جماعة المُؤمِنين في أفَسُس
1 «أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ أَفَسُسْ.
دَاهُو كَلَامِي، أَنَا الشَّايِلْ السَّبْعَةْ نُجُومْ فِي إِيدِي الزَّيْنَةْ وَ رَايِغْ أَمْبَيْنَاتْ السَّبْعَةْ فَانُوسْ هَنَا دَهَبْ.2 أَنَا نَعَرِفْ كُلَّ شَيّءْ الْإِنْتَ سَوَّيْتَهْ وَ جُهْدَكْ فِي الْخِدْمَةْ وَ ثَبَاتَكْ فَوْقهَا. وَ إِنْتَ مَا قَصَّدْت بِالنَّاسْ الْيِسَوُّوا الشَّرّ. وَ إِنْتَ جَرَّبْت النَّاسْ الْيَكْدُبُوا وَ يُقُولُوا هُمَّنْ رُسُلْ الْمَسِيحْ وَ إِنْتَ أَكَّدْت كَدَرْ هُمَّنْ كَدَّابِينْ. 3 أَنَا نَعَرِفْ كَدَرْ التَّعَبْ جَاءْ فَوْقَكْ بِسَبَبْ أُسْمِي وَ إِنْتَ قَاعِدْ تَحْمَلَهْ بِصَبُرْ وَ نَعَرِفْ إِنْتَ مَا كِسِلْت.4 لَاكِنْ أَنَا لِقِيتْ فَوْقَكْ شَيّءْ وَاحِدْ مَا عَدِيلْ. إِنْتَ خَلَّيْت مِنَّكْ مَحَبِّتَكْ الْقَوِيَّةْ الْأَوَّلْ عِنْدَكْ. 5 هَسَّعْ فَكِّرْ فِي الْكَلَامْ دَا وَ أَعَرِفْ كَدَرْ أَكِيدْ إِنْتَ مَرَقْت بَعِيدْ مِنْ الدَّرِبْ. وَ خَلَاصْ، تُوبْ مِنْ ذُنُوبَكْ وَ خَلِّي حَالَكْ تَبْقَى مِثِلْ أَوَّلْ. وَ كَنْ مَا تُتُوبْ، أَنَا نَجِيكْ وَ نَرْفَعْ فَانُوسَكْ مِنْ بَكَانَهْ. 6 وَ لَاكِنْ لِقِيتْ فَوْقَكْ شَيّءْ عَدِيلْ كُلَ. إِنْتَ تَكْرَهْ مِثِلْ أَنَا كُلَ نَكْرَهَهْ الشَّيّءْ الْقَاعِدِينْ يِسَوُّوهْ التَّلَامِيذ هَنَا نِيقُولَا.7 أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ.وَ أَيِّ نَادُمْ الْيِنَّصِرْ، أَنَا نَنْطِيهْ إِذِنْ أَشَانْ يَاكُلْ مِنْ شَدَرَةْ الْحَيَاةْ الْقَاعِدَةْ فِي جَنَّةْ اللّٰهْ.جماعة المُؤمِنين في إِزْمِير
8 «وَ أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ إِزْمِيرْ.
دَاهُو كَلَامِي، أَنَا الْأَوَّلْ وَ الْأَخِيرْ، أَنَا الْمُتّْ وَ حِيِيتْ.9 أَنَا نَعَرِفْ التَّعَبْ اللِّقَاكْ وَ نَعَرِفْ إِنْتَ بِقِيتْ مِسْكِينْ وَ لَاكِنْ عِنْدَكْ بَرَكَةْ كَبِيرَةْ. وَ نَعَرِفْ الْكَلَامْ الْفَسِلْ الْيُقُولُوهْ فَوْقَكْ النَّاسْ الْيِسَوُّوا نُفُوسْهُمْ يَهُودْ وَ لَاكِنْ هُمَّنْ مَا يَهُودْ. يِصَلُّوا فِي بَيْت الصَّلَاةْ وَ لَاكِنْ هُمَّنْ جَمَاعَةْ إِبْلِيسْ. 10 مَا تَخَافْ مِنْ الضِّيقَةْ الْقَرِيبْ تَجِيكْ. خُطُّوا بَالْكُو! إِبْلِيسْ يَكْرُبْ وَاحِدِينْ مِنْكُو فِي السِّجِنْ وَ إِيمَانْكُو يِجَرُّبُوهْ. وَ فِي مُدَّةْ عَشَرَةْ يَوْم، تِضَيُّقُوا ضِيقَةْ شَدِيدَةْ. أَقْعُدُوا ثَابْتِينْ فِي إِيمَانْكُو لَحَدِّي الْمَوْت وَ خَلَاصْ نَنْطِيكُو تَاجْ هَنَا الْحَيَاةْ الْأَبَدِيَّةْ.11 أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ.وَ أَيِّ نَادُمْ الْيِنَّصِرْ، مَا يَخَافْ مِنْ الْمَوْت التَّانِي.جماعة المُؤمِنين في بَرْغَامُس
12 «وَ أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ بَرْغَامُسْ.
دَاهُو كَلَامِي، أَنَا الْعِنْدِي سَيْف الْمُطَرَّقْ مِنْ جَايْ وَ جَايْ.13 أَنَا نَعَرِفْ الْبَكَانْ الْإِنْتُو سَاكْنِينْ فَوْقَهْ وَ هُو الْبَكَانْ الْإِبْلِيسْ خَطَّ فَوْقَهْ كُرْسِي حَقَّهْ. وَ إِنْتُو مُنْكَرِبِينْ فِي أُسْمِي. وَ إِنْتُو مَا نَكَرْتُوا إِيمَانْكُو بَيِّ وَكِتْ كَتَلَوْا أَنْتِبَاسْ فِي أُسُطْكُو وَ هُو شَهَدْ لَيِّ شَهَادَةْ ثَابْتَةْ فِي الْبَكَانْ الْإِبْلِيسْ سَاكِنْ فَوْقَهْ.14 لَاكِنْ أَنَا لِقِيتْ فَوْقَكْ شَيّءْ وَاحِدْ مَا عَدِيلْ. وَ عِنْدَكْ نَاسْ وَاحِدِينْ يِتَابُعُوا تَعْلِيمْ مِثِلْ تَعْلِيمْ بَلْعَامْ. وَ زَمَانْ بَلْعَامْ عَلَّمْ الْمَلِكْ بَلَاقْ كِكَّيْف يِوَدِّي بَنِي إِسْرَائِيلْ فِي الذُّنُوبْ لَحَدِّي أَكَلَوْا اللَّحَمْ الْأَوَّلْ قَدَّمَهْ ضَحِيَّةْ لِأَصْنَامَهْ وَ هُمَّنْ قَمَّوْا زَنَوْا. 15 وَ بَتَّانْ نَاسَكْ وَاحِدِينْ قَاعِدِينْ يِتَابُعُوا تَعْلِيمْ تَلَامِيذ نِيقُولَا. 16 وَ أَشَانْ دَا، نُقُولْ لَيْك تُوبْ مِنْ ذُنُوبَكْ. وَ كَنْ مَا تُبْت، أَنَا نَجِي لَيْك قَرِيبْ وَ نِدَاوِسْ النَّاسْ دَوْل بِالْسَّيْف الْمَارِقْ مِنْ خَشْمِي.17 أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ.وَ أَيِّ نَادُمْ الْيِنَّصِرْ، أَنَا نَنْطِيهْ الْمَنَّةْ الْمُلَبَّدَةْ وَ بَتَّانْ نَنْطِيهْ حَجَرْ أَبْيَضْ الْمَكْتُوبْ فَوْقَهْ أُسُمْ جَدِيدْ وَ مَا فِي نَادُمْ يَعَرْفَهْ إِلَّا النَّادُمْ الْيَلْقَاهْ مِنِّي.جماعة المُؤمِنين في ثِيَاتِيرَة
18 «وَ أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ ثِيَاتِيرَةْ.
دَاهُو كَلَامِي، أَنَا إِبْن اللّٰهْ، الْعُيُونِي مِثِلْ جَمُرْ مُقَرْقِرْ وَ رِجِلَيْنِي يِرَارُوا مِثِلْ نَحَاسْ مُجُمَّرْ.19 أَنَا نَعَرِفْ خِدِمْتَكْ. نَعَرِفْ مَحَبِّتَكْ وَ إِيمَانَكْ وَ صَبْرَكْ فِي التَّعَبْ. وَ نَعَرِفْ كَدَرْ خِدِمْتَكْ الْهَسَّعْ أَخَيْر مِنْ الْأَوَّلْ.20 لَاكِنْ أَنَا لِقِيتْ فَوْقَكْ شَيّءْ وَاحِدْ مَا عَدِيلْ. إِنْتَ خَلَّيْت مَرَةْ مِثِلْ إِزَبِيلْ تِسَوِّي نَفِسْهَا نَبِيَّةْ وَ تِعَلِّمْ عَبِيدِي وَ تُغُشُّهُمْ لَحَدِّي يَزْنَوْا وَ يَاكُلُوا لَحَمْ الْقَدَّمَوْه ضَحِيَّةْ لِلْأَصْنَامْ. 21 أَنَا أَنْطَيْتهَا فُرْصَةْ لِتُتُوبْ مِنْ ذُنُوبْهَا لَاكِنْ هِي أَبَتْ مَا تَابَتْ مِنْ الزِّنَى. 22 خُطّ بَالَكْ! أَنَا نَرْمِيهَا وَ هِي تَبْقَى مَرْضَانَةْ تَرْقُدْ فِي سَرِيرْهَا. وَ النَّاسْ الزَّنَوْا مَعَاهَا نَرْمِيهُمْ فِي ضِيقَةْ شَدِيدَةْ، كَنْ مَا يُتُوبُوا وَ مَا يِخَلُّوا دَرِبْهَا. 23 وَ نَضْرُبْ تَلَامِيذْهَا وَ يُمُوتُوا. وَ بَيْدَا، كُلَّ جَمَاعَاتْ الْمُؤمِنِينْ يَعَرْفُوا كَدَرْ أَنَا نَكْشِفْ قَلِبْ هَنَا أَيِّ نَادُمْ وَ نَعَرِفْ فِكْرَهْ. وَ يَعَرْفُوا كَدَرْ أَيِّ وَاحِدْ مِنْكُو نِجَازِيهْ. 24 وَ أَكِيدْ، نَاسْ قَاعِدِينْ أَمْبَيْنَاتْكُو فِي ثِيَاتِيرَةْ الْمَا تَابَعَوْا تَعْلِيمْهَا وَ مَا عَلَّمَوْا مِنْهَا الْعِلِمْ الْبُقُولُوا هُو مِنْ أَسْرَارْ إِبْلِيسْ. وَ لَيْكُو إِنْتُو، نُقُولْ أَنَا مَا نُخُطّ فَوْقكُو بَتَّانْ وَصِيَّةْ تَقِيلَةْ، 25 إِلَّا نُقُولْ أَقْعُدُوا ثَابْتِينْ فِي الْكَلَامْ الْعِنْدُكُو لَحَدِّي نَجِي.26 وَ أَيِّ نَادُمْ الْيِنَّصِرْ وَ يِتَابِعْ حَسَبْ الْأَنَا نِدَوْرَهْ لَحَدِّي الْيَوْم الْأَخِيرْ، أَنَا نُخُطَّهْ يَحْكِمْ فِي الْأُمَمْ. 27 وَ هُو يَحْكِمْ فَوْقهُمْ بِعَصَاةْ هَنَا حَدِيدْ وَ يِكَسِّرْهُمْ مِثِلْ جِرَارْ الطِّينَةْ. 28 أَيْوَى، مِثِلْ أَبُويِ اللّٰهْ أَنْطَانِي قُدْرَةْ، أَنَا كُلَ نَنْطِيهْ نَجْمَةْ الصَّبَاحْ.29 أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ.© La Bible en arabe tchadien © Alliance biblique du Tchad, 2019
