غِنَيْ، مَزْمُورْ لِأَسَافْ
1 يَا رَبّ، مَا تَسْكُتْ!
وَ مَا تِصْمُتْ وَ لَا تِهْدَأْ، يَا رَبّ.
2 أَشَانْ دَاهُو عُدْوَانَكْ قَاعِدِينْ يِسَوُّوا حَرَكَةْ
وَ الْيَكْرَهَوْك يُقُمُّوا ضِدَّكْ.
3 بِعَشِيرْ، يِخَطُّطُوا بِنَجَاضَةْ ضِدّ شَعَبَكْ.
أَيْوَى، يِشَّاوَرَوْا ضِدّ الْإِنْتَ حَفَضْتُهُمْ.
4 هُمَّنْ قَالَوْا:
«يَلَّا! نُقُشُّوهُمْ مِنْ بَيْن الْأُمَمْ
وَ أُسُمْ بَنِي إِسْرَائِيلْ بَتَّانْ مَا يِذَّكَّرَوْه.»
5 أَيْوَى، هُمَّنْ أَشَّاوَرَوْا كُلُّهُمْ
وَ أَسْتَفَقَوْا ضِدَّكْ.
6 هُمَّنْ نَاسْ أَدَوْم وَ الْإِسْمَاعِيلِيِّينْ
وَ نَاسْ مُوَابْ وَ ذُرِّيَّةْ هَاجَرْ
7 وَ نَاسْ قِبَالْ وَ بَنِي عَمُّونْ وَ الْعَمَالِقْ
وَ الْفِلِسْطِيِّينْ وَ سُكَّانْ صُورْ.
8 وَ نَاسْ أَشُورْ كُلَ لَمَّوْا مَعَاهُمْ
لِيِسَاعُدُوا ذُرِّيَّةْ لُوطْ. وَقْفَةْ.
9 سَوِّي فَوْقهُمْ مِثِلْ سَوَّيْت فِي مِدْيَانْ
وَ فِي سِيسْرَا وَ يَابِينْ فِي وَادِي قِيشُونْ.
10 هُمَّنْ أَدَّمَّرَوْا فِي عَيْن دُورْ
وَ بِقَوْا بَعَرْ دَيَّرَوْا بَيَّهْ الزِّرَاعَةْ.
11 يَا رَبّ! سَوِّي فِي حُكَّامْهُمْ
مِثِلْ سَوَّيْت فِي عُرِيبْ وَ زِيبْ
وَ زَبَحْ وَ صَلْمُونَعْ
وَ كُلَّ كُبَارَاتْهُمْ،
12 هُمَّنْ بَسْ الْقَالَوْا:
«خَلِّي نَقْلَعَوْا أَرْض الرَّبّ.»
13 يَا إِلٰـهِي! سَوِّيهُمْ يُدُورُوا
مِثِلْ قَشّ الشَّايْلَةْ الرِّيحْ.
14 مِثِلْ نَارْ التَّاكُلْ الْغَابَةْ
وَ مِثِلْ أَمْ بَلْبَالَةْ التَّحْرِقْ الْجِبَالْ،
15 أَطْرُدْهُمْ بِرِيحَكْ الشَّدِيدَةْ
وَ خَوِّفْهُمْ بِأَمْ زَوْبَعَانْتَكْ.
16 غَطِّيهُمْ بِالْإِهَانَةْ
لِيِفَتُّشُوكْ، يَا اللّٰهْ!
17 خَلِّي الْعَيْب وَ الْبَهِيتَةْ
يَكُرْبُوهُمْ إِلَى الْأَبَدْ
وَ يُمُوتُوا بَلَا شَرَفْ.
18 وَ خَلَاصْ، يَعَرْفُوا كَدَرْ
إِنْتَ وِحَيْدَكْ بَسْ أُسْمَكْ اللّٰهْ
وَ إِنْتَ بَسْ الْعَالِي فِي كُلَّ الْأَرْض.
© La Bible en arabe tchadien © Alliance biblique du Tchad, 2019
