الحال الواجْبة
1 ذَكِّرْ الْأَخْوَانْ أَشَانْ يَسْمَعَوْا كَلَامْ الْحَكُومَةْ وَ الْكُبَارَاتْ وَ يِتَابُعُوا كَلَامْهُمْ. وَ خَلِّي يَبْقَوْا جَاهِزِينْ لِيِسَوُّوا الْخَيْر فِي كُلِّ حَالْ. 2 وَ خَلِّي مَا يُقُولُوا كَلَامْ فَسِلْ فِي أَيِّ نَادُمْ وَ لَا يِهَارُجُوا. وَ خَلِّي يِحَجُّوا بِنَفَسْ بَارِدْ وَ بِأَدَبْ مَعَ كُلَّ النَّاسْ.
3 خَلِّي مَا نَنْسَوْا كَدَرْ أَوَّلْ أَنِحْنَ كُلَ مِثِلْهُمْ، جُهَّالْ وَ عَاصِيِينْ. أَوَّلْ أَنِحْنَ مُوَدِّرِينْ وَ شَهْوَاتْنَا مَلَكَوْنَا وَ قُلُوبْنَا مَرْبُوطِينْ فِي حَلَاتْ الدُّنْيَا. أَوَّلْ أَنِحْنَ عَايْشِينْ بِالْفَسَالَةْ وَ الْحُسُدْ، وَ قَاعِدِينْ نَكْرَهَوْا النَّاسْ وَ النَّاسْ يَكْرَهَوْنَا. 4 وَ لَاكِنْ وَكِتْ اللّٰهْ مُنَجِّينَا بَيَّنْ مَحَنِّتَهْ وَ مَحَبِّتَهْ لِلْإِنْسَانْ، 5 هُو نَجَّانَا. وَ دَا مَا بِسَبَبْ أَيِّ عَمَلْ صَالِحْ السَّوَّيْنَاهْ لَاكِنْ بِسَبَبْ رَحْمَتَهْ هُو. وَ هُو غَسَّلَانَا بِالْوَالُودَةْ التَّانِيَةْ وَ أَنْطَانَا حَيَاةْ جَدِيدَةْ بِالرُّوحْ الْقُدُّوسْ 6 الْهُو نَزَّلَهْ فَوْقنَا بِكُلَّ بَرَكَاتَهْ بِوَاسِطَةْ مُنَجِّينَا عِيسَى الْمَسِيحْ. 7 وَ مِثِلْ دَا، بِقِينَا صَالِحِينْ بِنِعْمَتَهْ وَ أَنِحْنَ عَشْمَانِينْ فَوْق رَبِّنَا كَدَرْ نَوْرُثُوا الْحَيَاةْ الْأَبَدِيَّةْ.
8 وَ الْكَلَامْ دَا حَقّ. وَ نِدَوْر كَدَرْ إِنْتَ تِفَسِّرْ لَيْهُمْ كُلَّ الْكَلَامْ دَا أَشَانْ النَّاسْ الْآمَنَوْا بِاللّٰهْ يِنْكَرْبُوا بِنِيَّةْ وَاحِدَةْ فِي عَمَلْ الْخَيْر. كُلَّ الْكَلَامْ دَا سَمَحْ بِلْحَيْن وَ عِنْدَهْ فَايْدَةْ لِكُلَّ النَّاسْ.
9 لَاكِنْ أَنْقَرِعْ مِنْ الْمُنَاقَشَاتْ الْمَا عِنْدُهُمْ فَايْدَةْ مِثِلْ مُنَاقَشَاتْ فِي الْقَرَمْ وَ الْمُخَاصَمَةْ وَ الْمُغَالَطَةْ فِي تَفْسِيرْ التَّوْرَاةْ. كَلَامْ مِثِلْ دَا بَاطِلْ وَ مَا عِنْدَهْ فَايْدَةْ أَبَداً. 10 وَ أَيِّ نَادُمْ الْيِحَجِّي كَلَامْ شِقْ وَ يِفَرِّقْ بَيَّهْ الْأَخْوَانْ، حَذِّرَهْ مَرَّةْ وَاحِدَةْ وَ حَذِّرَهْ مَرَّةْ تَانِيَةْ وَ بَعَدْ دَا، أَقْطَعْ مَعَايَهْ الْعَلَاقَةْ. 11 أَكِيدْ أَيِّ نَادُمْ الْمِثِلْ دَا، هُو مُوَدِّرْ وَ خَاطِي. هُو يِجِيبْ الْعِقَابْ فِي رَاسَهْ.
نِهاية الجواب
12 نِدَوْر نِرَسِّلْ لَيْك أَرْتِمَاسْ وَلَّا تِشِيكُسْ. وَ وَكِتْ وَاحِدْ مِنْهُمْ يَوْصَلَكْ، أَعَصِرْ نَفْسَكْ أَشَانْ تَجِي لَيِّ فِي حِلَّةْ نِكُوبُلُسْ. أَنَا شِلْت نِيَّةْ نَقْعُدْ فَوْقهَا طُولْ الشِّتَاءْ. 13 وَ فِي الشَّيّءْ الْبُخُصّ أَخْوَانَّا زَيْنَاسْ الْمُحَامِي وَ أَبُلُوسْ، أَعَصِرْ نَفْسَكْ أَشَانْ تِسَاعِدْهُمْ فِي سَفَرْهُمْ وَ خَلِّي شَيّءْ مَا يِقَصِّرْ لَيْهُمْ فِي الدَّرِبْ. 14 وَ خَلِّي كُلَّ أَخْوَانَّا يَعَرْفُوا كِكَّيْف يِنْكَرْبُوا فِي عَمَلْ الْخَيْر أَشَانْ يِسَاعُدُوا النَّاسْ الْحَوْجَانِينْ بِالصَّحِيحْ. وَ مِثِلْ دَا أَخْوَانَّا مَا يَبْقَوْا نَاسْ الْحَيَاتْهُمْ مَا عِنْدَهَا فَايْدَةْ.
15 كُلَّ النَّاسْ الْمَعَايِ يِسَلُّمُوكْ. وَ سَلِّمْ كُلَّ الْمُؤمِنِينْ الْيِحِبُّونَا.
عَلَيْكُمْ كُلُّكُو النِّعْمَةْ.
© La Bible en arabe tchadien © Alliance biblique du Tchad, 2019
