كلام المحْبوب
1 أَيْوَى، أَنَا نَدْخُلْ فِي جِنَيْنِتِي،
يَا أَخْتِي، يَا عَرُوسِي!
وَ نَقْطَعْ صَنْدَلِي
وَ دُخَّانِي الْحَلُو!
وَ نَاكُلْ عَسَلِي مِنْ شَمْعِتَهْ
وَ نَشْرَبْ عَصِيرْ عِنَبِي وَ لَبَنِي.
كلام الآخرين
آكُلُوا، يَا الرُّفْقَانْ!
أَشَرْبَوْا وَ أَسْكَرَوْا مِنْ الْحُبّ!
كلام المحْبوبة
2 أَيْوَى، أَنَا نُمْت وَ قَلْبِي وَاعِي.
وَ دَاهُو حَبِيبِي طَقَّ الْبَابْ وَ قَالْ:
«أَفْتَحَيْ لَيِّ، يَا أَخْتِي، يَا حَبِيبْتِي،
يَا حَمَامْتِي، يَا جَمِيلْتِي!
أَشَانْ الْكَرَنْج غَطَّى رَاسِي
وَ شَعَرِي أَنْبَلَّ!»
3 وَ أَنَا رَدَّيْت وَ قُلْت:
«أَنَا سَلَّيْت خَلَقِي
وَ كِكَّيْف بَتَّانْ نَلْبَسَهْ؟
أَنَا غَسَّلْت رِجِلَيْنِي
وَ كِكَّيْف بَتَّانْ نَوَسِّخْهُمْ؟»
4 حَبِيبِي مَدَّ إِيدَهْ لِيَفْتَحْ الْبَابْ
وَ قَلْبِي قَاعِدْ يَضْرُبْ مِنْ الْفَرَحْ.
5 وَ قَمَّيْت لِنَفْتَحْ لِحَبِيبِي
وَ عِطِرْ سَالْ مِنْ إِيدَيْنِي.
وَ مِنْ أَصَابْعِي، الْعِطِرْ
مَلَتْ تَرْبَازْ الْبَابْ.
6 أَنَا فَتَحْت لِحَبِيبِي
وَ لَاكِنْ حَبِيبِي قَبَّلْ وَ فَاتْ
وَ قَلْبِي أَلْحَيَّرْ.
مَرَقْت فَتَّشْتَهْ وَ مَا لِقِيتَهْ
وَ نَادَيْتَهْ وَ هُو مَا رَدَّ لَيِّ.
7 وَ الْحُرَّاسْ هَنَا دُرْدُرْ الْمَدِينَةْ لِقَوْنِي.
هُمَّنْ فَرَشَوْنِي وَ جَرَحَوْنِي
وَ شَالَوْا لَفَّاحْتِي.
8 يَا بَنَاتْ مَدِينَةْ الْقُدُسْ،
نَحَلِّفْكَنْ!
كَنْ لِقِيتَنْ حَبِيبِي، قُولَنْ لَيَّهْ
كَدَرْ أَنَا مِرِضْت
مِنْ كَتَرَةْ الشَّهْوَةْ.
كلام البنات
9 بِشُنُو حَبِيبْكِ فَاتْ
الصُّبْيَانْ الْآخَرِينْ؟
قُولِي لَيْنَا،
إِنْتِ الْأَجْمَلْ مِنْ الْعَوِينْ!
بِشُنُو حَبِيبْكِ فَاتْ
الصُّبْيَانْ الْآخَرِينْ،
لَحَدِّي تَحَلِّفِينَا فِي شَانَهْ؟
كلام المحْبوبة
10 حَبِيبِي جَمِيلْ وَ نَشِيطْ
وَ بَيِّنْ فِي أُسْط الْآلَافْ.
11 وِجْهَهْ مِثِلْ الدَّهَبْ الصَّافِي
وَ شَعَرَهْ مُلَوْلَوْ وَ أَزْرَقْ كُرُمْ
مِثِلْ لَوْن الْغُرَابْ.
12 عُيُونَهْ سَمْحِينْ
مِثِلْ حَمَامْ جَنْب الْوَادِي.
وَ بُيُضْ مِثِلْ غَسَّلَوْهُمْ بِلَبَنْ
وَ قَاعِدِينْ فِي وِجِهْ جَمِيلْ.
13 وَ دِقْنَهْ مِثِلْ جِنَيْنَةْ الْمَزْرُوعَةْ بِرِيحَةْ
التِّقَوِّمْ شَدَرْ الدُّخَّانْ.
وَ شَلَالِيفَهْ مِثِلْ نُوَّارْ السِّتَّيْب
وَ يِنَقِّطْ مِنْهُمْ الْعِطِرْ.
14 وَ إِيدَيْنَهْ مِثِلْ عِصَيْ هَنَا دَهَبْ
الْمُجَمَّلْ بِحَجَرْ غَالِي.
وَ جِتِّتَهْ مِثِلْ لَوْح هَنَا عَاجْ
الْمُجَمَّلْ بِيَاقُوتْ أَخْضَرْ.
15 وَ رِجِلَيْنَهْ
مِثِلْ عَمَدْ هَنَا رُخَامْ أَبْيَضْ
فِي أَسَاسْ هَنَا دَهَبْ صَافِي.
هُو أَجْمَلْ مِنْ جِبَالْ لُبْنَانْ
وَ مَعْرُوفْ مِثِلْ شَدَرْ الْأَرْز.
16 خَشْمَهْ حَلُو
وَ جِسْمَهْ كُلَّ كَيْ مَحْبُوبْ.
وَ دَا بَسْ، حَبِيبِي
وَ دَا بَسْ، رَفِيقِي.
أَعَرْفَنَّهْ، يَا بَنَاتْ مَدِينَةْ الْقُدُسْ.
© La Bible en arabe tchadien © Alliance biblique du Tchad, 2019
