رُؤية الكتاب الملْفوف الطايِر
1 وَ بَتَّانْ أَنَا رَفَعْت رَاسِي وَ شِفْت رُؤْيَةْ. وَ دَاهُو شِفْت كِتَابْ مَلْفُوفْ طَايِرْ. 2 وَ الْمَلَكْ قَالْ لَيِّ: «قَاعِدْ تِشِيفْ شُنُو؟» وَ أَنَا قُلْت: «قَاعِدْ نِشِيفْ كِتَابْ طَايِرْ طُولَهْ 20 دُرَاعْ وَ عُرْضَهْ 10 دُرَاعْ.» 3 وَ خَلَاصْ، هُو قَالْ لَيِّ: «فِي الْكِتَابْ دَا، مَكْتُوبَةْ فَوْقَهْ اللَّعَنَةْ النَّزَلَتْ فِي كُلَّ الْبَلَدْ. وَ بِنُصَّهْ الْوَاحِدْ، أَيِّ سَرَّاقْ يَطُرْدُوهْ وَ بِنُصَّهْ الْآخَرْ، أَيِّ نَادُمْ الْيَحْلِفْ بِكِدِبْ كُلَ يَطُرْدُوهْ. 4 وَ دَاهُو كَلَامْ اللّٰهْ الْقَادِرْ: ‹أَنَا نَزَّلْت اللَّعَنَةْ دِي أَشَانْ تَدْخُلْ وَ تَسْكُنْ فِي بَيْت السَّرَّاقْ وَ فِي بَيْت النَّادُمْ الْيَحْلِفْ بِأُسْمِي بِكِدِبْ. وَ تِدَمِّرْ الْبَيْت لَحَدِّي مَرَادِيسَهْ وَ أَسَاسَهْ.›»
رُؤية القُفّة
5 وَ الْمَلَكْ الْقَاعِدْ يِحَجِّي لَيِّ قَدَّمْ وَ قَالْ لَيِّ: «أَرْفَعْ رَاسَكْ وَ شِيفْ الشَّيّءْ الْجَايِ دَا.» 6 وَ أَنَا سَأَلْتَهْ وَ قُلْت: «دَا شُنُو؟» وَ هُو قَالْ لَيِّ: «دِي الْقُفَّةْ الْفَوْقهَا ذُنُوبْ هَنَا كُلَّ نَاسْ الْبَلَدْ.» 7 وَ طَوَّالِي، طَبَقْ هَنَا حَدِيدْ أَنْرَفَعْ مِنْ خَشُمْ الْقُفَّةْ وَ دَاهُو فِيَّهْ مَرَةْ قَاعِدَةْ فِي لُبَّهَا. 8 وَ الْمَلَكْ قَالْ: «الْمَرَةْ دِي، هِي تِمَثِّلْ الْفَسَالَةْ.» هُو لَزَّاهَا دَاخَلْ فِي الْقُفَّةْ وَ سَدَّ خَشُمْ الْقُفَّةْ بِالطَّبَقْ هَنَا الْحَدِيدْ دَا.
9 وَ بَعَدْ دَا، أَنَا رَفَعْت رَاسِي وَ شِفْت رُؤْيَةْ. وَ دَاهُو شِفْت عَوِينْ إِتْنَيْن جَايَاتْ. الرِّيحْ قَاعِدَةْ تِهِجّ فِي جَنَاحَيْهِنْ وَ جَنَاحَيْهِنْ مِثِلْ جَنَاحَيْ أَبُنْ غَنَمْ. وَ هِنَّ شَالَنْ الْقُفَّةْ وَ طَارَنْ بَيْهَا أَمْبَيْن السَّمَاءْ وَ الْأَرْض. 10 وَ أَنَا سَأَلْت الْمَلَكْ الْقَاعِدْ يِحَجِّي لَيِّ وَ قُلْت: «وَيْن يِوَدَّنْ الْقُفَّةْ دِي؟» 11 وَ هُو قَالْ لَيِّ: «يِوَدَّنْهَا فِي بَلَدْ بَابِلْ الْفَسْلَةْ لِيَبْنُوا لَيْهَا بَيْت الْعِبَادَةْ. وَ هِنَاكْ يِسَوُّوا لَيْهَا أَسَاسْ وَ يُخُطُّوهَا فَوْقَهْ.»
© La Bible en arabe tchadien © Alliance biblique du Tchad, 2019
