تَعْلِيمْ مِنْ إِتَانْ الْأَزْرَاحِي
1 يَا اللّٰهْ! أَنَا نِغَنِّي بِخَيْرَكْ إِلَى الْأَبَدْ
وَ نِعَرِّفْ دَايْماً صِدْقَكْ مِنْ ذُرِّيَّةْ لِذُرِّيَّةْ.
2 أَشَانْ أَنَا قُلْت: «رَحْمَتَكْ مَبْنِيَّةْ إِلَى الْأَبَدْ
وَ فِي السَّمَاءْ، صِدْقَكْ مُثَبَّتْ.»
3 وَ إِنْتَ قُلْت: «أَنَا سَوَّيْت مُعَاهَدَةْ مَعَ هُو الْأَنَا عَزَلْتَهْ
وَ حَلَفْت لِدَاوُدْ عَبْدِي بِالْكَلَامْ دَا:
4 ‹نِخَلِّي دَايْماً وَاحِدْ مِنْ عِيَالَكْ فِي الْمُلُكْ
وَ نِثَبِّتْ مُلْكَكْ مِنْ ذُرِّيَّةْ لِذُرِّيَّةْ.›» وَقْفَةْ.
5 يَا اللّٰهْ،
خَلِّي السَّمَاءْ تَشْكُرْ عَجَايْبَكْ!
أَيْوَى، يَشْكُرُوا صِدْقَكْ
فِي مُجْتَمَعْ الْقُدُّوسِينْ.
6 فِي السَّمَاءْ،
يَاتُو مِثِلْ اللّٰهْ؟
وَ فِي أُسْط الْإِلٰـهَاتْ،
يَاتُو يِشَابِهْ اللّٰهْ؟
7 هُو إِلٰـهْ يِرَجِّفْ مَلَمَّةْ الْقُدُّوسِينْ
وَ يِخَوِّفْ كُلَّ الْمُحَوِّقِينَهْ.
8 يَا اللّٰهْ، الْإِلٰـهْ الْقَادِرْ!
يَاتُو الْقَوِي مِثْلَكْ، يَا اللّٰهْ؟
وَ صِدْقَكْ مُحَوِّقَكْ.
9 إِنْتَ بَسْ التَّحْكِمْ الْبَحَرْ وَكِتْ يِهِيجْ
وَ تِهَدِّيهْ وَكِتْ يِقَوِّمْ مَوْجَهْ.
10 إِنْتَ كَتَلْت رَهَبْ غُولْ الْبَحَرْ
وَ رِحِكْت جَنَازْتَهْ
وَ شَتَّتْ عُدْوَانَكْ
بِقُوَّةْ إِيدَكْ.
11 السَّمَاءْ هِنْتَكْ
وَ الْأَرْض كُلَ هِنْتَكْ.
الدُّنْيَا وَ كُلَّ الْفَوْقهَا،
إِنْتَ بَسْ أَسَّسْتَهَا.
12 إِنْتَ بَسْ خَلَقْت الْمُنْشَاقْ
وَ الْوَطِي.
وَ جِبَالْ تَابُورْ وَ حَرْمُونْ
يِعِيطُوا مِنْ الْفَرَحْ بِأُسْمَكْ.
13 لَيْك إِنْتَ الدُّرَاعْ الْقَوِي
وَ الْإِيدْ الشَّدِيدَةْ
وَ إِيدَكْ الزَّيْنَةْ مَرْفُوعَةْ.
14 الْحَقّ وَ الْعَدَالَةْ،
هُمَّنْ أَسَاسْ مُلْكَكْ.
الْخَيْر وَ الصِّدِقْ
مَاشِينْ قِدَّامَكْ.
15 مَبْرُوكْ لِلشَّعَبْ
الْيَعَرْفُوا كِكَّيْف يَشْكُرُوكْ
وَ يُرُوغُوا فِي نُورْ وِجْهَكْ، يَا اللّٰهْ!
16 كُلَّ يَوْم يِنْبَسْطُوا بِأُسْمَكْ
وَ بِعَدَالْتَكْ، يُقُمُّوا.
17 أَشَانْ إِنْتَ بَسْ شَرَفْهُمْ وَ قُدْرِتْهُمْ
وَ بِرِضَاكْ إِنْتَ، رَاسْنَا يِنْرَفِعْ.
18 اللّٰهْ، هُو دَرَقَتْنَا.
أَيْوَى، قُدُّوسْ إِسْرَائِيلْ، هُو مَلِكْنَا.
19 وَ خَلَاصْ، بِرُؤْيَةْ
إِنْتَ كَلَّمْت لِمُؤمِنِينَكْ وَ قُلْت:
«أَنَا سَاعَدْت وَاحِدْ فَحَلْ
أَيْوَى، دَرَّجْت صَبِي فِي الشَّعَبْ.
20 أَنَا لِقِيتْ عَبْدِي دَاوُدْ
وَ مَسَحْتَهْ بِدِهِنْ الْخَاصّ وَ دَرَّجْتَهْ.
21 إِيدِي تُكُونْ مَعَايَهْ وَ تِقَوِّيهْ
وَ دُرَاعِي يِسَوِّيهْ شَدِيدْ.
22 «الْعَدُو مَا يَقْدَرْ يِغَفِّلَهْ
وَ الْمُجْرِمْ مَا يِعَيِّبَهْ.
23 أَشَانْ أَنَا نَرْحَكْ عُدْوَانَهْ قِدَّامَهْ
وَ نَضْرُبْ الْيَكْرَهَوْه.
24 «وَ صِدْقِي وَ رَحْمَتِي يُكُونُوا مَعَايَهْ
وَ بِأُسْمِي، يَرْفَعْ رَاسَهْ.
25 نُخُطّ الْبَحَرْ تِحِتْ إِيدَهْ
وَ الْبُحُورْ تِحِتْ إِيدَهْ الزَّيْنَةْ.
26 هُو يِنَادِينِي وَ يُقُولْ لَيِّ:
‹إِنْتَ أَبُويِ وَ إِنْتَ إِلٰـهِي
وَ جَبَلِي الْيِنَجِّينِي.›
27 أَنَا نِسَوِّيهْ وَلْد الْبِكِرْ
وَ هُو يُكُونْ عَالِي مِنْ مُلُوكْ الْأَرْض.
28 أَنَا نَحْفَضْ لَيَّهْ رَحْمَتِي إِلَى الْأَبَدْ
وَ مُعَاهَدَتِي كُلَ تُكُونْ لَيَّهْ ثَابْتَةْ.
29 وَ نِثَبِّتْ ذُرِّيّتَهْ إِلَى الْأَبَدْ
وَ كُرْسِي مُلْكَهْ عُمْرَهْ يَبْقَى طَوِيلْ
مِثِلْ عُمُرْ السَّمَاءْ.
30 كَنْ عِيَالَهْ يَابَوْا تَوْرَاتِي
وَ مَا يِتَابُعُوا قَوَانِينِي،
31 وَ كَنْ هُمَّنْ مَا يِحْتَرُمُوا شُرُوطِي
وَ مَا يَحْفَضَوْا أَوَامِرِي،
32 خَلَاصْ، أَنَا نِعَاقِبْهُمْ بِعَصَاةْ
فِي شَانْ ذُنُوبْهُمْ
وَ بِضَرِبِينْ
فِي شَانْ خَطَاهُمْ.
33 لَاكِنْ بَيْدَا كُلَ، أَنَا مَا نِوَقِّفْ رَحْمَتِي مِنْهُمْ
وَ لَا نِخَلِّي صِدْقِي.
34 وَ أَنَا مَا نَنْقُضْ مُعَاهَدَتِي
وَ لَا نِغَيِّرْ كَلَامِي.
35 وَ دَاهُو مَرَّةْ وَاحِدَةْ بَسْ،
أَنَا حَلَفْت بِقَدَاسْتِي
وَ قُلْت: ‹لَا! أَنَا مَا نُغُشّ دَاوُدْ.
36 ذُرِّيّتَهْ تَقْعُدْ إِلَى الْأَبَدْ
وَ كُرْسِي مُلْكَهْ يِطَوِّلْ قِدَّامِي
مِثِلْ الْحَرَّايْ
37 وَ مِثِلْ الْقَمَرْ.
وَ يُكُونْ ثَابِتْ إِلَى الْأَبَدْ
وَ شَاهِدْ أَمِينْ فِي السَّمَاءْ.›» وَقْفَةْ.
38 لَاكِنْ إِنْتَ، يَا رَبّ،
أَبَيْت وَ كِرِهْت الْمَلِكْ
الْإِنْتَ مَسَحْتَهْ وَ دَرَّجْتَهْ
وَ قَمَّيْت ضِدَّهْ.
39 وَ إِنْتَ نَقَضْت الْمُعَاهَدَةْ مَعَ عَبْدَكْ
وَ رَمَيْت تَاجَهْ فِي التُّرَابْ.
40 إِنْتَ سَوَّيْت خُرَمْ فِي كُلَّ زَرَايِبَهْ
وَ دَمَّرْت مُدُنَهْ الْقَوِيِّينْ.
41 وَ كُلَّ الْفَايْتِينْ نَهَبَوْه
وَ هُو بِقِي عِيَّيْرَةْ لِجِيرَانَهْ.
42 وَ إِنْتَ رَفَعْت الْإِيدْ الزَّيْنَةْ هَنَا عُدْوَانَهْ
وَ فَرَّحْت كُلَّ خُصْمَانَهْ.
43 وَ إِنْتَ وَجَّهْت ضِدَّهْ سَيْفَهْ حَلَالَهْ
وَ مَا سَاعَدْتَهْ فِي وَكْت الْحَرِبْ.
44 إِنْتَ وَدَّرْت شَرَفَهْ
وَ رَمَيْت كُرْسِي مُلْكَهْ فِي التُّرَابْ.
45 وَ شَيَّبْتَهْ قَبُلْ سِنِينَهْ
وَ دَسَّيْتَهْ فِي الْعَيْب. وَقْفَةْ.
46 لِمَتَى، يَا اللّٰهْ؟
تَابَى مَا تِوَجِّهْ عَلَيِّ دَايْماً؟
وَ لِمَتَى تِخَلِّي غَضَبَكْ
يَحْرِقْ مِثِلْ النَّارْ؟
47 فَكِّرْ فِي حَيَاتِي الْمَحْدُودَةْ!
إِنْتَ خَلَقْت النَّاسْ لِشُنُو؟
48 يَاتُو النَّادُمْ الْمَا يُدُوقْ الْمَوْت
وَ يَنْجَى مِنْ الْقَبُرْ؟ وَقْفَةْ.
49 يَا رَبّ! وَيْن رَحْمَتَكْ الْأَوَّلْ،
الْبِصِدْقَكْ إِنْتَ حَلَفْت بَيْهَا لِدَاوُدْ؟
50 يَا رَبّ! فَكِّرْ فِي الْمُعْيَارْ
الْمُوَجَّهْ لِعَبِيدَكْ.
فَكِّرْ فِي كُلَّ الشَّعَبْ
الْأَنَا مُكَلَّفْ بَيْهُمْ دَوْل.
51 يَا اللّٰهْ! فَكِّرْ فِي عُدْوَانَكْ
الْعَيَّرَوْا خَطْوَاتْ الْمَلِكْ
الْإِنْتَ مَسَحْتَهْ وَ دَرَّجْتَهْ.
52 بَارَكْ اللّٰهْ إِلَى الْأَبَدْ!
آمِينْ! آمِينْ!
© La Bible en arabe tchadien © Alliance biblique du Tchad, 2019
