Goŋ Saul wuu
(1 Sa 31:1-13)1 Filistien ruura sal ne za Israel tǝ waa Gilboa. Ikra za kǝsyil za Israel gŋ pǝlli, tǝcoŋ za ɗuura kalle. 2 So Filistien ɗuura lwaa mor Saul ne wee ahe, ira Yunatan, Abinadaɓ ne Malkisua daŋ pǝ wulli. 3 Yǝk sal daŋ soo ge tǝ Saul, za ma 'nǝǝ guu ge daira mor ahe, jwǝǝra ko ne guu. 4 Saul faa nyi we ma ɓaŋ paŋzǝǝ ahe: Mo nǝǝ kafahe ɓo mo ce me ne pǝ wulli, ka gãhnyah rai mo joŋra kyẽm ne me ka. Amma gal re we ɓaŋ paŋzǝǝ ah pǝlli, zyii ka in ko ya. So Saul nǝǝ kafahe ma syak ah haa suu ah ge tǝl ahe. 5 Ne cok we ɓaŋ paŋzǝǝ mo kwo Saul mo wuu, so haa suu ah ge tǝ kafahe mǝ ah wǝ ta. 6 Saul ne wee ah sai tǝkine zan ah daŋ wukra com ah naiko, zah goŋ mǝ ah i zah tǝɗe'. 7 Ne cok za Israel mai mo kaara ɓo Jezereel pǝ cok ma tǝforoŋ mo laara za sal Israel ɗuura ɓe, Saul ne wee ah wukra ɓe ta, soɓra yaŋ ɓǝǝ ɗuura kalle. So Filistien ge kaara gŋ.
8 Tǝ'nan ah Filistien gera ka mgbai fan wo wulli, ge lwaara wul Saul ne wee ah sai daŋ ɓaa ɓo tǝgǝǝ waa Gilboa. 9 Ŋgoŋra tǝtǝl Saul, wǝǝra fan wo suu ahe, so peera za ɓaŋ tǝtǝl ah ne fan sal ah ra kyãh pǝ sǝr Filistien ne daŋ, ka cuu ɓǝ 'nyah ah yaŋ masǝŋ ɓǝǝ ne wo za ɓǝǝ daŋ. 10 Rǝkra fan sal Saul ɓǝr yaŋ masǝŋ ɓǝǝra, raora tǝtǝl ah ɓǝr yaŋ masǝŋ ɓǝǝ ma ɗii ne Daagon. 11 Ne cok za yaŋ Jabes ma Giliat mo laara ɓǝ fan mai Filistien mo joŋra wo Saul, 12 za maswah ah urra kal ge ɓaŋra wul Saul ne mǝ wee ah daŋ, piira soo ge yaŋ Jabes ne ko, ge ciira woiŋ ɓǝǝ gŋ mor baare, so syẽera fan zah'nan rǝŋ.
13 Saul wuu, mor joŋ faɓe' wo Dǝɓlii, zyii ka laa zah Dǝɓlii ya, a kyeɓ ka syee mor ɓǝ mai mǝǝzuwuŋ wul ye mo faa nyi ko. 14 Zyii fii ɓǝ zah Dǝɓlii ya, mor ah Dǝɓlii i ko pǝ wulli, ɓaŋ goŋ ah nyi nyi David we Isai.
© Bible Moundang © Alliance Biblique du Tchad, 1996.
