Ɓǝ cuu tǝ Yesu mai mo ɓaa ge wo kpuu
1 Wee pa ɓe, ne cok me ge wo ɓii ka cuu ɓǝ goŋga mai mo muŋ ɓo wo Masǝŋ nyi we, me ge faa ɓǝ ah ne kyaŋ tan ɓǝ lii wala fatan a. 2 Mor ne cok me no wo ɓiiri, me 'yah ka tan fan ki ya, sai ɓǝ wul Yesu Kristu mai mo ɓaa ge wo kpuu to. 3 Ne cok me wo ɓiiri, ame pǝtǝtǝ̃ǝre, suu coo me ne ɗuu galle. 4 Ɓǝ faa ɓe ne ɓǝ cuu ɓe ka ne ɓǝ fatan dǝfuu moo kǝǝ dǝɓ ne ya, amma joŋ syedowal ɓo tǝ swah Tǝ'yak Masǝŋ, 5 mor ka iŋ ɓii mo uu tǝ fatan dǝfuu ka, amma mo uu tǝ swah Masǝŋ.
Fatan Masǝŋ
6 Amma me tǝ cuu fatan nyi za eklesia mai mo joŋra zaluu ɓo pǝ tǝ'yakke. Fatan sǝr mai ye ka, fatan zaluu mo kaara swah ɓo tǝ sǝr mai swah ɓǝǝ moo vǝr ye ka ta. 7 Me tǝ cuu ɓǝ fatan Masǝŋ ma tǝsyeɓ mo yea muŋ ɓǝ ah ɓo wo dǝfuu, Masǝŋ zyeɓ ɓǝ ah kan ɓo mor yǝk man ka sǝr ɓah joŋ ya ba. 8 Koo dǝɓ vaŋno kǝsyil zaluu sǝr mai tǝ fatan mai ya. Kǝnah mo tǝra ɓe, ka ɓaara Dǝɓlii mayǝk ga tǝ kpuu ya. 9 Tǝgbana Ɗerewol mo faa:
Fan mai nahnǝn dǝfuu mo kwo ya, Sok ah mo laa ya, dǝfuu ka foo ɓǝ ah ya, Masǝŋ zyeɓ fan ɓo mor za ma 'yahra ko.
10 Amma Masǝŋ cuu ɓǝ tǝsyeɓ ah nyi na ne Tǝ'yak Matǝdaŋdaŋ. Mor Tǝ'yak a gak mgbai ɓǝ daŋ, koo mor ɓǝ mai Masǝŋ mo muŋ ɓo ɓoroo laŋ a mgbaini. 11 Tǝgbana dǝfuu, tǝ'yak dǝɓ ah yee tan ɓǝ daŋ mo pǝ zahzyil ah to. Nai ta, sai Tǝ'yak Masǝŋ yee tan ɓǝ mai mo wo Masǝŋ to. 12 Amma ana, na ɗǝǝ tǝ'yak sǝr mai ɓo ya, amma na ɗǝǝ Tǝ'yak mai mo gee wo Masǝŋ ge ɓo, mor ka tan fan mai daŋ Masǝŋ mo nyi ɓo na. 13 Ɓǝ mai na tǝ faani, na ka tǝ faa ne fahlii mai fatan dǝfuu ye mo cuu ɓo ya, amma na tǝ faa ɓǝ mai Tǝ'yak ye mo cuu ɓo. Mor ah na cuu mor goŋga fan ma Tǝ'yak nyi za mai mo ne Tǝ'yak Masǝŋ.
14 Dǝɓ mai mo ka ne Tǝ'yak Masǝŋ ya ɓe, ka gak nyiŋ goŋga mai Tǝ'yak Masǝŋ mo cuu ya ta, a yea wol ah na ɓǝ tǝgwĩi, ka gak laa mor ah laŋ ya. Mor sai Tǝ'yak yee gak cuu mor ah nyi dǝɓ laa to. 15 Dǝɓ mai mo ne Tǝ'yak Masǝŋ a gak lii fan daŋ, amma ako ne suu ah dǝɓ ma so gak lii ko kǝka. 16 Tǝgbana Ɗerewol mo faa:
Azu ye tǝ ɓǝ foo Dǝɓlii ne?
Azu ye gak cuu ɓǝ nyi ko ne?
Amma ma man ana ne ɓǝ foo Kristu.
© Bible Moundang © Alliance Biblique du Tchad, 1996.
