَّوْا مَدِينَةْ الْقُدُسْ كَوْم هَنَا تُرَابْ.
2 أَنْطَوْا جَنَازَاتْ عَبِيدَكْ
لِطُيُورْ السَّمَاءْ
وَ جِثَثْ الْمُؤمِنِينْ بَيْك
لِحَيْوَانَاتْ الْكَدَادَةْ.
3 وَ دَفَّقَوْا دَمُّهُمْ
حَوَالَيْ مَدِينَةْ الْقُدُسْ مِثِلْ أَلْمِي
وَ مَا فِي نَادُمْ الْيَدْفِنْهُمْ.
4 دَاهُو لِقِينَا مُعْيَارْ
مِنْ جِيرَانَّا
وَ شَمَاتَةْ وَ حُقْرَةْ
مِنْ الْمُحَوِّقِينَّا.
5 يَا اللّٰهْ، لِمَتَى تَغْضَبْ؟ إِلَى الْأَبَدْ؟
وَ لِمَتَى غِيرْتَكْ تَحْرِقْ مِثِلْ النَّارْ؟
6 نَزِّلْ غَضَبَكْ فِي الْأُمَمْ
الْمَا يَعَرْفُوكْ
وَ ضِدّ الْمَمَالِكْ
الْمَا يِنَادُوا أُسْمَكْ.
7 أَشَانْ هُمَّنْ كَمَّلَوْا ذُرِّيَّةْ يَعْقُوبْ
وَ خَرَّبَوْا بَلَدْهُمْ.
8 مَا تِذَّكَّرْ خَطَا جُدُودْنَا
لَاكِنْ خَلِّي رَحْمَتَكْ تَجِي عَجَلَةْ فَوْقنَا
أَشَانْ أَنِحْنَ ضِعِفْنَا زِيَادَةْ.
9 أَفْزَعْنَا، يَا رَبّ! إِنْتَ بَسْ مُنَجِّينَا،
أَفْدَانَا بِسَبَبْ أُسْمَكْ الْمَجِيدْ!
وَ فِي شَانْ أُسْمَكْ،
أَغْفِرْ ذُنُوبْنَا.
10 مَالَا الْأُمَمْ بُقُولُوا:
«وَيْن إِلٰـهُّمْ؟»
خَلِّي الْأُمَمْ دَوْل يَعَرْفُوا
وَ وَصِّفْهُمْ قِدَّامْنَا
كَدَرْ تِشِيلْ تَارْ فِي شَانْ عَبِيدَكْ الْكَتَلَوْهُمْ.
11 خَلِّي قَنِتِينْ الْمَسَاجِينْ يَلْحَقَكْ
وَ بِإِيدَكْ الْقَوِيَّةْ،
نَجِّي الْقَاعِدِينْ فِي خُطُورَةْ الْمَوْت.
12 وَ الْمُعْيَارْ الْعَيَّرَوْك لَيَّهْ جِيرَانَّا،
قَبِّلَهْ فِي رَاسْهُمْ سَبْعَةْ مَرَّاتْ، يَا رَبّ!
13 أَنِحْنَ شَعَبَكْ
وَ غَنَمَكْ التَّسْرَحْ بَيْهُمْ.
أَنِحْنَ نَشْكُرُوكْ دَايْماً
وَ نِحَجُّوا بِحَمْدَكْ مِنْ ذُرِّيَّةْ لِذُرِّيَّةْ.
© La Bible en arabe tchadien © Alliance biblique du Tchad, 2019
