1 وَ بِاللَّيْل، فِي سَرِيرِي،
أَنَا فَتَّشْت الْقَلْبِي بِرِيدَهْ،
أَنَا فَتَّشْتَهْ وَ مَا لِقِيتَهْ.
2 أَنَا قَمَّيْت وَ حَوَّقْت الْمَدِينَةْ
فِي الشَّوَارِعْ وَ فِي أَيِّ بَكَانْ.
أَنَا فَتَّشْت الْقَلْبِي بِرِيدَهْ،
أَنَا فَتَّشْتَهْ وَ مَا لِقِيتَهْ.
3 وَ الْحُرَّاسْ الْبُرُوغُوا الْحِلَّةْ
بِاللَّيْل لِقَوْنِي
وَ أَنَا قُلْت:
«مَا شِفْتُوا الْقَلْبِي بِرِيدَهْ؟»
4 وَ مِنْ فُتّْ مِنْهُمْ،
أَنَا لِقِيتْ الْقَلْبِي بِرِيدَهْ.
حَضَنْتَهْ وَ مَا خَلَّيْتَهْ
لَحَدِّي وَدَّيْتَهْ فِي حَوْش أَمِّي
وَ دَخَّلْتَهْ فِي بَيْت هَنَا الْوِلْدَتْنِي
لَحَدِّي فِي الْغُرْفَةْ.
5 يَا بَنَاتْ مَدِينَةْ الْقُدُسْ،
نَحَلِّفْكَنْ بِجَمَالْ الْغُزْلَانْ
وَ أَرَايِلْ الْكَدَادَةْ
كَدَرْ مَا تِقَوِّمَنْ
وَ لَا تِوَعَّنْ الْحُبّ قَبُلْ وَكْتَهْ.
كلام المحْبوبة
6 يَاتُو الْجَايِ مِنْ الصَّحَرَاءْ
وَ عَجَاجَهْ مِثِلْ دُخَّانْ الطَّالِعْ؟
يَاتُو الْمُعَطَّرْ بِصَنْدَلْ وَ لُبَانْ
وَ بِكُلَّ دُخَّانْ التُّجَّارْ؟
7 أَيْوَى، دَا سُلَيْمَانْ الرَّاكِبْ
فِي بَاصُورْ عُطْفِتَهْ.
مُحَوِّقِينَهْ 60 رُجَالْ فُرَّاسْ
مِنْ أَحْسَنْ فُرَّاسْ بَنِي إِسْرَائِيلْ.
8 كُلُّهُمْ شَايْلِينْ سُيُوفْ
وَ هُمَّنْ نَاسْ مُحَارِبِينْ.
أَيِّ وَاحِدْ سَيْفَهْ فِي صُلْبَهْ
جَاهِزْ لِأَيِّ خَطَرْ الْيَجِي بِاللَّيْل.
9 الْمَلِكْ سُلَيْمَانْ عِنْدَهْ عُطْفَةْ
السَّوَّوْهَا بِحَطَبْ لُبْنَانْ.
10 وَ عَمَدْهَا مُجَمَّلِينْ بِفُضَّةْ
وَ بَاصُورْهَا بِدَهَبْ.
وَ فُرَاشْهَا لَوْنَهْ قَرَضِي
وَ بَنَاتْ مَدِينَةْ الْقُدُسْ عَدَّلَنْ دَاخِلْهَا
وَ جَمَّلَنَّهْ بِمَحَبَّةْ.
11 أَمُرْقَنْ، يَا بَنَاتْ صَهْيُون!
تَعَالَنْ شِيفَنْ الْمَلِكْ سُلَيْمَانْ!
عِنْدَهْ تَاجْ الْأَمَّهْ خَطَّتَهْ لَيَّهْ فِي يَوْم عَرِيسَهْ
وَ دَا يَوْم الْفَرَحْ مَلَا قَلْبَهْ.
© La Bible en arabe tchadien © Alliance biblique du Tchad, 2019
