السماء مفْتوح
1 وَ بَعَدْ دَا، أَنَا شِفْت شَيّءْ آخَرْ. شِفْت بَابْ مَفْتُوحْ فِي السَّمَاءْ. وَ سِمِعْت بَتَّانْ نَفْس الْحِسّ الْأَوَّلْ سِمِعْتَهْ، الْحِسّ الْيِشَابِهْ مِثِلْ حِسّ بُرُنْجِي. وَ هُو حَجَّى لَيِّ وَ قَالْ: «تَعَالْ لَيِّ هِنِي فَوْق وَ نِوَصِّفَكْ الشَّيّءْ اللَّابُدَّ يَبْقَى بَعَدَيْن.»
2 وَ طَوَّالِي، رُوحْ اللّٰهْ نَزَلْ فَوْقِي وَ شِفْت عَرْش فِي السَّمَاوَاتْ وَ سِيدَهْ قَاعِدْ فَوْقَهْ. 3 وَ الْقَاعِدْ فِي الْعَرْش دَا يِرَارِي مِثِلْ فَارُوسْ وَ عَقِيقْ أَحْمَرْ. وَ الْعَرْش مُحَوَّقْ بِشَيّءْ مِثِلْ حَجَّازْ الْمَطَرْ الْيِرَارِي مِثِلْ يَاقُوتْ أَخْضَرْ. 4 وَ أَنَا شِفْت 24 كَرَاسِي مُحَوِّقِينْ الْعَرْش دَا وَ 24 شُيُوخْ قَاعِدِينْ فَوْقهُمْ. وَ أَيِّ وَاحِدْ لَابِسْ خَلَقْ أَبْيَضْ وَ عِنْدَهْ تَاجْ هَنَا دَهَبْ فِي رَاسَهْ. 5 وَ شِفْت بَرَّاقَةْ تَشْلَعْ مِنْ الْعَرْش وَ سِمِعْت حَرَكَةْ شَدِيدَةْ وَ رَعَدْ. وَ قِدَّامْ الْعَرْش، أَنَا شِفْت سَبْعَةْ مَشَاهِيبْ النَّارْ وَ هُمَّنْ الْأَرْوَاحْ السَّبْعَةْ هَنَا اللّٰهْ. 6 وَ بَتَّانْ قِدَّامْ الْعَرْش، شِفْت بَكَانْ وَسِيعْ يِشَابِهْ مِثِلْ بَحَرْ هَنَا أَلْمِي صَافِي مَرَّةْ وَاحِدْ لَحَدِّي قَعَرَهْ يِنْشَافْ.
وَ فِي دَايِرْ الْعَرْش، أَنَا شِفْت أَرْبَعَةْ مَخْلُوقِينْ سَمَاوِيِّينْ وَ جِلِدْهُمْ مَلَانْ بِعُيُونْ مِنْ وَرَاءْ وَ مِنْ قِدَّامْ. 7 وَ الْمَخْلُوقْ الْأَوَّلَانِي يِشَابِهْ مِثِلْ دُودْ وَ التَّانِي مِثِلْ تَوْر وَ التَّالِتْ عِنْدَهْ وِجِهْ مِثِلْ وِجِهْ الْإِنْسَانْ وَ الرَّابِعْ يِشَابِهْ مِثِلْ صَقُرْ قَاعِدْ يِطِيرْ. 8 وَ أَيِّ وَاحِدْ مِنْ الْأَرْبَعَةْ مَخْلُوقِينْ السَّمَاوِيِّينْ دَوْل عِنْدَهْ سِتَّةْ جَنَاحَيْ مَلَانِينْ بِعُيُونْ مِنْ فَوْق وَ مِنْ تِحِتْ. وَ قَاعِدِينْ يِغَنُّوا دَايْماً لَيْل وَ نَهَارْ وَ أَبَداً مَا خَلَّوْا غِنَيْهُمْ. وَ قَاعِدِينْ يُقُولُوا:
«قُدُّوسْ، قُدُّوسْ، قُدُّوسْ
اللّٰهْ الرَّبّ الْقَادِرْ
الْقَاعِدْ فِي الْوَكِتْ الْفَاتْ
وَ فِي الْوَكِتْ الْحَاضِرْ
وَ فِي الْوَكِتْ الْجَايِ.»
9 وَ الْمَخْلُوقِينْ دَوْل قَاعِدِينْ يِمَجُّدُوا الْقَاعِدْ فِي الْعَرْش وَ هُو الْحَيّ إِلَى الْأَبَدْ. وَ هُمَّنْ قَاعِدِينْ يَحْمُدُوهْ وَ يَشْكُرُوهْ. وَ أَيِّ وَكِتْ يِمَجُّدُوهْ مِثِلْ دَا، 10 الشُّيُوخْ الْعِشْرِينْ وَ أَرْبَعَةْ يَسْجُدُوا قِدَّامْ الْقَاعِدْ فِي الْعَرْش وَ يَعَبُدُوهْ، هُو الْحَيّ إِلَى الْأَبَدْ. وَ أَيِّ وَاحِدْ يَرْمِي تَاجَهْ قِدَّامْ الْعَرْش وَ يُقُولْ:
11 «يَا رَبِّنَا اللّٰهْ، كُلَّ شَيّءْ
هَنَا الْمَجْد وَ الْإِكْرَامْ وَ الْقُدْرَةْ
وَاجِبْ لَيْك إِنْتَ
أَشَانْ إِنْتَ بَسْ خَلَقْت كُلَّ شَيّءْ
وَ بِنِيّتَكْ إِنْتَ بَسْ،
كُلَّ شَيّءْ بِقِي وَ قَاعِدْ.»
© La Bible en arabe tchadien © Alliance biblique du Tchad, 2019
