اللّه يحاكِم كل البُلْدان
1 الْمُحَاكَمَةْ الْكَلَّمْ بَيْهَا اللّٰهْ
نَزَلَتْ فِي بَلَدْ حَدْرَاكْ
وَ وَقَفَتْ فِي مَدِينَةْ دِمَشْق.
أَشَانْ اللّٰهْ يِشِيفْ كُلَّ بَنِي آدَم،
مَا قَبَايِلْ بَنِي إِسْرَائِيلْ بَسْ.
2 وَ الْمُحَاكَمَةْ دِي تَجِي لِمَدِينَةْ حَمَاتْ
الْقَرِيبْ لِدِمَشْق.
وَ تَجِي لِمُدُنْ صُورْ وَ صَيْدَا
السُّكَّانْهُمْ عِنْدُهُمْ حِكْمَةْ كَبِيرَةْ.
3 سُكَّانْ صُورْ بَنَوْا لَيْهُمْ حِمَايَةْ
وَ لَمَّوْا فُضَّةْ كَتِيرَةْ مِثِلْ التُّرَابْ
وَ دَهَبْ كَتِيرْ مِثِلْ طِينَةْ الشَّوَارِعْ.
4 وَ دَاهُو الرَّبّ يَقْلَعْ مِنْهُمْ كُلَّ شَيّءْ
وَ يَرْمِي حِمَايِتْهُمْ فِي الْبَحَرْ
وَ الْمَدِينَةْ ذَاتْهَا،
النَّارْ تَاكُلْهَا.
5 مَدِينَةْ أَشْقَلُونْ تِشِيفْ وَ تَخَافْ
وَ غَزَّةْ تِتَّنَّ زِيَادَةْ مِنْ الْوَجَعْ
وَ عَقْرُونْ عَشَمْهَا يِنْقَطِعْ.
وَ يَكْتُلُوا مَلِكْ غَزَّةْ
وَ أَشْقَلُونْ مَا يَسْكُنُوهَا بَتَّانْ.
6 وَ اللّٰهْ قَالْ:
«الْأَجَانِبْ يَسْكُنُوا أَشْدُودْ
وَ نِدَمِّرْ إِسْتِكْبَارْ الْفِلِسْطِيِّينْ.
7 نَمْرُقْ مِنْ خَشُمْهُمْ اللَّحَمْ الْفَطِيسْ
وَ مِنْ سُنُونْهُمْ اللَّحَمْ الْحَرَامْ.
الْيِفَضُّلُوا مِنْهُمْ
يَبْقَوْا هِنَيّ أَنَا إِلٰـهُّمْ
وَ يَبْقَوْا خَشُمْ بَيْت
أَمْبَيْن بَنِي يَهُوذَا.
وَ نَاسْ عَقْرُونْ يِنْضَمَّوْا لِشَعَبِي
مِثِلْ الْيَبُوسِيِّينْ.
8 وَ أَنَا نُخُطّ مُعَسْكَرِي جَنْب أَرْضِي
وَ نَحْرِسْهَا مِنْ الْعُدْوَانْ الْمَاشِينْ وَ الْجَايِينْ.
وَ أَيِّ مُضَايِقْ مَا يَجِي فَوْقهَا بَتَّانْ
أَشَانْ هَسَّعْ عَيْنِي فَوْقهَا.»
الملك اليجيب السلام
9 «يَا صَهْيُون الْمِثِلْ بِنَيَّةْ،
أَفْرَحَيْ زِيَادَةْ!
عِيطِي بِفَرَحْ،
يَا مَدِينَةْ الْقُدُسْ الْمِثِلْ بِنَيَّةْ!
دَاهُو مَلِكِّ جَايِ لَيْكِ.
هُو عَادِلْ وَ مُنَّصِرْ.
هُو مِسْكِينْ وَ رَاكِبْ فِي حُمَارْ،
فِي دَحَشْ وِلَيْد حُمَارَةْ.
10 أَنَا نِدَمِّرْ عَرَبَاتْ الْحَرِبْ فِي تُرَابْ أَفْرَايِمْ
وَ خَيْل الدُّوَاسْ فِي مَدِينَةْ الْقُدُسْ
وَ نِكَسِّرْ نُبَّالْ الْحَرِبْ.
وَ الْمَلِكْ دَا يِكَلِّمْ
بِالسَّلَامْ لِلْأُمَمْ
وَ سُلْطِتَهْ تَمْشِي مِنْ الْبَحَرْ الْمَيِّتْ
لَحَدِّي الْبَحَرْ الْأَبْيَضْ
وَ مِنْ بَحَرْ الْفُرَاتْ
لَحَدِّي آخِرْ الْأَرْض.»
11 وَ اللّٰهْ قَالْ:
«بِسَبَبْ مُعَاهَدَتِي
السَّوَّيْتهَا مَعَاكُو
بِدَمّ الضَّحَايَا،
أَنَا نَمْرُقْ مَسَاجِينْكُو مِنْ السِّجِنْ
الْبِقِي لَيْهُمْ مِثِلْ نُقْرَةْ بَلَا أَلْمِي.
12 يَا الْمَسَاجِينْ الْعِنْدُكُو عَشَمْ،
قَبُّلُوا فِي الْبَكَانْ الْقَوِي.
هَسَّعْ نِخَبِّرْكُو
كَدَرْ نِكَفِّيكُو تَعَبْكُو مَرَّتَيْن.
13 بَنِي يَهُوذَا يَبْقَوْا لَيِّ نُبَّالْ
وَ قَبِيلَةْ أَفْرَايِمْ يَبْقَوْا لَيِّ نَشَاشِيبْ.
يَا صَهْيُون، أَنَا نِقَوِّمْ رُجَالْكِ
وَ نِسَوِّيهُمْ مِثِلْ سَيْف الْفَارِسْ
ضِدّ صُبْيَانْ بَلَدْ الْيُونَانْ.»
14 وَ اللّٰهْ يِبِينْ مِنْ فَوْق لِشَعَبَهْ
وَ نُشَّابَهْ يَبْرُقْ مِثِلْ بَرَّاقَةْ.
اللّٰهْ الرَّبّ يَضْرُبْ الْبُوقْ
وَ يَجِي بِرِيحْ شَدِيدَةْ مِنْ الْجُنُوبْ.
15 اللّٰهْ الْقَادِرْ يَحْمِي شَعَبَهْ
وَ هُمَّنْ يِدَمُّرُوا
وَ يَخَرْبُوا الْعَدُو
بِحُجَارْ الْمِقْلَاعْ.
وَ يَشَرْبَوْا وَ يِكَوْرُكُوا
مِثِلْ سَكَّارَى.
وَ يِنْمَلُوا بِدَمّ عُدْوَانْهُمْ
مِثِلْ كَاسْ الْيُرُشُّوا بَيَّهْ قُرُونْ الْمَدْبَحْ.
16 وَ اللّٰهْ إِلٰـهُّمْ يِنَجِّي شَعَبَهْ فِي الْيَوْم دَا،
مِثِلْ رَاعِي يِنَجِّي غَنَمَهْ.
أَشَانْ هُمَّنْ يِرَارُوا فِي أَرْضَهْ
مِثِلْ حُجَارْ غَالِيِّينْ الْيِرَارُوا فِي تَاجْ.
17 أَيْوَى، هُمَّنْ يَفْرَحَوْا زِيَادَةْ
وَ يَبْقَوْا جَمِيلِينْ مَرَّةْ وَاحِدْ!
وَ الْقَمَحْ يِأَكِّلْ الصُّبْيَانْ
وَ الْخَمَرْ الْجَدِيدْ يِكَبِّرْ الْبَنَاتْ.
© La Bible en arabe tchadien © Alliance biblique du Tchad, 2019
