مَزْمُورْ وَ غِنَيْ، لِيَوْم السَّبْت
1 عَدِيلْ كَنْ نَشْكُرُوا اللّٰهْ
وَ نَمْدَحَوْا أُسْمَكْ، يَا الْعَالِي!
2 بِفَجُرْ، نِبَلِّغْ بِرَحْمَتَكْ
وَ بِعَشِيَّةْ، نِخَبِّرْ بِصِدْقَكْ.
3 أَيْوَى، نَشْكُرَكْ بِآلَةْ
الْعِنْدَهَا عَشَرَةْ حَبِلْ
وَ بِأَمْ سِبَيْبَةْ
وَ بِحِسّ الْجِقِنْدِيَّةْ.
4 أَشَانْ إِنْتَ فَرَّحْتِنِي
بِعَمَلَكْ، يَا اللّٰهْ!
وَ بِخِدْمَةْ إِيدَكْ،
أَنَا رَقْرَقْت مِنْ الْفَرَحْ!
5 يَا اللّٰهْ، أَعْمَالَكْ كُبَارْ
وَ أَفْكَارَكْ مَا عِنْدُهُمْ حَدّ!
6 الْمُغَفَّلْ مَا يَعَرِفْ شَيّءْ
وَ الْمَطْمُوسْ مَا يَفْهَمْ الْأَشْيَاءْ دَوْل.
7 وَ كَنْ الْعَاصِيِينْ بَذَرَوْا مِثِلْ قَشّ أَخْضَرْ
وَ كَنْ كُلَّ الْفَسْلِينْ نَوَّرَوْا كُلَ،
خَلَاصْ فِي النِّهَايَةْ،
يِدَّمَّرَوْا إِلَى الْأَبَدْ.
8 وَ لَاكِنْ إِنْتَ فِي الْأَعَالِي.
يَا اللّٰهْ، إِنْتَ قَاعِدْ إِلَى الْأَبَدْ!
9 أَشَانْ دَاهُو عُدْوَانَكْ، يَا اللّٰهْ!
دَاهُو عُدْوَانَكْ قَاعِدِينْ يِدَّمَّرَوْا
وَ الظَّالِمِينْ يِشِتُّوا!
10 إِنْتَ تَرْفَعْ رَاسِي مِثِلْ قَرِنْ الْجَامُوسْ
وَ مَسَحْتِنِي بِدِهِنْ مُعَطَّرْ.
11 عُيُونِي يِشِيفُوا عُدْوَانِي
وَ أُدْنَيِّ يَسْمَعَوْا
الْيُقُمُّوا ضِدِّي لِيَهْجُمُونِي.
12 الصَّالِحْ يُطُولْ مِثِلْ نَخَلْ
وَ يِدَّقَّقْ مِثِلْ أَرْز لُبْنَانْ.
13 هُو مُمَقَّنْ فِي بَيْت اللّٰهْ
وَ يِخَضِّرْ فِي فَضَايَةْ إِلٰـهْنَا.
14 حَتَّى كَنْ عَجَّزْ كُلَ،
يَلْدَ فَوَاكِهْ
وَ دَايْماً عِنْدَهْ قُدْرَةْ
وَ قَاعِدْ أَخْضَرْ.
15 الصَّالِحْ يِبَلِّغْ بِعَدَالَةْ اللّٰهْ
وَ يُقُولْ: «هُو جَبَلْ مَلْجَئِي
وَ فِيَّهْ هُو، فَسَالَةْ مَا فِي.»
© La Bible en arabe tchadien © Alliance biblique du Tchad, 2019
