مَزْمُورْ
1 غَنُّوا لِلّٰهْ غِنَيْ جَدِيدْ
أَشَانْ هُو سَوَّى عَجَايِبْ.
بِزَيْنَايْتَهْ وَ دُرَاعَهْ الْمُقَدَّسْ،
هُو جَابْ النَّجَاةْ.
2 اللّٰهْ عَرَّفْ نَجَاتَهْ
وَ قِدَّامْ الْأُمَمْ، بَيَّنْ عَدَالْتَهْ.
3 هُو فَكَّرْ فِي رَحْمَتَهْ
وَ صِدْقَهْ مَعَ بَنِي إِسْرَائِيلْ.
لَحَدِّي آخِرْ الْأَرْض، شَافَوْا نَجَاتْنَا
الْجَايَةْ مِنْ إِلٰـهْنَا.
4 أَفْرَحَوْا بِاللّٰهْ، يَا سُكَّانْ كُلَّ الْأَرْض!
زَغْرُطُوا وَ غَنُّوا!
5 غَنُّوا لِلّٰهْ بِجِقِنْدِيَّةْ،
أَيْوَى، بِجِقِنْدِيَّةْ وَ بِغِنَيْ.
6 بِحِسّ بُرُنْجِي وَ بُوقْ،
أَفْرَحَوْا قِدَّامْ اللّٰهْ الْمَلِكْ!
7 خَلِّي الْبَحَرْ يِدَقْدِقْ
بِكُلَّ شَيّءْ الْفِي لُبَّهْ
وَ الْعَالَمْ وَ سُكَّانَهْ كُلَ.
8 خَلِّي الْبُحُورْ يِصَفُّقُوا
وَ مَعَاهُمْ، خَلِّي الْجِبَالْ يِزَغْرُطُوا!
9 يِزَغْرُطُوا قِدَّامْ اللّٰهْ
أَشَانْ يَجِي يَحْكِمْ الْأَرْض.
هُو يَحْكِمْ الْعَالَمْ بِالْعَدَالَةْ
وَ الشُّعُوبْ بِالْحَقّ.
© La Bible en arabe tchadien © Alliance biblique du Tchad, 2019
