Mbǝro za joŋzahsyiŋrĩ
(Pǝ̃ǝ 28:1-14)1 Curra mbǝro masãh ma mor joŋ yeɓ cok matǝdaŋdaŋ ne zyim kǝrãhmo, masyẽ, ne masyẽ tǝ nyaknyakke. Curra mbǝro masãh mor Aron, tǝgbana na mai Dǝɓlii mo faa ɓǝ ah nyi Mosus.
2 Curra ɗaŋsikki ne suu ma joŋ ne vãm kaŋnyeeri, zyim syiŋ pǝsǝ̃ǝ makǝrãhmo, masyẽ, ne masyẽ tǝ nyaknyak tǝkine zyim manikki. 3 Coora vãm kaŋnyeeri pǝgwahe, so ɗeara na suu mor ka sãa zyim kǝrãhmo, masyẽ, masyẽ tǝ nyaknyak tǝkine zyim manik ga wo ki ne ko. 4 Joŋra fan tǝbǝǝsah gwa, zah ah ra gwa daŋ dai ki ɓo, mgbãa ki ne ɗaŋsikki ne zah ah matǝ gwa kŋ. 5 Joŋra ganda ne ɗaŋsikki ne fan tǝ vaŋno, so mgbãa ki ɓo vaŋno ta, joŋ ɓo ne vãm kaŋnyeeri, joŋ ne zyim kǝrãhmo, masyẽ, masyẽ tǝ nyaknyak tǝkine manikki, tǝgbana Dǝɓlii mo faa nyi Mosus. 6 Maara tǝsal onikis ge pǝzyil tǝhal jer ma vãm kaŋnyeeri, ɗeara tǝɗii wee Yakuɓ jemma tǝtǝl gwa tǝ ɓǝǝra, tǝgbana dǝɓ ma ŋgom tampon moo joŋni. 7 Maara tǝsal ah ra ge tǝbǝǝsah ɗaŋsikki, a no gŋ mor foo ɓǝ za Israel. Fan ah daŋ joŋ na mai Dǝɓlii mo faa nyi Mosus.
Fan saa zahbii
(Pǝ̃ǝ 28:15-30)8 Joŋra fan saa zahbii, ne fan mai mo joŋra ɗaŋsikki ne ko, yeɓ kaŋ ah laŋ jur ki ɓo ta. 9 Wah ah ne 'ah ah zahki, hãm ɓo tǝki gwa, wah ah lii ne malamlii ne wor jolle, 'ah ah lii ne malamlii ne wor jol ta. 10 Lǝǝra tǝsal ah ge gŋ, lǝǝra tǝsal sardonik, topas tǝkine emeral kǝpelle. 11 Patǝ gwa lǝǝ ah ye karbukle, safir tǝkine diamon. 12 Patǝ sai lǝǝ ah ye opal, agat tǝkine ametis. 13 Patǝ nai lǝǝ ah ye kristolit, onikis tǝkine jaspis, lǝǝra tǝsal ah ra ge pǝ tǝhal jer vãm kaŋnyeeri. 14 Tǝsal ah ra gŋ jemma tǝ gwa na tǝɗii wee Yakuɓ, ɗea ɓo ɗeare, vaŋno vaŋno daŋ a ne tǝɗii zahban jemma tǝ gwa. 15 Joŋra gǝnyiŋ ma vãm kaŋnyeeri masãhe, jerra tǝgbana jerre. A mor fan saa zahbii. 16 Joŋra tǝhal jer gwa tǝkine tǝgaa gwa, so maara tǝgaa tǝ gwa nyẽe ge zah fan saa zahbii gwa daŋ. 17 Gõmra jer gǝnyiŋ vãm kaŋnyeeri matǝ gwa ge wo tǝgaa matǝ gwa ma zah fan saa zahbii. 18 Gõmra gǝnyiŋ ma jejer matǝ gwa ge fah wo tǝhal jer matǝ gwa nǝkǝki, saara ge wo tǝbǝǝsah ɗaŋsikki ma fah kǝpelle. 19 Joŋra tǝgaa vãm kaŋnyeeri gwa, so maara ge tǝ nyah fan saa zahbii tǝ nyah ah ma mor kǝsǝŋ ah kah ɗaŋsikki. 20 So joŋra tǝgaa vãm kaŋnyeeri gwa, sãara ge wo fan ma haŋ ɗaŋsikki ma kǝpel nǝfah kǝmor kǝsǝŋ ahe, gwari ne zah zyaŋ ganda ɗaŋsikki tǝ kǝsǝŋ ahe. 21 Gõmra fan saa zahbii ge wo tǝgaa ah ra ma wo ɗaŋsikki ne suu zyim kǝrãhmo ka fan saa zahbii mo kaa tǝ ganda ɗaŋsikki, ka fan saa zahbii mo woŋ ki ne ɗaŋsikki ka, tǝgbana Dǝɓlii mo faa nyi Mosus.
Mbǝro manyeeki ah ma mor za joŋzahsyiŋrĩ
(Pǝ̃ǝ 28:31-43)22 Cuŋra manto ma mor ɗaŋsikki ne zyim syiŋ pǝsǝ̃ǝ makǝrãhmo. 23 Zahsol no kǝsyil ahe, zahsol ah kaŋ kiŋ ɓo ne daɗaari tǝgbana zahsol mbǝro salle, ka mo ŋgǝ̃ǝ ka. 24 Zyeɓra fan tǝ ɓal ah sǝŋ gǝrlǝŋ gǝrlǝŋ tǝgbana lee dakulokki, ne zyim kǝrãhmo, ne masyẽ, ne masyẽ tǝ nyaknyak tǝkine manikki. 25 Zyeɓra tǝroŋ ma vãm kaŋnyeeri masãh tǝ ɓal ahe, raora tǝroŋ ah ra ge tǝgǝǝ fan matǝ gǝrlǝŋ gǝrlǝŋ tǝgbana lee dakulok vaŋno vaŋno kiŋ daŋ. 26 Tǝroŋ vãm kaŋnyeeri vaŋno, fan ma na lee dakulok gŋ vaŋno ta, tǝroŋ vãm kaŋnyeeri vaŋno, fan ma na lee dakulok gŋ vaŋno ta, ka joŋ yeɓ tǝgbana mai Dǝɓlii mo faa nyi Mosus.
27 Curra mbǝro pǝŋwǝǝ nyi Aron tǝkine wee ahe, mbǝro ah ra kaŋ ɓo ne zyim manikki, 28 tǝkine zyim zah tǝtǝl nyi ra, ne njokki, ne oosãh daŋ ne zyim manik ahe. 29 Joŋra ganda ne zyim manik ne zyim kǝrãhmo, ne masyẽ, masyẽ tǝ nyaknyakke, tǝgbana mai Dǝɓlii mo faa nyi Mosus. 30 Dahra vãm kaŋnyeeri pǝgwah na tol pǝsãhe, ŋwǝǝra fan tǝl ah ɗea ɓo ɗeare, faa: A pǝsãh mor Dǝɓlii. 31 Baŋra ge wo zyim zahtǝtǝl ne jer zyim kǝrãhmo fah kǝzahpel tǝgbana mai Dǝɓlii mo faa nyi Mosus.
Yeɓ zyeɓ tal mbǝro vǝr ɓe
(Pǝ̃ǝ 35:10-19)32 Yeɓ tal mbǝro ma tai vǝr naiko. Za Israel joŋra yeɓ ah tǝgbana Dǝɓlii mo faa nyi Mosus, joŋra na mooko.
33 Woora tal mbǝro gee Mosus ne ko, ne fan yeɓ ah ra daŋ: kǝṽǝl ah ra, plaŋ ah ra, kpuu yil ah ra, wǝǝdǝǝ ah ra tǝkine ɓal ah ra, 34 fan rii tǝl ah ma wak kǝbǝr ma syesyiŋ, ma wak syiŋ malii tǝkine zyim cee cok ma rii cokki, 35 ne sunduku gbanzah ne kpuu zǝǝ ah ra, tǝkine cok rwah faɓe', 36 ne taabǝl, tǝkine fan yeɓ ah ra daŋ, ne farel ma nyi mor Masǝŋ tǝ cẽecẽe, 37 kpuu pitǝrla vãm kaŋnyeeri masãhe, ne pitǝrla ah ra matǝ rǝŋ ne fan yeɓ ah ra daŋ, tǝkine nǝm ma mor pitǝrla ah ra, 38 cok joŋ syiŋ vãm kaŋnyeeri ne nǝm syee tǝtǝlli, ɓǝrdi ma fuŋ 'nyahre, tǝkine zyim ma rii cok zahfah tal mbǝro, 39 ne cok joŋ syiŋ vãm syẽ, fan ma na jin vãm syẽ, kpuu zǝǝ ah ra ne fan yeɓ ah ra daŋ tǝkine daaro ne ɓal ahe, 40 zyim cea zahpiicel ra ne wǝǝdǝǝ ah ra, ɓal ah ra, zyim rii cok zahfah zahpiicelle, gǝnyiŋ ah ra ne gaari ah ra, tǝkine fan yeɓ ma joŋ yeɓ tal mbǝro ma taini, 41 ne mbǝro joŋ yeɓ mor cok matǝdaŋdaŋ, ne mbǝro masãh ma mor Aron pa joŋzahsyiŋrĩ, tǝkine mbǝro wee ah ra ma joŋ zahsyiŋrĩ. 42 Za Israel joŋra yeɓ mai Dǝɓlii mo faa ɓǝ ah wo Mosus daŋ. 43 Mosus ẽe yeɓ ah daŋ, kwo yeɓ ah joŋ vǝr tǝgbana mai Dǝɓlii mo faa nyi ko, joŋra na mooko. Mosus so ẽe za Israel.
© Bible Moundang © Alliance Biblique du Tchad, 1996.
