Cok mai woiŋ yak mo gŋ
1 Ame laa swah Dǝɓlii ge tǝtǝl ɓe, Tǝ'yak ah ɓaŋ me ge kan pǝ cok ma tǝforoŋ ah mai woiŋ mo tǝ sǝr gŋ. 2 Zaŋ me kyãh pǝ cok tǝforoŋ ah daŋ ne ko, ame kwo woiŋ gŋ pǝlli, woiŋ ah ra woiŋ yak yo. 3 Faa nyi me: We dǝfuu, woiŋ marai a so gak syemra ka yea ne cee ne? Ame zyii zah ah faa: Masǝŋ Dǝɓlii, amo yee gak zyii fii mai to!
4 So faa nyi me: Mo faa ɓǝ tǝtǝl woiŋ raiko, mo faa nyi woiŋ yak rai mo laara ɓǝ faa Dǝɓlii. 5 Mo faa nyi ra, ame Dǝɓlii Masǝŋ me tǝ faa nyi ra sye: Me ga maa tǝ'yak ga pǝ zahzyil ɓiiri, ka we syem yea ne cee. 6 Me ga joŋ sǝ̃ǝ ga nyi we woli, me ɓoo nǝǝ ga nyi we gŋ, me so ɓoo wak ga nyi we fal ahe. Me ga maa tǝ'yak ga pǝzyil ɓii ka we yea ne cee. So we ga tǝ, ame ye Dǝɓlii.
7 Me so faa ɓǝ nyi woiŋ tǝgbana Dǝɓlii mo faa nyi me. Ne cok me tǝ faa ɓǝ ah faa ba, me laa cii fanne, ka nyãa woiŋ ye tǝ tǝɓra ga wo ki. 8 Me so tǝ ẽere, me kwo sǝ̃ǝ wo woiŋ ah ra, nǝǝ so zyǝŋ ge fahfal ahe, so wak so ɓaa ge fahfal nǝǝ ahe. Amma tǝ'yak kǝka pǝzyil suu ah ra ya ba.
9 Masǝŋ faa nyi me: We dǝfuu, mo faa ɓǝ nyi tǝ'yakke, ame Dǝɓlii Masǝŋ me faa, mo geko gin laa sǝr nai daŋ ge, ka mo dan ge pǝzyil wul raiko, ka mo syemra mo yeara ne cee.
10 Ame faa ɓǝ tǝgbana mai Dǝɓlii mo faa nyi me. So tǝ'yak ge dan wo suu ah ra mo ɓaa ɓo, so suu ah ra syemme, urra uu sǝŋ, zan ah pǝpãa no cam.
11 Masǝŋ faa nyi me: We dǝfuu, za Israel ara tǝgbana woiŋ raiko. A faara: Aru tǝgbana woiŋ yakke, byak fan laŋ ǝ̃ǝ ru pee ɓe, fan mai ka ru so joŋ kǝkao. 12 Mo faa ɓǝ ɓe nyi za ɓe Israel, mo faa nyi ra, ame Dǝɓlii Masǝŋ me ga gbǝr pal ɓǝǝra, me ga nǝǝ ra gin gŋ, me zaŋ ra pii soo ge sǝr Israel ne ko. 13 Ne cok me gbǝr pal mai mo ciira za ɓe ɓo gŋ, me nǝǝ ra gin gŋ ge lal ɓe, a ga tǝra, ame ye Dǝɓlii. 14 Me ga maa Tǝ'yak ɓe pǝzyil ɓǝǝra, ka mo syemra, me so ga soɓ ra kaa pǝ sǝr ɓǝǝra. So a ga tǝra, ame Dǝɓlii me ye faa ɓǝ ah ɓo, so me ga joŋ laŋ ta. Ame Dǝɓlii me faa naiko.
Yuda ne Israel ga yeara ne goŋ vaŋno
15 Dǝɓlii faa ɓǝ nyi me faɗa, 16 faa: We dǝfuu, mo ɓaŋ kǝndaŋne, ka mo ŋwǝǝ ɓǝ tǝtǝl ah mo faa: Goŋ Yuda, ka mo so ɓaŋ kǝndaŋ maki ahe, mo ŋwǝǝ ɓǝ tǝtǝl ah mo faa: Goŋ Israel. 17 So ka mo woo kǝndaŋ ah ra gwa daŋ mo jin zah ah ge wo ki ka mo yea jol ɓo na kǝndaŋ tǝ vaŋno. 18 Ne cok za ɓii mo fiira mo ɓǝ ah 'yah cuu ɓǝ fẽene ɓe, 19 ka mo faa nyi ra, ame Dǝɓlii Masǝŋ me ga ɓaŋ kǝndaŋ mai mo zahwaa za Israel, ga tai ki ne mai mo zahwaa za Yuda, me ga tai ra gwa daŋ ciŋ kǝndaŋ tǝ vaŋno ne mor jol ɓe. 20 Ezekiel, kǝndaŋ matǝ gwa mo ŋwǝǝ fan ɓo wol ahe, mo gbǝ jol ɓo ka za mo ẽe ra. 21 So ka mo faa nyi ra ame Dǝɓlii Masǝŋ, me ga zaŋ za ɓe gin kǝsyil za mai daŋ mo gera ɓo gŋ, me tai ra ga wo ki, me woo ra pii soo ge pǝ sǝr ɓǝǝ ne ko. 22 Me ga tai ra ga tǝ ki ka mo ciŋra za tǝ vaŋno pǝ sǝr ɓǝǝ tǝwaa Israel. A ga yeara ne goŋ vaŋno, ka ga woŋra ka yea na zahban gwa wala ne goŋ gwa taa yao. 23 Ka ga iira suu ɓǝǝ ne 'nahm ne ɓǝ masǝŋ ki ra wala ka ɓeɓ suu ɓǝǝ ne faɓe' faɗa yao, me ga wǝǝ ra wo faɓe' daŋ mai moo joŋra wo ɓe. Me ga vãh ra nǝǝ, a ga yeara za ɓe, ame laŋ me ye ga yea Masǝŋ ɓǝǝra. 24 Goŋ tǝgbana dǝɓ yeɓ ɓe David ye ga kaa goŋ ɓǝǝra. Ara daŋ a ga taira mor goŋ tǝ vaŋno, a ga syeera mor ɓǝ lai ɓe ra ne fahlii ahe. 25 A ga kaara pǝ sǝr mai me nyi ɓo nyi dǝɓ yeɓ ɓe Yakuɓ, pǝ sǝr mai pa ɓǝǝ lii ra mo yea kaara ɓo gŋ, a ga kaara gŋ ne wee ɓǝǝ tǝkine wee ɓǝr wee ɓǝǝ ga lii. Goŋ tǝgbana dǝɓ yeɓ ɓe David a ga kaa goŋ ɓǝǝ ga lii. 26 Me ga gbǝ zah ne ra ka mo kaara jam, gbanzah ah a yea ga lii. Me ga kan ra pǝ sǝr ɓǝǝra, me ga joŋ ra ɓoo pǝpãare, me ga kan yaŋ ɓe pǝ sǝr ɓǝǝra, a ga yea gŋ ga lii. 27 Me ga kaa gŋ ne ra, me ye ga yea Masǝŋ ɓǝǝra, ara ye ga yea za ɓe. 28 Ne cok me kan yaŋ ɓe kǝsyil ɓǝǝ ka mo yea gŋ ga lii ɓe, so za sǝr daŋ a ga tǝra, ame Dǝɓlii me ye nǝǝ za Israel ɓo ka mo ciŋra za ɓe.
© Bible Moundang © Alliance Biblique du Tchad, 1996.
