بيت اللّه يخرْبوه
1 وَ عِيسَى مَرَقْ مِنْ بَيْت اللّٰهْ وَ مَشَى قِدَّامْ شِيَّةْ وَ تَلَامِيذَهْ جَوْا وَ وَصَّفَوْا لَيَّهْ بُنَى هَنَا بَيْت اللّٰهْ. 2 وَ عِيسَى قَالْ لَيْهُمْ: «شِفْتُوا كُلَّ الْبُيُوتْ دَوْل؟ نُقُولْ لَيْكُو الْحَقّ، مَا يِخَلُّوا حَجَرْ يَقْعُدْ فَوْق حَجَرْ. يَرْمُوهُمْ كُلُّهُمْ!»
علامات كُمالة الدُنْيا
3 وَكِتْ عِيسَى قَاعِدْ فِي جَبَلْ الزَّيْتُونْ، تَلَامِيذَهْ جَوْا لَيَّهْ وِحَيْدهُمْ وَ قَالَوْا: «أَوْرِينَا مَتَى دَا يَبْقَى. وَيْنِي الْعَلَامَةْ التِّوَصِّفْنَا إِنْتَ تِقَبِّلْ قَرِيبْ وَ كُمَالَةْ الدُّنْيَا تِدَوْر تَبْقَى؟» 4 وَ عِيسَى رَدَّ لَيْهُمْ وَ قَالْ: «أَوْعُوا بَالْكُو! مَا تِخَلُّوا نَادُمْ يُغُشُّكُو. 5 أَشَانْ نَاسْ كَتِيرِينْ يَجُوا بِأُسْمِي وَ يِحَجُّوا بِنُفُوسْهُمْ وَ يُقُولُوا هُمَّنْ الْمَسِيحْ. وَ يُغُشُّوا نَاسْ كَتِيرِينْ. 6 وَ تَسْمَعَوْا خَبَرْ هَنَا حُرُوبْ قَرِيبْ وَ حُرُوبْ بَعِيدْ. خُطُّوا بَالْكُو مَا تِبَرْجُلُوا. أَشَانْ دَا، وَاجِبْ يُكُونْ. وَ لَاكِنْ دَا لِسَّاعْ مَا كُمَالَةْ الدُّنْيَا. 7 نَاسْ هَنَا بَلَدْ وَاحِدَةْ يَهْجُمُوا نَاسْ هَنَا بَلَدْ آخَرَةْ وَ مَمْلَكَةْ تَهْجِمْ مَمْلَكَةْ وَ جُوعْ شَدِيدْ يَنْزِلْ وَ فِي دِيَارْ كَتِيرِينْ يُكُونْ زِلْزَالْ. 8 وَ لَاكِنْ التَّعَبْ دَا مِثِلْ بِدَايَةْ وَجَعْ الطَّلَقَةْ.
9 «وَ فِي الْوَكِتْ دَا، يِسَلُّمُوكُو لِلنَّاسْ الْيِعَذُّبُوكُو وَ يَكْتُلُوكُو وَ كُلَّ الْأُمَمْ يَكْرَهَوْكُو فِي شَانْ أُسْمِي. 10 وَ مُؤمِنِينْ كَتِيرِينْ يِخَلُّوا الْإِيمَانْ وَ يَكْرَهَوْا أَخْوَانْهُمْ وَ يُخُونُوهُمْ. 11 وَ نَاسْ كَتِيرِينْ يِسَوُّوا نُفُوسْهُمْ أَنْبِيَاء وَ يُغُشُّوا نَاسْ كَتِيرِينْ. 12 الْفَسَالَةْ تِزِيدْ وَ تَبْقَى عَامَّةْ وَ الْمَحَبَّةْ تَبْقَى ضَعِيفَةْ فِي قُلُوبْ نَاسْ كَتِيرِينْ. 13 وَ لَاكِنْ النَّادُمْ الْقَاعِدْ ثَابِتْ لَحَدِّي كُمَالَةْ كُلَّ شَيّءْ، يَنْجَى. 14 وَ يِبَلُّغُوا بِشَارَةْ مَمْلَكَةْ اللّٰهْ فِي كُلَّ الدُّنْيَا وَ يَشْهَدَوْا لَيْهَا لِكُلَّ الْأُمَمْ وَ بَعَدْ دَا بَسْ، كُمَالَةْ الدُّنْيَا.
التعب الشديد
15 «وَ وَكِتْ تِشِيفُوا الْحَرَامْ الْيِجِيبْ الْخَرَابْ وَاقِفْ فِي الْبَكَانْ الْمُقَدَّسْ، وَ دَا الشَّيّءْ النَّبِي دَنْيَالْ حَجَّى فَوْقَهْ (خَلِّي النَّادُمْ الْيَقْرِي الْكَلَامْ دَا يَفْهَمَهْ)، 16 فِي الْوَكِتْ دَاكْ، خَلِّي النَّاسْ الْقَاعِدِينْ فِي دَارْ الْيَهُودِيَّةْ يِعَرُّدُوا فِي الْحُجَارْ. 17 وَ أَيِّ نَادُمْ الْقَاعِدْ يِنْجَمَّ فِي رَاسْ بَيْتَهْ، خَلِّي يَجْرِي وَ مَا يِدَلِّي يِشِيلْ خُمَامَهْ مِنْ الْبَيْت. 18 وَ أَيِّ نَادُمْ الْقَاعِدْ فِي الزَّرَعْ خَلِّي يَجْرِي وَ مَا يِقَبِّلْ يِشِيلْ خَلَقَهْ. 19 فِي الْوَكِتْ دَا، يَبْقَى قَاسِي مَرَّةْ وَاحِدْ لِلْعَوِينْ الْغَلْبَانَاتْ وَ الْعَوِينْ الْيِرَضِّعَنْ. 20 أَسْأَلَوْا اللّٰهْ أَشَانْ مَا وَاجِبْ تَجْرُوا فِي الشِّتَاءْ وَلَّا فِي يَوْم السَّبْت. 21 فِي الْوَكِتْ دَاكْ، التَّعَبْ يَبْقَى شَدِيدْ بِلْحَيْن. وَ مَا فِي تَعَبْ مِثْلَهْ مِنْ اللّٰهْ خَلَقْ الدُّنْيَا لَحَدِّي الْيَوْم. وَ تَعَبْ شَدِيدْ مِثِلْ دَا أَبَداً مَا يُكُونْ بَتَّانْ. 22 وَ كَنْ اللّٰهْ مَا نَقَصْ عَدَدْ أَيَّامْ التَّعَبْ دَا، نَادُمْ وَاحِدْ مَا يَنْجَى. وَ لَاكِنْ اللّٰهْ فَكَّرْ فِي النَّاسْ الْعَزَلَاهُمْ وَ فِي شَانْهُمْ هُو نَقَصْ عَدَدْ أَيَّامْ التَّعَبْ دَا.
23 «وَ فِي الْوَكِتْ دَا، كَنْ نَادُمْ بُقُولْ لَيْكُو: ‹شِيفُوا! الْمَسِيحْ هِنِي› وَلَّا ‹شِيفُوا! الْمَسِيحْ هِنَاكْ›، مَا تِصَدُّقُوا كَلَامَهْ. 24 أَشَانْ نَاسْ كَتِيرِينْ يَجُوا وَ يُقُولُوا هُمَّنْ الْمَسِيحْ وَلَّا يُقُولُوا بِكِدِبْ هُمَّنْ أَنْبِيَاء. وَ يِسَوُّوا عَلَامَاتْ كُبَارْ وَ عَجَايِبْ لَحَدِّي يُغُشُّوا النَّاسْ الْاللّٰهْ عَزَلَاهُمْ، كَنْ دَا مُمْكِنْ. 25 أَيْوَى، أَنَا أَوْرَيْتكُو بِالْكَلَامْ دَا قُبَّالْ مَا يُكُونْ. 26 وَ كَنْ يُقُولُوا لَيْكُو: ‹الْمَسِيحْ جَاءْ وَ قَاعِدْ فِي الْكَدَادَةْ›، مَا تَمْشُوا. وَلَّا كَنْ يُقُولُوا: ‹الْمَسِيحْ جَاءْ وَ قَاعِدْ فِي الْبَيْت دَاخَلْ›، مَا تِصَدُّقُوا كَلَامْهُمْ. 27 أَكِيدْ مِثِلْ الْبَرَّاقَةْ تَبْرُقْ فِي الصَّبَاحْ وَ تِنْشَافْ فِي الْغَرِبْ، جَيَّةْ إِبْن الْإِنْسَانْ كُلَ تَبْقَى مِثِلْ دَا. 28 الرِّمَّةْ تِنَادِي الصُّقُورَةْ.
جيّة المسيح التانية
29 «وَ طَوَّالِي بَعَدْ تَعَبْ هَنَا الْوَكِتْ دَاكْ، الْحَرَّايْ تَبْقَى زَرْقَةْ وَ الْقَمَرْ مَا يِضَوِّي وَ النُّجُومْ يَقَعَوْا مِنْ السَّمَاءْ وَ قُوَّاتْ السَّمَاوَاتْ يِنْهَزَّوْا. 30 فِي الْوَكِتْ دَاكْ، عَلَامَةْ إِبْن الْإِنْسَانْ تِنْشَافْ فِي السَّمَاءْ وَ كُلَّ قَبَايِلْ الْأَرْض يَبْكُوا. وَ يِشِيفُوا إِبْن الْإِنْسَانْ جَايِ فِي سَحَابْ السَّمَاءْ بِقُدْرَةْ عَظِيمَةْ وَ مَجِيدَةْ. 31 وَ حِسّ الْبُرُنْجِي الْعَظِيمْ يِنْسَمِعْ وَ هُو يِرَسِّلْ مَلَائِكَتَهْ فِي أَيِّ جِيهَةْ أَشَانْ يِلِمُّوا النَّاسْ الْعَزَلَاهُمْ مِنْ أَيِّ بَكَانْ فِي الْأَرْض.
علامة شدرة التين
32 «وَ فَكُّرُوا فِي شَدَرَةْ التِّينْ وَ شِيلُوا الْمَثَلْ. كَنْ فُرُوعْهَا يِدَوْرُوا يِخَضُّرُوا وَ الْوَرْشَالْهَا الْأَوَّلَانِي يَمْرُقْ، تَعَرْفُوا الْوَكِتْ التَّلْدَ فَوْقَهْ قَرَّبْ. 33 وَ سَوَا سَوَا مِثِلْ دَا، وَكِتْ تِشِيفُوا كُلَّ شَيّءْ الْأَوْرَيْتكُو بَيَّهْ، خَلَاصْ تَعَرْفُوا جَيَّةْ الْمَسِيحْ قَرِيبْ. هُو قَرَّبْ لِبِيبَانْكُو. 34 وَ نُقُولْ لَيْكُو الْحَقّ، نَاسْ هَنَا الْوَكِتْ دَا مَا يِكَمُّلُوا قُبَّالْ كُلَّ الْكَلَامْ دَا مَا يِتِمّ. 35 السَّمَاءْ وَ الْأَرْض يَبْقَوْا مَا فِيهُمْ وَ لَاكِنْ كَلَامِي يَقْعُدْ دَايْماً.
اليوم الما معْروف
36 «وَ الشَّيّءْ الْيَبْقَى بَعَدَيْن دَا، نَادُمْ وَاحِدْ مَا يَعَرِفْ يَوْمَهْ وَ لَا سَاعْتَهْ. الْمَلَائِكَةْ فِي السَّمَاوَاتْ كُلَ مَا يَعَرْفُوهْ وَ إِبْن اللّٰهْ مَا يَعَرْفَهْ، إِلَّا أَبُوهْ وِحَيْدَهْ يَعَرْفَهْ.
37 «وَ حَالَةْ النَّاسْ فِي يَوْم جَيَّةْ إِبْن الْإِنْسَانْ تَبْقَى سَوَا مِثِلْ حَالَةْ النَّاسْ فِي زَمَنْ نُوحْ. 38 وَ فِي الْأَيَّامْ قُبَّالْ الْأَلْمِي مَا يَجِي يَاكُلْهُمْ، هُمَّنْ قَاعِدِينْ يَاكُلُوا وَ يَشَرْبَوْا وَ الرُّجَالْ قَاعِدِينْ يَاخُدُوا عَوِينْ وَ الْعَوِينْ قَاعِدَاتْ يَاخُدَنْ رُجَالْ لَحَدِّي الْيَوْم النُّوحْ دَخَلْ فِي السَّفِينَةْ. 39 وَ أَلْمِي صَبَّ وَ النَّاسْ مَا فِهْمَوْا الشَّيّءْ الْيَبْقَى وَ الْأَلْمِي أَكَلَاهُمْ كُلُّهُمْ. وَ يَبْقَى سَوَا سَوَا مِثِلْ دَا فِي يَوْم جَيَّةْ إِبْن الْإِنْسَانْ.
40 «وَ فِي الْوَكِتْ دَا، رُجَالْ إِتْنَيْن يَقْعُدُوا فِي زَرَعْ وَ وَاحِدْ مِنْهُمْ يِنْرَفِعْ وَ الْآخَرْ مَا يِنْرَفِعْ. 41 وَ عَوِينْ إِتْنَيْن قَاعِدَاتْ يَرْحَكَنْ غَلَّةْ وَ الْوَاحِدَةْ تِنْرَفِعْ وَ الْآخَرَةْ مَا تِنْرَفِعْ. 42 وَ خَلَاصْ، أَقْعُدُوا وَاعِيِّينْ أَشَانْ إِنْتُو مَا تَعَرْفُوا يَوْم جَيَّةْ رَبُّكُو.
مَثَل السرّاق
43 «وَ أَفْهَمَوْا الْمَثَلْ دَا. كَنْ أَوَّلْ سِيدْ الْبَيْت عِرِفْ السَّاعَةْ السَّرَّاقْ يَجِي فِي اللَّيْل، هُو يَقْعُدْ وَاعِي وَ مَا يِخَلِّي السَّرَّاقْ يَدْخُلْ فِي بَيْتَهْ. 44 وَ خَلَاصْ، إِنْتُو كُلَ، أَقْعُدُوا جَاهِزِينْ أَشَانْ إِبْن الْإِنْسَانْ يِقَبِّلْ فِي يَوْم الْإِنْتُو مَا تَعَرْفُوهْ.
مَثَل العبِد العديل
45 «يَاتُو مِنْكُو يَبْقَى عَبِدْ أَمِينْ وَ فَاهِمْ؟ السِّيدَهْ يِكَلِّفَهْ فِي كُلَّ عَبِيدَهْ أَشَانْ يَنْطِيهُمْ أَكِلْ فِي الْوَكِتْ الْوَاجِبْ. 46 مَبْرُوكْ لِلْعَبِدْ دَا كَنْ سِيدَهْ يَجِي مِنْ السَّفَرْ وَ يَلْقَاهْ يَخْدِمْ فِي خِدِمْتَهْ. 47 نُقُولْ لَيْكُو الْحَقّ، هُو يِدَرِّجْ الْعَبِدْ دَا مَسْؤُولْ فِي كُلَّ شَيّءْ الْعِنْدَهْ. 48 وَ لَاكِنْ كَنْ الْعَبِدْ فَسِلْ، وَ يُقُولْ فِي قَلْبَهْ: ‹سِيدِي يِطَوِّلْ وَ مَا يَجِي عَجَلَةْ.› 49 وَ يُقُمّ يُدُقّ أَخْوَانَهْ الْعَبِيدْ وَ يَاكُلْ وَ يَشْرَبْ مَعَ السَّكَّارَى. 50 أَكِيدْ، سِيدْ الْعَبِدْ دَا يَجِي فِي يَوْم وَاحِدْ الْعَبِدْ مَا جَاهِزْ لِيِلَاقِيهْ فَوْقَهْ وَ فِي سَاعَةْ الْهُو مَا يَعَرِفْهَا. 51 وَ سِيدَهْ يِعَاقِبَهْ وَ يُخُطَّهْ مَعَ الْمُنَافِقِينْ. هِنَاكْ يَبْكُوا وَ يِعَضُّوا سُنُونْهُمْ مِنْ الْعَذَابْ.»
© La Bible en arabe tchadien © Alliance biblique du Tchad, 2019
