Syel ma 'nyah suu Masǝŋ
1 Faɗa wee pa ɓe, awe fee syel mai ka dǝɓ mo syee ka 'nyah suu Masǝŋ ne ko gin wo ɓuuru. So awe tǝ syee laŋ nai ta. Amma zǝzǝ̃ǝko ru fii we, ru pǝǝ we pǝ tǝɗii Dǝɓlii Yesu ka we joŋ ge pel kal maiko. 2 Mor we tǝ ɓǝ mai ru cuu ɓo nyi we pǝ tǝɗii Dǝɓlii Yesu ɓe. 3 Mor Masǝŋ 'yah we yea daŋdaŋ, we byak suu ɓii wo ɓǝ joŋ ɓǝǝre. 4 Koo zune kǝsyil ɓii mo tǝko fahlii ka ɓaŋ mawin ma syak ah ne fahlii matǝ goŋga tǝkine gban yǝk ahe. 5 Ka we soɓ fan cwaa maɓe' kaa swah tǝ ɓii tǝgbana za bai iŋ mai mo tǝra Masǝŋ ya ka, 6 ka pǝ ɓǝ mai koo zune mo joŋko ɓǝɓe' wo naa pam wala ne ɓeɓ ɓǝ fan ah mai ako ye mo ne fahlii joŋ ah to ka. Ru faa ɓǝ ah nyi we kǝpel ɓe, ru lai we ne ɓǝ ah pǝlli: Dǝɓlii ga ŋgoŋ kiita tǝ za ma joŋ faɓe' ma morãiko. 7 Masǝŋ ɗii na ɓo ka na syee ne joŋ ɓǝǝr a, amma ka na yea daŋdaŋ. 8 Mor ahe, dǝɓ mo syẽa ɓǝ cuu mai ɓe, ka syẽa ɓǝ dǝfuu ɓo ya, amma ka syẽa Masǝŋ mai moo nyi Tǝ'yak Matǝdaŋdaŋ nyi we ɓo.
9 We ka ne 'yah ka dǝɓ mo so ŋwǝǝ ɓǝ 'yah za ma iŋ moo 'yahra ki ne ko nyi we yao. Mor awe ne suu ɓii we fee ɓǝ ah ɓo wo Masǝŋ ka we 'yah ki. 10 Awe tǝ joŋ wo wee pa man mai mo pǝ sǝr Makedonia daŋ nai ta. So ru pǝǝ we, wee pa ɓuuru, we joŋ ge pel kal mai faɗa. 11 We kyeɓ ka we kaa jam, we joŋ yeɓɓe, ka we wol suu ɓii ne ko, tǝgbana mai ru faa nyi we kǝpelle. 12 Ne fahlii mai za mai ara ye mo ka eklesia ya a ga keera we, so we ka gaɓ za ki laŋ ya.
Gin Dǝɓlii
13 Wee pa ɓe, ru 'yah we tǝ goŋga tǝ ɓǝ za mai mo wukra ɓe, mor ka we swaa ɓǝ tǝgbana za mai mo ka ne byak fan a ka. 14 Ana nyiŋ ɓo Yesu wǝ ɓe, so ur pǝ wul ɓe ta. So na nyiŋ ɓo za mai mo nyiŋra Yesu mo so wukra ɓo daŋ, Masǝŋ ga jin pee ra ge ne ki.
15 We ẽe ru tǝ faa ɓǝ mai Dǝɓlii ye mo faa ɓo nyi we. Ana za mai na ne cee ba, ne cok Dǝɓlii moo ga ge, na ka ga kǝpel nyi za mai mo wuk ɓo ya. 16 Angeloi malii ma coksǝŋ ga ɓyaŋ ɓǝ, kokõorĩi Masǝŋ ga ulli, so Dǝɓlii ne suu ah a ga ɗǝr gin coksǝŋ ge sǝŋ. Za mai mo nyiŋra Yesu mo so wukra ɓo daŋ, a ga urra kǝpelle, 17 so a ga woora na za ma ne cee ne cok ah ne ra tǝ swãh bam ka ga zyaŋ ne Dǝɓlii tǝlǝǝ sǝŋ. So na ga kaa ne Dǝɓlii cẽecẽe. 18 We swaa zahzyil nyi ki ne ɓǝ maino.
© Bible Moundang © Alliance Biblique du Tchad, 1996.
