Profeto Masǝŋ kwo pa joŋzahsyiŋ malii
1 Pǝ fakwan ɓe, Dǝɓlii cuu Joswa pa joŋzahsyiŋ malii nyi me, uu ɓo pel angelos, Satan laŋ ge uu ɓo kah Joswa mor ka cen ko. 2 Angelos Dǝblii faa nyi Satan: Dǝɓlii mo ŋgoŋ kiita tǝ ɓo Satan, Dǝɓlii mai mo tǝ 'yah yaŋ Jerusalem mo ŋgoŋko kiita tǝ ɓo. Dǝɓ mai a tǝgbana zahwii mai dǝɓ mo nǝǝ gin ɓo mor wii.
3 Joswa uu ɓo gŋ, ɓoo mbǝro ma ne 'nahm ah ɓo. 4 Angelos faa nyi za yeɓ ah ra: We wǝǝ mbǝro ma ne 'nahm ah wo dǝɓ nyẽe ge lalle. So faa nyi Joswa: Ame ɓaŋ faɓe' ɓo wo ɓo ge lal ɓe, me ga nyi mbǝro mafuu ah nyi mo ka mo ɓoo. 5 So faa nyi za yeɓ ah ra: We kim zyim zahtǝtǝl masãh ah nyi Joswa. Kimra nyi, so ɓoora mbǝro nyi ko, ka Angelos Dǝblii uu ɓo no gŋ ta. 6 So pa pee faa nyi Joswa: 7 Dǝɓlii ma ne swah daŋ faa: Mo syee mor ɓǝ lai ɓe ra ɓe, mo so tǝ joŋ ta ɓe, me ga soɓ ɓǝ yaŋ ɓe ne zahpiicel ah daŋ jol ɓo. Me ga laa juupel ɓo ra, tǝgbana mee laa juupel angeloi mai ara mo pel ɓe ta. 8 Joswa pa joŋzahsyiŋ malii, mo laa, awe za joŋzahsyiŋ ma ne ki, we laa, awe tǝgbana fan ma cuu fanne, me ga pee Dǝɓ yeɓ ɓe mai moo ɗii ne Juu Ah ge. 9 Me kan tǝsal ɓo pel Joswa, tǝsal ah ne laa camcam rǝŋ. Me ga ŋwǝǝ fan tǝtǝl ahe, me ga ɓaŋ faɓe' sǝr mai ga lal zah'nan vaŋno. 10 Ne cok zah'nan ah mo ge ɓe, zune kǝsyil ɓii daŋ a ga ɗii jǝk ah ra ka mo ge haira mor cee kpuu vin tǝkine kpuu wuu jam.
© Bible Moundang © Alliance Biblique du Tchad, 1996.
