رُؤية الفانوس و شدر الزَيْتون
1 وَ الْمَلَكْ الْقَاعِدْ يِحَجِّي لَيِّ قَبَّلْ جَاءْ وَ قَوَّمَانِي مِثِلْ يِقَوُّمُوا نَادُمْ مِنْ النَّوْم. 2 وَ هُو قَالْ لَيِّ: «قَاعِدْ تِشِيفْ شُنُو؟» وَ أَنَا قُلْت: «قَاعِدْ نِشِيفْ فَانُوسْ كُلَّ كَيْ هَنَا دَهَبْ وَ الْبَكَانْ الْيُصُبُّوا فَوْقَهْ الدِّهِنْ قَاعِدْ مِنْ فَوْق لَيَّهْ وَ عِنْدَهْ سَبْعَةْ طِيَيْسَاتْ الْعِنْدُهُمْ سَبْعَةْ نِيرَانْ. 3 وَ جَاي وَ جَاي لِلْبَكَانْ الْيُصُبُّوا فَوْقَهْ الدِّهِنْ، نِشِيفْ شَدَرْ إِتْنَيْن هَنَا زَيْتُونْ، الْوَاحِدَةْ بِالزَّيْنَةْ وَ الْآخَرَةْ بِالْإِسْرَةْ.» 4 وَ أَنَا سَأَلْت الْمَلَكْ الْقَاعِدْ يِحَجِّي لَيِّ وَ قُلْت: «دَا مَعَنَاتَهْ شُنُو، يَا سِيدِي؟» 5 وَ الْمَلَكْ قَالْ: «الشَّيّءْ الْقَاعِدْ تِشِيفَهْ دَا، مَعَنَاتَهْ مَا تَعَرْفَهْ وَلَّا؟» وَ أَنَا قُلْت: «لَا، يَا سِيدِي.»
6 وَ خَلَاصْ، هُو قَالْ لَيِّ: «اللّٰهْ حَجَّى لِزَرُبَابِلْ وَ قَالْ:
‹الْخِدْمَةْ دِي مَا بِقُوَّةْ
وَ لَا بِقُدْرَةْ
وَ لَاكِنْ بِرُوحِي أَنَا.
وَ دَا، اللّٰهْ الْقَادِرْ بَسْ قَالَهْ.7 إِنْتَ تَحْسِبْ نَفْسَكْ كَبِيرْ، يَا الْجَبَلْ؟
قِدَّامْ زَرُبَابِلْ تَقَعْ
وَ تَبْقَى سَهَلَةْ بَسْ.
وَ كَنْ زَرُبَابِلْ يِجِيبْ
آخِرْ حَجَرْ لِيَبْنُوا بَيْتِي،
النَّاسْ يِعِيطُوا وَ يُقُولُوا:
”مَبْرُوكْ! مَبْرُوكْ لِلْحَجَرْ!“›»
8 وَ اللّٰهْ حَجَّى لَيِّ أَنَا زَكَرِيَّا وَ قَالْ:
9 «إِيدَيْن زَرُبَابِلْ خَطَّوْا أَسَاسْ الْبَيْت دَا
وَ إِيدَيْنَهْ بَسْ يِكَمُّلُوهْ.»
وَ بَيْدَا، تَعَرْفُوا كَدَرْ اللّٰهْ الْقَادِرْ بَسْ رَسَّلَانِي لَيْكُو.
10 «مَا تَحْقُرُوا يَوْم هَنَا بِدَايَةْ صَغَيْرَةْ.
تَفْرَحَوْا وَكِتْ تِشِيفُوا فِي إِيدْ زَرُبَابِلْ
دُرْدُمْة الْحَدِيدْ الْيِقَاوُسُوا بَيَّهْ.»
وَ النِّيرَانْ السَّبْعَةْ هَنَا الْفَانُوسْ دَوْل يِمَثُّلُوا عُيُونْ اللّٰهْ الْقَاعِدِينْ يِرَاقُبُوا كُلَّ الْأَرْض.
11 وَ بَتَّانْ، أَنَا سَأَلْت الْمَلَكْ وَ قُلْت: «شَدَرْ الزَّيْتُونْ الْإِتْنَيْن الْأَنَا شِفْتَهْ جَاي وَ جَاي لِلْفَانُوسْ بِالزَّيْنَةْ وَ الْإِسْرَةْ، مَعَنَاتَهْ شُنُو؟» 12 وَ سَأَلْتَهْ لِتَانِي مَرَّةْ وَ قُلْت: «شُنُو مَعَنَى هَنَا الْفُرُوعْ الْإِتْنَيْن هَنَا شَدَرْ الزَّيْتُونْ الْقَاعِدِينْ جَنْب الْمَجَارِي الْإِتْنَيْن هَنَا الدَّهَبْ الْيِسِيلْ مِنْهُمْ الدِّهِنْ الدَّهْبِي؟» 13 وَ هُو رَدَّ لَيِّ وَ قَالْ: «مَا تَعَرِفْ مَعَنَاتَهْ وَلَّا؟» وَ أَنَا قُلْت: «لَا، يَا سِيدِي.» 14 وَ خَلَاصْ، هُو قَالْ لَيِّ: «دَوْل يِمَثُّلُوا الرُّجَالْ الْإِتْنَيْن الْمَسَحَوْهُمْ بِالدِّهِنْ وَ خَصَّصَوْهُمْ لِيَقِيفُوا قِدَّامْ اللّٰهْ سِيدْ كُلَّ الْأَرْض.»
© La Bible en arabe tchadien © Alliance biblique du Tchad, 2019
