المرة و الغول
1 وَ فِي الْبَكَانْ دَا، عَلَامَةْ عَجِيبَةْ بَانَتْ فِي السَّمَاءْ. أَنَا شِفْت مَرَةْ لَابْسَةْ الْحَرَّايْ مِثِلْ خَلَقْ وَ الْقَمَرْ قَاعِدْ تِحِتْ رِجِلَيْنهَا وَ فِي رَاسْهَا، عِنْدَهَا تَاجْ مُكَوَّنْ مِنْ 12 نُجُومْ. 2 وَ هِي غَلْبَانَةْ وَ وَجَعْ الطَّلَقَةْ كَرَبَاهَا وَ هِي صَرَخَتْ وَ قَرِيبْ تَلْدَ.
3 وَ عَلَامَةْ تَانِيَةْ بَانَتْ فِي السَّمَاءْ. وَ شِفْت غُولْ أَحْمَرْ يِشَابِهْ مِثِلْ تُمْسَاحْ كَبِيرْ بِلْحَيْن. وَ عِنْدَهْ سَبْعَةْ رَاسْ وَ عَشَرَةْ قُرُونْ. وَ فِي أَيِّ رَاسْ عِنْدَهْ تَاجْ صَغَيَّرْ. 4 وَ هُو قَشَّ تِلْت النُّجُومْ مِنْ السَّمَاءْ بِدَنَبَهْ وَ رَمَاهُمْ فِي الْأَرْض. وَ الْغُولْ دَا وَقَفْ قِدَّامْ الْمَرَةْ التِّدَوْر تَلْدَ وَ قَاعِدْ يَرْجَى أَشَانْ مِنْ وِلْدَتْ بَسْ يَاكُلْ صَغِيرْهَا. 5 وَ هِي وِلْدَتْ وِلَيْد وَ هُو الْمَسِيحْ اللَّابُدَّ يَحْكِمْ فِي الْأُمَمْ بِعَصَاةْ هَنَا حَدِيدْ. وَ الْغُولْ مَا أَكَلَهْ أَشَانْ وِلَيْدهَا دَا خَطَفَوْه وَ وَدَّوْه لِلّٰهْ وَ لِعَرْشَهْ. 6 وَ الْمَرَةْ عَرَّدَتْ وَ مَشَتْ فِي الْخَلَاءْ فِي الْبَكَانْ الْاللّٰهْ جَهَّزَهْ لَيْهَا. وَ هِنَاكْ يِرَيُّسُوهَا لِمُدَّةْ 1 260 يَوْم.
7 وَ دُوَاسْ بِقِي فِي السَّمَاوَاتْ. وَ مِكَايِيلْ وَ الْمَلَائِكَةْ الْمَعَايَهْ دَاوَسَوْا الْغُولْ وَ مَلَائِكَتَهْ. 8 وَ قُدْرَةْ الْغُولْ مَا تَمَّتْ لِلدُّوَاسْ. وَ أَنَّصَرَوْا فَوْقَهْ وَ طَرَدَوْهُمْ لِلْغُولْ وَ مَلَائِكَتَهْ مِنْ السَّمَاوَاتْ. 9 وَ الْغُولْ الْكَبِيرْ رَمَوْه وَ هُو بَسْ الدَّابِي الْقَاعِدْ مِنْ زَمَانْ وَ أُسْمَهْ إِبْلِيسْ وَ الشَّيْطَانْ وَ هُو الْكَدَّابْ الْغَشَّ نَاسْ الدُّنْيَا كُلُّهُمْ. وَ هُو رَمَوْه فِي الْأَرْض وَ مَلَائِكَتَهْ كُلَ رَمَوْهُمْ مَعَايَهْ.
10 وَ أَنَا سِمِعْت حِسّ شَدِيدْ كَلَّمْ فِي السَّمَاءْ وَ قَالْ:
«النَّجَاةْ الْاللّٰهْ جَهَّزَاهَا جَاتْ.
وَ هَسَّعْ هُو وَصَّفْ قُدُرْتَهْ خَلَاصْ.
مَمْلَكَةْ رَبِّنَا اللّٰهْ جَاتْ
وَ الْمَسِيحْ الْاللّٰهْ خَطَّاهْ فَوْقهَا
بَدَا يَحْكِمْ بِقُدْرَةْ.
أَكِيدْ، رَمَوْه إِبْلِيسْ
التَّاهِمْ أَخْوَانَّا الْمُؤمِنِينْ.
أَوَّلْ هُو قَاعِدْ يَتْهَمْهُمْ
قِدَّامْ اللّٰهْ لَيْل وَ نَهَارْ
وَ خَلَاصْ هُو رَمَوْه.
11 وَ هُمَّنْ أَنَّصَرَوْا فَوْقَهْ
بِقُدْرَةْ دَمّ الْحَمَلْ
وَ بِشَهَادِتْهُمْ لَيَّهْ.
وَ هُمَّنْ حَبَّوْا رَبُّهُمْ زِيَادَةْ مِنْ نُفُوسْهُمْ
لَحَدِّي أَبَوْا مَا يَجْرُوا مِنْ الْمَوْت.
12 يَا السَّمَاوَاتْ وَ كُلَّ سُكَّانْكُو،
أَفْرَحَوْا!
لَاكِنْ يَا الْأَرْض وَ الْبَحَرْ،
التَّعَبْ يَرْجَاكُو
أَشَانْ إِبْلِيسْ دَلَّى لَيْكُو
وَ هُو زَعْلَانْ بِلْحَيْن
أَشَانْ هُو يَعَرِفْ وَكْتَهْ ضَيِّقْ.»
13 وَ وَكِتْ الْغُولْ عِرِفْ هُو رَمَوْه فِي الْأَرْض خَلَاصْ، هُو جَرَى وَرَاءْ الْمَرَةْ الْوِلْدَتْ الْوِلَيْد أَشَانْ يَكْرُبْهَا. 14 لَاكِنْ اللّٰهْ أَنْطَاهَا جَنَاحَيْ إِتْنَيْن مِثِلْ جَنَاحَيْ هَنَا صَقُرْ كَبِيرْ بِلْحَيْن أَشَانْ تِطِيرْ بَعِيدْ مِنْ الدَّابِي وَ تَمْشِي فِي الْخَلَاءْ فِي الْبَكَانْ الْاللّٰهْ جَهَّزَهْ لَيْهَا. وَ هِنَاكْ هِي يِرَيُّسُوهَا مُدَّةْ تَلَاتَةْ سَنَةْ وَ نُصّ. 15 وَ الدَّابِي فَتَحْ خَشْمَهْ وَ أَلْمِي مَرَقْ مِثِلْ سَيْل جَارِي وَرَاءْ الْمَرَةْ أَشَانْ يَاكُلْهَا. 16 وَ لَاكِنْ الْأَرْض فَتَحَتْ خَشُمْهَا وَ زَرَطَتْ الْبَحَرْ الْجَاءْ مِنْ خَشُمْ الْغُولْ أَشَانْ تِسَاعِدْ الْمَرَةْ. 17 وَ فِي الْبَكَانْ دَا، الْغُولْ زِعِلْ زَعَلْ شَدِيدْ مِنْ الْمَرَةْ وَ قَمَّ يِحَارِبْهُمْ لِعِيَالْهَا الْآخَرِينْ وَ هُمَّنْ النَّاسْ الْيِتَابُعُوا وَصَايَا اللّٰهْ وَ شَهَادَةْ عِيسَى.
18 وَ الْغُولْ وَقَفْ فِي خَشُمْ الْبَحَرْ.
© La Bible en arabe tchadien © Alliance biblique du Tchad, 2019
