LEWITIEN 14 - Bible Moundang (MUA)

Syiŋ ma joŋ mor syem fan suu

1 Dǝɓlii faa nyi Mosus: 2 Ɓǝ lai matǝ ɓǝ syem fan suu dǝɓ mo laɓ ɓe, a naiko: Ne zah'nan mai mo faara, dǝɓ ah a pǝsãh o, sai ka mo zaŋra ko ge wo pa joŋzahsyiŋ ne ko. 3 So pa joŋzahsyiŋ mo zaŋko zahjul ge lal ne ko, ka mo so lii ko. Mo lwaako syem ah mo laɓ ɓe, 4 ka pa joŋzahsyiŋ mo faa mo gera ne juu masãh ah gwa, ne kpuu bahre, ne zyim masyẽ ahe, tǝkine goo kpuu ma ɗii ne hisoɓ. 5 So pa joŋzahsyiŋ mo nyi fahlii ka mo ŋgoŋra juu maki ah vaŋno tǝtǝl cii mai biikyaŋ mo rǝk ɓo gŋ, mo baa ɓo cyõ. 6 So ka pa joŋzahsyiŋ mo ɓaŋko juu patǝ gwa ahe, ne kpuu bahre, ne zyim syẽ, tǝkine goo kpuu hisoɓ, ka mo maako ge pǝ syim juu ma kǝpel mo ŋgoŋra kŋ. 7 Ka mo meeko syim ah ge tǝtǝl dǝɓ mai syem fan suu ah mo laɓ ɓo zahlǝŋ rǝŋ, ka mo so faako: Dǝɓ ah a pǝsãh o. So ka mo soɓko juu mai mo ne cee kŋ mo zooko kalle. 8 Dǝɓ mai syem fan suu ah mo laɓ ɓo, mo vãhko fan wo suu ah ra, mo sõoko tǝtǝl ah ge lalle, mo erko bii, a ga yea pǝsãhe. A ga dan ga zahjulli. Amma sai mo kaako fahfal tal mbǝro ma swul ah lal joŋ zah'nan rǝŋ. 9 Zah'nan rǝŋ mo baa ɓe, ka mo sõoko tǝtǝl faɗa, ne pyaŋne, ne zwahnǝnni, tǝkine syiŋ mai mo wo suu ah daŋ, ka mo so vãhko fan wo suu ah ra, mo so erko bii, a ga yea pǝsãhe.

10 Tǝ zah'nan nama ah ka pa joŋzahsyiŋ mo wooko wee pǝsǝ̃ǝ mawǝǝ ah gwa, ne we pǝsãhm matam ah ma joŋ syii tǝ vaŋno gŋ, wee pǝsǝ̃ǝ ah daŋ mo yea ne suu sãhe, ne sum tahsah sai mai mo suu ɓo ne nǝmmi, ne nǝm raita liitǝr gŋ. 11 Pa joŋzahsyiŋ mo zaŋko dǝɓ ah ne fan nyi marai daŋ, mo geko zahfah tal mbǝro ma tai ne ko. 12 So ka mo ɓaŋko we pǝsãhm mawor vaŋno, ka mo joŋko syiŋ ma soo tǝ faɓe' ne pel Dǝɓlii tǝkine nǝm raita liitǝr kŋ. Ka mo geko pel Dǝɓlii ne fan ah ra, fan nyi ma nyi nyi Dǝɓlii mor pa joŋzahsyiŋ yo. 13 Sai ka mo ŋgoŋko we pǝsãhm ah pǝ cok mai moo ŋgomra faɓal ma mor joŋ syiŋ ma ɓaŋ faɓe' ga lal gŋ, tǝkine ma mor joŋ syiŋ suŋwii. Mo joŋko naiko, mor fan joŋ syiŋ ma mor soo tǝ faɓe' mǝ pa joŋzahsyiŋ ye tǝgbana syiŋ ma joŋ mor ɓaŋ faɓe' ga lal ta, mor a pǝsãh pel Dǝɓlii. 14 Pa joŋzahsyiŋ mo 'naako syim we pǝsãhm ah biŋ, ka mo kanko ge tǝ goosok ma jokǝsãh dǝɓ mai syem ah mo laɓ ɓo, ne tǝ malamlii jol ah ma jokǝsãhe. 15 So pa joŋzahsyiŋ mo ɓaŋko nǝm mo syeeko ge pǝlam jol ma ka syak ah ma jokǝlǝɓai biŋ, 16 ka mo so maako tǝwee jol ah ma jokǝsãh ah ge pǝ nǝm ahe, ka mo meeko gŋ pel Dǝɓlii zahlǝŋ rǝŋ. 17 So ka mo saŋko nǝm mai mo pǝlam jol ah biŋ tǝkine syim we pǝsãhmme, ka mo joŋko ge nyi dǝɓ mai syem ah mo laɓ ɓo tǝ goosok ma jokǝsãhe, ne tǝ malamlii jol ah ma jokǝsãhe, ne tǝ malamlii ɓal ah ma jokǝsãhe. 18 Ka mo so tahko tǝcoŋ nǝm mai mo coŋ ɓo pǝlam jol ah ge tǝtǝl dǝɓ mai syem ah mo laɓ ɓo. Pa joŋzahsyiŋ mo joŋko mor ah naiko, ka Dǝɓlii mo rwah faɓe' ah ge lalle.

19 So pa joŋzahsyiŋ mo joŋko syiŋ ma ɓaŋ faɓe' ga lalle, ka dǝɓ mai syem ah mo laɓ ɓo, faɓe' ah mo rwah ge lalle. Ka fahfal ah mo ŋgoŋko faɓal ma mor joŋ syiŋ suŋwii, 20 ka mo joŋko syiŋ suŋwii ne nǝǝ faɓal ah tǝkine fan nyi ma farel kŋ tǝ cok joŋ syiŋrĩ. Pa joŋzahsyiŋ mo joŋko mor ah naiko, ka faɓe' dǝɓ ah mo rwah ge lalle, so dǝɓ ah ga yea pǝsãhe.

21 Dǝɓ mai syem ah mo laɓ ɓo mo pǝsyakke, mo gak ka nyiko fan nyi ah nai ya ɓe, ka mo geko ne we pǝsãhm vaŋno, ka joŋ syiŋ ne mor soo tǝ faɓe' ahe, we pǝsãhm ah fan nyi ma nyi nyi Dǝɓlii mor pa joŋzahsyiŋ yo, so ka mo geko ne sum ma suu ne nǝm tahsah vaŋno, ma mor fan nyi ma farelle, ne nǝm raita liitǝr. 22 Mo so geko ne matǝvaawandala gwa, wala matǝvaakol gwa, maki ah vaŋno ka mo joŋra syiŋ ma mor ɓaŋ faɓe' ga lal ne ko, maki ah laŋ mo joŋra syiŋ suŋwii ne ko. 23 Zah'nan patǝ nama ah mai syem ah mo laɓ ɓo, ka mo woo fan rai ge wo pa joŋzahsyiŋ ne zahfah tal mbǝro ma taini. 24 Ka pa joŋzahsyiŋ mo ɓaŋko we pǝsãhm ah ne nǝmmi, ka mo geko pel Dǝɓlii ne ko, tǝgbana fan nyi ma nyi nyi ko mor pa joŋzahsyiŋrĩ. 25 Pa joŋzahsyiŋ mo ŋgoŋko we pǝsãhm ahe, ka mo so 'naako syim ah biŋ, mo kanko ge nyi dǝɓ ah tǝ goosok ah ma jokǝsãhe, ne tǝ malamlii jol ah ma jokǝsãhe, ne tǝ malamlii ɓal ah ma jokǝsãhe. 26 So pa joŋzahsyiŋ mo ɓaŋko nǝm mo syeeko ge pǝlam jol ah ma jokǝlǝɓai biŋ, 27 ka mo so saŋko ne tǝwee jol ah ma jokǝsãhe, ka mo meeko gŋ pel Dǝɓlii zahlǝŋ rǝŋ. 28 So ka mo saŋko nǝm mai mo pǝlam jol ah biŋ, tǝkine syim we pǝsãhmme, ka mo joŋko ge nyi dǝɓ mai syem ah mo laɓ ɓo tǝ goosok ma jokǝsãhe, ne tǝ malamlii jol ah ma jokǝsãhe, ne tǝ malamlii ɓal ah ma jokǝsãhe. 29 Ka mo so tahko tǝcoŋ nǝm mai mo coŋ ɓo pǝlam jol ah ge tǝtǝl dǝɓ mai syem ah mo laɓ ɓo. Pa joŋzahsyiŋ mo joŋko mor dǝɓ ah naiko, ka Dǝɓlii mo rwah faɓe' dǝɓ ah ge lalle. 30 So ka mo joŋko syiŋ ne matǝvaakol vaŋno, wala matǝvaawandala vaŋno, 31 maki ah vaŋno mor ka ɓaŋ faɓe' ga lalle, maki ah laŋ ka joŋ syiŋ suŋwii ne ko, ne fan nyi ma farelle. Pa joŋzahsyiŋ mo joŋko mor dǝɓ ah naiko, ka Dǝɓlii mo rwah faɓe' dǝɓ ah ge lalle. 32 Mai ɓǝ lai ma mor dǝɓ mai syem fan suu ah mo laɓ ɓo, so dǝɓ ah mo ka ne swah ka nyi fan joŋ syiŋ ma mor syem ah mo laɓ ɓo tǝgbana ɓǝ ah mo cuu ɓo ya yo.

Ɓǝ lai tǝ ɓǝ gaɓ lǝǝ manjaktǝril ma ɓǝr yaŋ

33 Dǝɓlii faa nyi Mosus ne Aron: 34 Ne cok we ga dan pǝ sǝr Kanaan mai me tǝ ga nyi nyi we ka renne, so me kan gaɓ lǝǝ manjaktǝril ɓǝr yaŋ ɓii ra ɓe, ka me cuu ɓǝ lai ah ɓo naiko: 35 Koo zune mo kal kwo gaɓ ɓǝ lǝǝ manjaktǝril ɓǝr yaŋ ah ɓe, ka mo ge faako ɓǝ ah nyi pa joŋzahsyiŋrĩ. 36 Pa joŋzahsyiŋ mo nyi fahlii ka mo woora fan mai mo ɓǝr yaŋ ah daŋ ge lalle, kǝpel mo ge ka ẽe yaŋ ahe, mor ka fan mai mo no ɓǝr yaŋ ah daŋ mo yea ne 'nahm pel Dǝɓlii ka. So ka mo geko yaŋ ahe, 37 ka mo liiko yaŋ ahe. Ne cok mo kwoko lǝǝ manjaktǝril mo tǝ ɓeɓ suu yaŋ ah ga pelle, cok ah mo pǝsyẽ njenje, wala mo pǝfãapǝ̃ǝ nje ta, 38 sai pa joŋzahsyiŋ mo pǝ̃ǝko gin ɓǝr yaŋ ahe, mo so cooko zah yaŋ ah joŋ zah'nan rǝŋ. 39 Zah'nan rǝŋ mo baa ɓe, ka mo jinko ge lii yaŋ ah faɗa. Mo so kwo ɓǝ gaɓ lǝǝ manjaktǝril mo tǝ ga pel wo yaŋ ah ɓe, 40 ka mo so nyiko fahlii ka mo nǝǝra tǝsal mai lǝǝ manjaktǝril mo wol ah ra ge lalle, ka mo ge rǝkra pǝ cok ma ne 'nahm ah fahceekor lalle. 41 Fahfal ah ka mo kpyãhra wo suu yaŋ ahe, ka mo rǝkra vuu ah ge pǝ cok ma ne 'nahm ah fahceekor lalle. 42 So ka mo woora tǝsal maki ah ra maa ge pǝ cok mai mo nǝǝra tǝsal ma kǝpel gŋ ge lalle, so ka mo ɓaara vuu mafuu ah ge wo suu yaŋ ahe.

43 So lǝǝ manjaktǝril mo so tǝŋ ɓǝr yaŋ ah fahfal mai mo nǝǝra tǝsal ah ge lalle, mo so ɓaara wo suu yaŋ ah ɓo ne vuu mafuu ah kpǝ ɓe, 44 ka pa joŋzahsyiŋ mo so ge ẽeko yaŋ ahe. Mo so kwoko ɓeɓ ah mo tǝ ga pel ɓǝr yaŋ ah kpǝ ɓe, ka yaŋ ah a ne 'nahm pel Dǝɓlii. 45 Sai ka mo hahra yaŋ ah ge sǝŋ, ka mo woora tǝsal ah ra, ne kpuu ah ra, ne vuu ah daŋ ge myah pǝ cok ma ne 'nahm ah fahceekor lalle. 46 Koo zune mo dan ge ɓǝr yaŋ ah ne cok mai mo coora zah yaŋ ah ɓo, dǝɓ ah ga yea ne 'nam pel Dǝɓlii, ŋhaa a dai lilli. 47 Koo zune mo kal swǝ ɓǝr yaŋ ah ne cok mai ka coora zah ah ɓo, wala mo re farel gŋ, sai mo vãhko fan wo suu ah ra.

48 Ne cok pa joŋzahsyiŋ mo ge, mo ẽe yaŋ ahe, mo kwo lǝǝ manjaktǝril mo tǝŋ ɓo ka fahfal mai mo zyeɓra yaŋ ah yao ɓe, ka mo faako: Yaŋ ah a pǝsãhe. Mor syem ah vǝr ɓe. 49 Ne cok mo tǝ ga vãhko yaŋ ah ɓe, mo wooko juu gwa, ne kpuu bah gŋ, ne zyim masyẽ ahe, ne goo kpuu ma ɗii ne hisoɓ, 50 mo ŋgoŋko juu vaŋno tǝtǝl cii mai biikyaŋ mo baa ɓo ɓǝr ahe. 51 So ka mo ɓaŋko kpuu bahre, ne zyim masyẽ, ne goo kpuu hisoɓ, ne juu patǝ gwa ah mai mo ne cee, ka mo maako fan rai daŋ ge pǝ syim juu mai mo ŋgoŋko, mo so maako ge pǝ biikyaŋ kŋ, ka mo so meeko ge wo yaŋ ah zahlǝŋ rǝŋ. 52 Mo joŋ nai ɓe, a ga ɓaŋ ɓeɓ mai mo tǝ yaŋ ah ga lal ne syim juu ahe, ne biikyaŋ ahe, ne juu patǝ gwa ah mo ne cee, ne kpuu bahre, ne goo kpuu hisoɓ, tǝkine zyim masyẽ ahe. 53 So ka mo soɓko juu mai mo ne cee, mo zooko kalle. Mo joŋko nai ɓe, ɓeɓ ka ga yea tǝ yaŋ ah yao, yaŋ ah ga yea pǝsãhe.

54 Mai ako ye ɓǝ lai tǝ ɓǝ syem fan suu, 55 ne ɓǝ gaɓ lǝǝ manjaktǝril ma wo fan wo suu ne ma wo yaŋ, 56 ne nwãhe, fabaani, tǝkine suu rwaani. 57 Mai fan cuu matǝ ɓǝ fan ma ne 'nahm pel Dǝɓlii, ne mai mo ka ne 'nahm ya yo.